අල්ලාහ්ගෙන් මිනිසාට ලැබී ඇති ආශිර්වාද කවරේද? (What blessings have humans received from Allah?)
.jpg)
මිනිසා අල්ලාහ්ගේ සුවිශේෂී මැවිමකි. මේ හේතුවෙන් මිනිසාට වෙන කිසිම ජීවියෙකුට නැති තරම් වරප්‍රසාද ලැබී තිබේ. උදාහරණයක් ලෙස මිනිසාට අලංකාර ශරීරයක් ලබා දී තිබේ. එසේම මිනිසාට බොහෝ භාෂාවන් කතා කල හැකිය. මේ සෑම දෙයක්ම කල හැක්කේ මිනිසාව උසස් බුද්ධියකින් මවා තිබෙන නිසාය. මේවා කිසිවක් ඇතැමුන් සිතන ආකාරයට අහඹු සිදුවීම් විය නොහැකිය. මිනිසා ඉබේ ඇතිවූ ජීවියෙක් යැයි පිළිගන්නේ නම් යාන වාහන ශීතකරණ ආදියද ඉබේ ඇතිවිය යුතුය. එහෙත් එවැන්නක් කිසිසේත්ම සිදු නොවන බව මොලයක් ඇති ඕනෑම කෙනෙකුට තේරුම් ගත හැකිය.
මිනිසාව මවා තිබෙන්නේ විශේෂ හේතුවක් නිසාය. මේ නිසා මිනිසා ඔහුව මවා ඇති අරමුණ ඉටු කිරීම සඳහා ක්‍රියා කිරීම අනිවාර්ය වේ. මෙම අරමුණ කියා දීම සඳහා නබිවරුන්ගේ මාර්ගයෙන් දහම් පණිවිඩ විශාල සංක්‍යාවක් පහල කොට තිබේ. අල් කුරානය එසේ පැමිණි අවසාන දහම් පණිවිඩය වේ.
අල් කුරානයට අනුව මිනිසා අල්ලාහ්ගේ මිහිපිට නියෝජිතයා ය. ඒ අනුව මිනිසාව ඉතා අලංකාර රුපයෙන් මවා තිබේ. මිහිපිට සිටින ජීවින් අතරින් කොඳු නාරටිය සිරස් අතට තබාගෙන ඇවිදින එකම ජීවියා මිනිසාය. එය මිනිසාට පමණක් ලබා දී ඇති විශේෂ වරප්‍රසාදයකි. මිනිසාට මෙතරම් අලංකාර රුපයක් සහ තවත් බොහෝ දායාදයන් ලබා දී තිබුනත් මිනිසාගේ නොමනා ක්‍රියාකාර කම් නිසා මිනිසා තිරිසනාටත් වඩා පහත් තත්වයකට වැටෙන බව කුරානය පවසයි. කෙසේ වෙතත් මිනිසාට අල්ලාහ්ගෙන් ලැබී ඇති දායාදයන් මෙතෙකැයි කිව නොහැකි තරම්ය. ඒ බව අල් කුරානය තුල මෙසේ සඳහන් කොට ඇත. "නුඹලා අල්ලාහ්ගේ දායාදයන් ගණනය කලේ නම් නුඹලාට කිසිදාක එය ගණන් කල නොහැකිය" (කුරානය 14:34).
මිනිස් ජීවිතයයේ පැවැත්මට අවශ්‍යකරන සියලුම දේවල් අල්ලාහ් දෙවිඳුන් අපට ලබා දී තිබේ. උදාහරණයක් ලෙස ජිවිතයේ පැවැත්මට අත්‍යාවශ්‍ය වන ජලය සහ ඔක්සිජන් වායුව කිසිම අඩුවක් නොමැතිව ලබා ගැනීමට සලස්වා ඇත. එසේ නොවන්නට මිහිතලය මත ජිවිතයක් ගැන සිතා බැලීමටවත් හැකි වන්නේ නැත. තවද පෘථිවිය මත මිනිසා වෙනුවෙන් බොහෝ දේවල් මවා තිබේ. උදාහරණයක් ලෙස නොයෙකුත් රසයෙන් ගුණයෙන් යුතු පලතුරු ද වෙනත් බොහෝ බෝග වර්ග ද මවා තිබේ. මේවා නොවන්නට මිනිසා කුස ගින්නේ මිය යනු ඇත. එහෙත් කී දෙනෙක් ඒවා ලබා දුන් අල්ලාහ් හට ස්තුති කරන්නේද? වරක් දාවුද් නබි තුමා අල්ලාහ් හට ප්‍රාර්ථනා කරමින් "මගේ සමිඳුනි ඔබ ලබා දී ඇති දායාදයන්ට මා කෙසේ නම් ස්තුති කරන්නදැයි" පැවසුවේය. එවිට අල්ලාහ්,. "ඕ දාවුද් ඔබ මා හට ප්‍රමාණවත් ලෙස ස්තුති කළේයැයි" දැනුම් දුන්නේය. අල්ලාහ් ලබා දී ඇති දායාදයන් ගැන මෙනෙහි කිරීමත් අල්ලාහ් හට කරන ස්තුති කිරීමකි.
අනෙක් ජිවින්ට මෙන් නොව මිනිසා කරන සෑම දෙයක්ම ඇගයීමකට ලක් කරනු ලැබේ. ඉන් ප්‍රධාන තැනක් ගන්නේ මිනිසා ඔහුගේ මැවුම්කරු වන අල්ලාහ්ව විශ්වාස කිරීම වේ. අල්ලාහ්ව විශ්වාස නොකරන තැනැත්තා අල්ලාහ් ලබා දුන් දායාදයන්ට කෘත ගුණ දක්වන්නෙක් නොවේ.
මරණයෙන් පසු ජීවිතය සදාකාලිකය. එම ජීවිතය සමග සැසඳීමේදී ලෞකික ජීවිතය එක් දිනක් හෝ ඉන් කොටසක් ලෙස දැනෙනු ඇත. කෙසේ වෙතත් ලෞකික ජිවිතයේ අරමුණ නිවැරදිව වටහා නොගත් බොහෝ අය අල්පෙක්ෂිත ලෞකික ජීවිතය වෙනුවෙන්ම තම ජීවිත කාලයම ගෙවා දමන්නේය. ඔවුන්ට මරණයෙන් පසු නෙලා ගැනීමට සිදු වන්නේ මෙලොවදී වපුරන ලද දේවල් ය. ඒ අනුව ලෞකික ජීවිතයේදී අල්ලාහ්ගේ දුතයින් විසින් පෙන්වා දෙන ලද දහම අනුව ජිවත් වූ අයට නිශ්චිත වශයෙන්ම ස්වර්ගය ලැබීමට නියමිතය. එහෙත් තම මැවුම්කරු වන අල්ලාහ්ව අමතක කොට තම ආශාවන්ට වහල් වෙමින් ජිවත් වුයේ නම් ඔවුන්ට ලැබෙන්නේ නිරය බව කුරානය පවසයි. එහෙත් මිනිස් වර්ගයා වෙනුවෙන් පහළ කොට ඇති කුරානය කී දෙනෙක් නම් හදාරා තිබේ දැයි සිතා බැලිය යුතු නොවේද?
By Fasy Ajward.
Comments
Post a Comment