මුහම්මද් (ﷺ) තුමා කව්ද? (Who is prophet Mohamed (ﷺ)?)

ජෙසු තුමාගේ සම්ප්‍රාප්තියෙන් පසු පැමිණි අවසාන නබිවරයා මුහම්මද් (ﷺ) නබිතුමා ය. නබිවරයෙකු යනු මිනිසාට යහ මග පෙන්වීම සදහා මිනිසුන් අතරින් තෝරාපත් කරනු ලැබූ අල්ලාහ්ගේ විශේෂ නියෝජිත වරයෙකි. ඔවුන්ට දේවදුතයින් හරහා අල්ලාහ්ගෙන් දහම් පණිවිඩ ලැබෙන්නේය. ආදම් තුමාගේ පටන් මුහම්මද් (ﷺ) තුමා දක්වා නබිවරුන් සිය දහසකට වඩා මෙළොවට පැමිණ තිබේ. එම නබිවරුන්ව අනුගමනය කිරීම ඒ ඒ කාලවලදී ජීවත්වූ ජනතාවට ස්වර්ගය අත්කර ගැනීමට මාර්ගය විය. 

මෝසස් හෙවත් මුසා නබිතුමට යුදෙව් ආගම පහළ කල අල්ලාහ් ජේසු තුමාට බයිබලයද මුහම්මද් නබි (ﷺ) තුමාට අල් කුරානයද පහළ කළේය. එය මෙලොවට පහළ වූ අවසාන දහම් පණිවිඩය වේ. කුරානය මගින් ඊට පෙර පහළ කරන ලද දහම් පණිවිඩ වල ඇති කරුණු නැවත නැවත විස්තර කොට තිබේ. 

මුහම්මද් නබි (ﷺ) තුමාට පහළ කරන ලද අල් කුරානයේ ඇති විශේෂත්වය වන්නේ එය මුළු මිනිස් වර්ගයාටම මග පෙන්වන ග්‍රන්ථයක් වීමයි. එසේම මුහම්මද් නබිතුමා ලෝකවාසී ජනතාව වෙනුවෙන් පහළ වූ නබිවරයෙකි. එතුමා ඉබ්‍රාහිම් නබිතුමාගේ පුත් ඉස්මායිල්ගේ පරම්පරාවෙන් පැවත එන අතර ජේසු තුමා පැමිණෙන්නේ ඉබ්‍රාහිම් තුමාගේ පුත් ඉස්හාක් තුමාගේ පරම්පරාවෙන් ය. මේ හේතුවෙන් මුහම්මද් නබි තුමා ජේසු තුමාගේ ඥාති සහෝදරයෙකු වන්නේය. 

මුහම්මද් (ﷺ) තුමා ක්‍රි.ව. 571 දී අබ්දුල්ලා සහ අමිනා යන දෙදෙනාට දාව උපත ලැබුවේය. එතුමා උපදින විටත් ඔහුගේ පියා මිය ගොස් තිබුනේය. මුහම්මද් නබි තුමාට වයස හය වන විට මවද කළුරිය කළාය. අරාබියේ පැවති සිරිතට අනුව නබිතුමා හාලිමා නමැති ග්‍රාමීය කාන්තාව ළඟ හැදී වැඩුනේය. අනතුරුව ඔහුගේ මවගේ වියෝවෙන් පසු සිය පියාගේ පියා වන අබ්දුල් මුත්ත්ලිබ් ළඟ ජිවත් විය. එතුමාගේ ද අභාවයෙන් පසු නබිතුමා ජිවත් වුයේ සිය පියාගේ සහෝදරයෙකු වන අබු තාලිබ් තුමා ළඟ ය. 

මුහම්මද් (ﷺ) තුමා කුඩා කාලයේදී අනාත දරුවෙකු වුවත් අල්ලාහ්ගේ සැලසුම අනුව ඔහු ලොව පුරා විශාල පරිවර්තනයක් සිදු කළේය. ඒ අනුව ගෝත්‍ර වශයෙන් බෙදී වෙන්වී සිටි ජනතාව එක්සේසත් කළේය. එකල කිසිම පිළිගැනීමක් නොතිබුණු කාන්තාවන් සඳහා බොහෝ අයිතිවාසිකම් දිනා දුන්නේය. තවද නිවැරදි දහමක් නොතිබුණු ජනතාව අතර විශාල අධ්‍යාත්මික පෙරලියක් සිදු කළේය. තවද වසර 23 ක් තරම් ඉතා කෙටි කාලයකදී කුරානයේ මග පෙන්වීම හරහා ලෝකයේ ඉතා ශ්‍රේෂ්ඨ ජාතියක් බවට මුස්ලිම්වරුන්ව පත් කළේය.

මුහම්මද් (ﷺ) තුමාගේ ශ්‍රේෂ්ටත්වය මුස්ලිම් විද්වතුන් පමණක් නොව මුස්ලිම් නොවන විද්වතුන් ද පිලි ගන්නේය. කිතුනුවකු වන මයිකල් එච් හාට් විසින් පල කොට ඇති "100 most influential people in the world" යන කෘතිය තුල මුලින්ම සඳහන් වන්නේ මුහම්මද් (ﷺ) තුමාගේ නම වීම විශේෂත්වයකි. 

මුහම්මද් (ﷺ) තුමා කියැවීමට හෝ ලිවීමට දැන සිටියේ නැත. එබැවින් අල් කුරානය මුහම්මද් (ﷺ) තුමා විසින් සම්පාදිත කෘතියක් යැයි ඇතැමුන් පැවසීම බලවත් වරදකි. මෙම කරුණ මුස්ලිම් නොවන බොහෝ විද්‍යාඥයින් පවා සනාත කොට තිබේ. එම විද්‍යාඥයින් අතර මහාචාර්ය කීත් එල් මුවර් ප්‍රධාන තැනක් ගන්නේය. එසේම මහාචාර්ය මොරිස් බුකෛල් ඔහුගේ "The Qur’an, the Bible and Modern Science” යන කෘතියෙන්ද එම කරුණ තහවුරු කොට ඇත. මහාචාර්ය මොරිස් බුකෛල් සඳහන් කරන්නේ මුහම්මද් (ﷺ) තුමා ජීවත්වූ කාලය දෙස බලන කල කිසිසේත්ම අල් කුරානය වැනි කෘතියක් සම්පාදනය කල නොහැකි බවයි.

අල්ලාහ්ගෙන් දේව පණිවිඩ ලැබීමට පෙර එතුමා මක්කාව අසල පිහිටි හිරා නම් ගල් ගුහාවකට ගොස් හුදකලා ජීවතයක් ගත කළේය. එසේ සිටින සමයේදී මුල්ම දේව පණිවිඩය ජිබ්‍රිල් නම් දේවදුතයා විසින් ඔහුට ගෙනවිත් දෙන ලදී. ඉන් පසුව ක්‍රමක් ක්‍රමයෙන් වසර 23ක් පුරාවට මුළු කුරානයම පහළ විය. 

මුහම්මද් (ﷺ) තුමාගේ වයස 25 දී ඔහුට වඩා වයසින් මුහුකුරා ගිය දෙවරක් වැන්දඹු භාවයට පත්ව සිටි කදිජා තුමිය සමග සරණ පාවා ගත්තේය. කෙසේ වෙතත් එම විවාහය ඉතා සාර්ථක එකක් විය. ඒ අනුව නබිතුමා කදිජා තුමිය ජිවතුන් අතර සිටින තාක් වෙනත් විවාහයක් සිදු කර ගත්තේ නැත. නබිතුමාගේ එම විවාහයෙන් පිරිමි දරුවන් දෙදෙනෙකු  සහ ගැහැණු දරුවන් සිව් දෙනෙකු බිහි විය. එම පිරිමි දරුවන් දෙදෙනා කුඩා කාලයේදීම කළුරිය කළෝය. ෆාතිමා හැර අන් සියලුම ගැහැණු දරුවන්ද නබිතුමා ජිවතුන් අතර සිටින කාලයේදීම කලුරිය කළෝය. නබිතුමාගේ වයස 53 දී කදිජා තුමියද කලුරිය කළාය. ඉන් පසු නොයෙකුත් හේතුන් මත නබිතුමා විවාහයන් එකොළහක් සිදු කර ගත්තේය. ඔවුන් අතරින් අයිෂා රලි තුමිය හැර අන් සියලුම දෙනා වැන්දඹු කාන්තාවන් වීම විශේෂත්වයකි.

නබිතුමාගේ ජිවිත කාලය තුලදී සිදුවුණු සුවිශේෂී දෙයක් වන්නේ මිහ්රාජ් ගමනයි. එනම් අහස් සිසාරා අල්ලාහ් වෙත ගොස් නැවත පැමිණීමයි. මෙවැනි ගමනක් වෙනත් කිසිම නබිවරයෙකුට ලැබී නැත. එම ගමනේදී නබිතුමා අහස් හතක් පසුකරගෙන ගොස් ඇති අතර එක් එක් අහසේදී මෙලොවට පැමිණ මිය ගිය නබිවරුන්ව මුණ ගැසී ඇත. අවසානයේදී අල්ලාහ් වෙත ගොස් තිබේ. එම ගමනේදී ඔහු ස්වර්ගය සහ නිරයද දැක තිබේ. එම ගමන අවසාන කොට නැවත හැරී එන විට පංච කාල සලාතය පිලිබඳ නියෝගය රැගෙන ආවේය. මෙම ගමන නබිතුමා විසින් සිදු කල ප්‍රාතිහාරයක් බැවින් අපගේ බුද්ධියෙන් එම ගමන සිදු කළ අකාරය ගැන තේරුම් ගැනීමට නොහැකිය. කෙසේ වෙතාත් එකල සිටි මුස්ලිම් නොවන කුරෛෂ්වරුන් විසින් නබිතුමාගෙන් අසන ලද ප්‍රශ්න සියල්ලටම පිළිතුරු ලබා දීම නිසා ඔවුන්ට කිසිවක් කර කියා ගත නොහැකිව නිරුත්තර වී තිබේ. 

අල් කුරානය මුහම්මද් නබි (ﷺ) තුමාට පහළ කරන ලද අවසාන දේව ග්‍රන්ථය වන අතර එහි විවරණය ලෙස සැලකෙන්නේ මුහම්මද් නබි (ﷺ) තුමාගේ හදිස් ය. මුහම්මද් නබි (ﷺ) තුමාගේ සම්ප්‍රාප්තියෙන් පසු ස්වර්ගය අත්කර ගැනීමට මාර්ගය පෙන්වා දෙනු ලබන්නේ කුරානයෙන් සහ නබිතුමාගේ මග පෙන්වීම තුලින් ය.

By Fasy Ajward.B.Sc (PhysicsSp)Hons.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path