ඉස්ලාමයට පිටුපෑමේ ප්‍රතිවිපාක මොනවාද? (What are the consequences of turning away from Islam?)

ඉස්ලාමයේ වැදගත්ම අවශ්‍යතාවය වන්නේ අල්ලාහ් හැර වෙනත් දෙවි කෙනෙකු නැති බවට සාක්ෂි දැරීමය. ඒ බව දැන දැනත් කෙනෙක් ඊට පිටු පාන්නේ නම් මෙම කුර්ආන් වැකිය අනුව ඔහුව මතු ජීවිතයේදී අන්දයෙකු ලෙස නැගිටවනු ලැබේ. "කවරෙක් මාගේ උපදේශය ඉවතලීම් කරයිද නියතව ඔහුට දුෂ්කර ජිවිතයක් ඇත. තවද අපි ඔහුව මතු ලොවේදී අන්ධයෙකු ලෙස නැගිටවන්නෙමු. (එවිට ඔවුන් මෙසේ පවසනු ඇත) මාගේ සමිඳුනි පෙනීම ඇත්තෙකුව සිටි මාව නුඹ, අන්ධයෙකු ලෙස නැගිට්ටෙව්වේ මන්දැ'යි අසන්නේය. (එවිට) කවරෙක් සීමාව ඉක්මවා, තම සමිඳුන්ගේ වැකි විශ්වාස නොකළේද, ඔහුට අපි මේ අන්දමටම කුලිය ලබා දෙන්නෙමු'යි පවසන්නෙමු. එලොවෙහි දඬුවම වඩාත් දැඩිද, ස්ථිරද වේ" (කුරානය 20:124-127).

මිනිසාට සත්‍යය පහදා දීම සඳහා බොහෝ නබිවරුන් මේ ලෝකයට පැමිණියෝය. එම නබිවරුන් පැවසුවේ අල්ලාහ්ගේ ඒකීයත්වයයි. එහෙත් ඇතැම් නබිවරුන්ගේ අනුගාමිකයින් අල්ලාහ්ගෙන් පහළ වූ ඇතැම් කරුණු වසම් කළෝය. මේ හේතුවෙන් එම දහම ප්‍රචාරය කල නබිවරුන්ගෙන් පසු පැමිණි අලුත් නබිවරයාව එම ජනතාව විශ්වාස කොට අනුගමනය කලේ නැත. උදාහරණයක් ලෙස යුදෙව්වන් ජේසු තුමාව හෝ මුහම්මද් තුමාව නබි කෙනෙක් ලෙස පිළිගත්තේ නැත. එසේම කිතුනුවන් මුහම්මද් තුමාව නබිවරයෙකු ලෙස විශ්වාස කළේද නැත. එහෙත් මුසා නබිතුමාට පහළ වූ ආගම් පුස්තකයේද ජේසු තුමාට පහළ වූ ආගම් පුස්තකයේද මුහම්මද් නබිතුමාගේ පැමිණීම ගැන සඳහන් කොට තිබේ. මේ හේතුවෙන් එක් ජන කොට්ටාසයක් අල්ලාහ්ගේ කෝපයට පත්වූ අතර තවත් ජන කොට්ටාසයක් නොමග ගියෝය. මෙම කරුණ අල් කුරානයේ ඇති පළමු පරිජ්ජෙදයේ සඳහන් කොට ඇත. 

මුසා නබිතුමාට තව්රාත් දහම් පුස්තකයත් ජේසු තුමාට ඉන්ජිල් දහම් පුස්තකයත් පහළ කල අල්ලාහ් මුහම්මද් නබි තුමාට කුරානය පහළ කළේය. කුරානයෙන් ඊට පෙර පහළ කරන ලද දහම් පණිවිඩවල ඇති කරුණු නැවත නැවතත් තහවුරු කරන අතරම ඉස්ලාම් දහම් පණිවිඩය ඉන් සම්පුර්ණ කරන්නේය. ඒ අනුව මුහම්මද් නබිතුමාගෙන් පසු වෙනත් නබිවරයෙකු පහළ නොවන අතර කුරානය ලොව අවසානය දක්වා මිනිසාට යහ මග පෙන්වන්නේය. 

ඉස්ලාම් දහමින් අංග සම්පුර්ණ ජිවන ක්‍රමයක් පෙන්වා දෙන්නේය. එය පිළිපැදීම මිනිසාගේ වගකීමකි. කෙසේ වෙතත් ඉස්ලාම් දහමෙහි බල කිරීමක් නැත. 

යම් කෙනෙක් ඉස්ලාම් දහම වැළඳ ගන්නේ නම් පරීක්ෂාවන්ට මුහුණ දීම සඳහා සුදානම් විය යුතුය. ඉස්ලාම් දහම දේශනා කල නබිවරුන් සහ ඔවුන්ගේ අනුගාමිකයින් පවා ඉස්ලාම් දහම වෙනුවෙන් නොයෙකුත් අන්දමේ පරීක්ෂාවන්ට මුහුණ පා තිබේ. එම කරුණ මෙම කුර්ආන් වැකිය තුල දැක ගත හැකිය. "(විස්වාසවන්තයෙනි!) ඔබට පෙර ජිවත් වූ අය මුහුණ දුන් (දුෂ්කර) තත්වයන් ට ඔබද මුහුණ නොදී ස්වර්ගයට ඇතුළු වීමට හැකි වෙතැයි ඔබ සිතන්නෙහිද? ඔවුන් කුසගින්නෙන් සහ ලෙඩදුක් වලින් වේලි සිටියදී (ඔවුන් පසුතැවිලි වී තමන්ගේ අමාරුකම් වලින් මිදීමට) 'අල්ලාහ්ගේ පිහිට කවදා (ලැබෙන්නේද? කවදා ලැබෙන්නේදැ'යි) කීමට තරම් (දුක් කම්කටොළු වලින් පෙළුනහ) "දැන ගනු! ඇත්තෙන්ම අල්ලාහ්ගේ පිහිට ඉතාමත් සමීපව ඇත්තේ යැ"යි (දැනුම් දෙන තුරු ඔවුහු ඉතාමත් කම්පාවට පත් වුහ)" (කුරානය 2:214).

ඇතැමුන්ව අල්ලාහ් කෙලින්ම පරික්ෂා කරන අතර ඇතැමුන්ගේ දැතින් කරන වැරදි නිසා ඔවුන් පරීක්ෂාවන්ට ලක් වන්නේය. මෙම කුර්ආන් වැකිය තුලින් ඒ බව දැක ගත හැකිය. "මිනිසුන්ගේ අත් උපයාගත් දේ හේතුවෙන් ගොඩබිමෙහිද මුහුදෙහිද කළහ ඇතිවී තිබේ. ඔවුන් (පාපයෙන්) ආපසු හැරීම සඳහා ඔවුන් කළ දේහි සමහරක්ව ඔවුන්ට විඳීමට සැලැස්වීම පිණිස (මේ අන්දමින් සෝදිසි කරන්නෙමු)" (කුරානය 30:41).

ඉස්ලාම් දහම අනුව ජිවත් වීමේදී නොයෙකුත් අන්දමේ ප්‍රශ්න වලට මුහුණ පැමට සිදු වන බව මෑත ඉතිහාසයේ අප විසින් දැක ඇත. ඒ අනුව එක් අවස්තාවකදී මුස්ලිම් කාන්තාවන්ගේ මුහුණු ආවරණයටද තවත් අවස්ථාවකදී ඔවුන්ගේ ඇඳුම් වලටද තවත් විටකදී හලාල් සහතිකයටද තවත් විටකදී මුස්ලිම් බැංකු වලටද විරුද්ද වෙමින් ප්‍රශ්න ඇති කරන ලදී. අල්ලාහ් කෙරෙහි දැඩි විශ්වාසයක් තිබෙන කෙනක් එවැනි දේවල් වලට විශ්වාසයෙන් යුතුව මුහුණ දුන්නේ නම් මතු ජීවිතය ජය ගත හැකිය.

By Fasy Ajward. B.Sc (PhysicsSpecial) Hons,Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/