අල්ලාහ් කවුද? (Who is Allah?)

විශ්වය සහ එහි ඇති සියලුම දේවල් මවා පාලනය කරන්නේ අල්ලාහ් ය. ඔහුට ආරම්භයක් හෝ අවසානයක් නැත. ඔහු හැර නැමදීමට සුදුසු වෙන කිසිවෙකු නැත. අල් කුරානයේ අල්ලාහ්ව මෙසේ විස්තර කොට ඇත. "පවසනු! අල්ලාහ් එක් කෙනෙකි. අල්ලාහ් (කිසිම) අවශ්‍යතාවයක් නොමැත්තා ය. ඔහු කිසිවෙකුව ප්‍රසුත කලේ නැත. (එසේම) ඔහු කිසිවෙකුගෙන් ප්‍රසුත වුයේද නැත. තවද, ඔහුට සමාන වෙනත් කිසිවෙකුද නැත" (කුරානය 112; 1-4). අල් කුරානයේ තවත් තැනක අල්ලාහ් ගැන මෙසේ දැක්වේ. "(සත්‍ය ලෙසම) නැමදීමට සුදුස්සා අල්ලාහ් හැර වෙන කිසිවෙකු නැත. ඔහු නිත්‍යය ජීවමානය සදාකාලිකය. මද නින්ද හෝ තද නින්ද හෝ ඔහුව නොඅල්වන්නේය. අහස්හි ඇති දේද පොළොවෙහි ඇති දේද ඔහුටම හිමිය. ඔහුගේ අනුමැතිය නොමැතිව ඔහු හමුවෙහි කවරෙකුට හෝ මැදිහත් විය නොහැක. (මැවුම් වන) ඔවුන්ට පෙර ඇති දේද ඔවුන්ට පසු ඇති දේද ඔහු හොඳින් දන්නේය. ඔහු මනාප වූ දේ හැර, ඔහු දැන සිටින දෙයින් කිසිවක් ඔවුන් විසින් දැනගත නොහැකිය. ඔහුගේ 'කුර්සි' අහසෙහිද පොළොවෙහිද ව්‍යාප්තව පවතින්නේය. ඒ දෙකම ආරක්ෂා කිරීම ඔහුට අපහසුවක් නොවේ. ඔහු වඩාත් උතුම් කෙනාද මහඟු බව ඇත්තාද වේ" (කුරානය 2:255). මෙම ගුණාංග අල්ලාහ්ට හැර අන් කිසිවෙකුට අයත් නොවේ. එබැවින් සාස්තෘවරුන් හෝ නබිවරුන් හෝ පිළිම හෝ අල්ලාහ්ගේ තත්වයට පත් වන්නේ නැත.

ඉහත සඳහන් අර්ථ දැක්වීම අනුව ජේසු තුමා දෙවියන් හෝ දෙවියන්ගේ පුත්‍රයෙකු හෝ නොවේ. එහෙත් කුරානයට අනුව ජේසු තුමා අල්ලාහ්ගේ ශ්‍රේෂ්ඨ නබි වරයෙකි. එතුමා කන්‍යා මරියම් තුමියගේ කුසින් උපත ලැබුවේය. මේ හේතුවෙන් ජේසු තුමාට ආරම්භයක් තිබේ. එසේම ඔහුට උපතක් තිබේ. තවද ජේසු තුමා අනෙක් මිනිසුන් මෙන් අහාර අනුභව කළේය. මිනිසුන්ගේ තාඩන පීඩන වලට ගොදුරු විය. එහෙත් අල්ලාහ්ට උපතක් හෝ විපතක් නැත. අල්ලාහ් කිසිවෙකුගේ බලපෑම් වලට යටත් වන්නේද නැත. 

නබිතුමා පවසා ඇති පරිදි අල්ලාහ්ට අලංකාර නම් 99ක් තිබේ. මේ ඕනෑම නමකින් අල්ලාහ්ට ආමන්ත්‍රණය කල හැකිය. එම නම් වලින් කිහිපයක් මෙහි සඳහන් කොට ඇත. 'අර්රහ්මාන් (الرحمن)' මින් කියවෙන්නේ අල්ලාහ් අසීමිත කරුනාවන්තයා බවයි. 'අර්රහිම් (الرحيم)' මින් කියවෙන්නේ ඔහු අසීමිත දයාවන්තයා බවයි. "අල්-කාලික් (الخالق)" ඉන් කියැවෙන්නේ නැති දෙයකින් අළුත් දෙයක් නිර්මාණය කරන්නා බවයි. "අල්-මුසව්විර් (المصور)" යන්නෙන් ඔහු රූ සකසන්නා බව කියැවේ. 'අර්රzස්සාක් (الرزاق)' යන්නෙන් ඔහු සෑම ජිවියෙකුටම අහාර ලබා දෙන්නා බව කියවේ. 'අල්මලික් (الملك)' යන්නෙන් ඔහුගේ ආධිපත්‍යය ගැන කියැවේ. 'අල්කුද්දුස් (القدوس)' යන්නෙන් ඔහුගේ පාරිශුද්ධත්වය කියවේ. 'අල්බසීර් (البصير)' යන්නෙන් ඔහු සියලුම දේ හොඳින් නිරීක්ෂණය කරන්නා බව පැවසේ. 'අස්-සමියි (السميع)' යන්නෙන් ඔහු සියලුම දේට ඇහුම්කන් දෙන්නා බව පැවසේ. 'අල් වහ්හාබ් (الوهاب)' යන්නෙන් ඔහු සෑම කෙනෙකුගේම උවමනාවන් ඉටු කරන්නා බව කියැවේ. "අස්සබුර් (الصبور)" යන්නෙන් ඔහු අතිශයින්ම ඉවසිලිවන්තයා බව පැවසේ. "අල් ගෆ්ෆාර් (الغفار)" යන්නෙන් ඔහු අතිශයෙන්ම සමාව දෙන්නා බව පැවසේ. මේවාට අමතරව තවත් නම් ඔහුට ඇත. විනිශ්චය දිනයේදී අධිපති අල්ලාහ්ය. අල් කුරානයේ එක් පරිජේදයක් හැර අන් සෑම පරිජ්ජෙදයක්ම ආරම්භ වන්නේ 'අර්රහ්මාන් (الرحمن)' සහ 'අර්රහිම් (الرحيم)' යන නම් වලින් ය. 

ඇතැම් අය අල්ලාහ් වෙනුවට සොබා දහම ආදේශ කරන්නේය. එහෙත් සොබා දහම යනු අල්ලාහ් දෙවිඳුන් විශ්වය මැවීමෙන් පසු ඒ මත පනවන ලද ඔහුගේ නියෝගයන් වේ. උදාහරණයක් ලෙස පස මත දමන ලද බීජයකින් පැලයක් හට ගන්නේ අල්ලාහ්ගේ නියෝගය අනුව ය. කාලගුණය වෙනස් වන්නේද රැදවල් ඇති වන්නේද ඔහුගේ නියෝගය අනුව ය. එසේම සාගරයේ විශාල නැව් පාවෙන්නේ ඔහුගේ නියෝගය අනුවය. එලෙසම, සොබාදහමේ ඇති සෑම සන්සිද්ධියක්ම ඔහුගේ නියෝග වේ.

විශ්වයේ මැවුම්කරු වන අල්ලාහ් ගැන දැනගැනීම සෑම කෙනෙකුගේම වගකීමකි. ඔහු මිනිසාව සහ ජින්වරුන්ව මවා ඇත්තේ ඔහුට නැමදීම සඳහාය. "මා ජින්වරුන්ව සහ මිනිසුන්ව, මාව නැමදීමට හැර මැව්වේ නැත" (කුරානය 51:56). (ජින්වරුන් යනු ගින්නෙන් මවා ඇති ජීවියෙකි. ඔවුන්ටද මිනිසාට මෙන් ස්වයං තීරණ ගැනීමට හැකිය). මිනිසා අල්ලාහ් ගැන දැනගෙන නොසිටීම ඔහු තම මැවුම්කරු ගැන දැනගෙන නොසිටිමකි. කෙසේ වෙතත් ලෞකික ජීවිතය අවසාන කිරීමෙන් පසු සෑම ජීවියෙකුම අල්ලාහ් වෙතම යා යුතු ය. මිනිසාගේ අවසානය තීරණය වන්නේ ඔහු දෙන තීන්දුව මත ය. එය සාර්ථක වීමට නම් අල්ලාහ්ව විශ්වාස කොට ඔහු පෙන්වා දී ඇති යග මාර්ගය පිළිපැදිය යුතු ය.

By Fasy Ajward.B.Sc(PhysicsSpecial)Hons.Japura.
Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path