අසල්වැසි ප්‍රේමය පිළිබඳ ඉස්ලාමීය ඉගැන්වීම් (Islamic Teachings on Neighbourly Love)
.jpg)
නවීන සමාජය ගත්කල නොයෙකුත් හේතුන් මත අසල්වැසි ප්‍රේමය ගිලිහෙමින් පවතී. එහෙත් ඉස්ලාම් දහම එය අනුමත කරන්නේ නැත. මේ හේතුවෙන් ඉස්ලාම් දහම තුල අසල්වැසි ප්‍රේමය ස්වර්ගය අත්කර ගැනීමෙහිලා ඉතා වැදගත් කාර්ය භාරයක් ඉටු කරයි. අසල්වැසියා කව්රුන් වුවත් ඔහු වෙනුවෙන් යුතුකම් කොටසක් ඉටු කල යුතු වේ. එක් නබි වදනක මෙසේ දැක්වේ. “තම හිංසනයෙන් තම අසල්වැසියා ආරක්ෂා නොවේ නම් ඔහු විස්වාසවන්තයෙක් නොවේ” (තිර්මිසී 4994). තවත් නබිවදනක මෙසේ දැක්වේ. "අල්ලහ්ව සහ අවසාන දිනය විස්වාස කරන්නන් තම අසල්වැසියා වෙනුවෙන් නිර්ලෝභී විය යුතු ය". (අල්-මුඅත්තා 49:22). තවත් නබිවදනක මෙසේ දැක්වේ. "ඥාතින් සමග ආරවුල් ඇතිකරගෙන ජිවත් වන තැනැත්තා ස්වර්ගයට යන්නේ නැත" (මුස්ලිම් 6199).
අසල්වැසියා තමන්ගේ ඥාතියෙක් වන විට ඔහු වෙනුවෙන් ඇති යුතුකම් තුන් වැදෑරුම් වන අතර ඔහු මුස්ලිම්වරයෙකු වන්නේ නම් එය දෙවැදෑරුම් වේ. එසේම ඔහු කුමන ජාතියකට හෝ අයත් වන්නේ නම් ඔහු වෙනුවෙන් එක් යුතුකමක් තිබේ.
කිසිම අවස්ථාවකදී තම අසල්වැසියාට හිංසා පීඩන සිදු නොකළ යුතුය. එසේ තිබියදී ඇතැම් උදවිය තම කුණු කසල තම අසල්වැසියන්ගේ නිවස ඉදිරිපිට තබන්නේය. තවත් සමහරු අපතේ යන ජලය අසල්වැසි නිවසේ වත්ත වෙත මුදා හරින්නේය. ඉස්ලාම් දහම මේවාට තරයේ වැට බඳින්නේය. එපමණක් නොව තම නිවසේ ඇති ගුවන් විදුලියේ හඬ පවා අසල්වැසියාට හිරිහැරයක් නොවිය යුතුය.
ඇතැම් උදවිය තම අනිවාර්‍ය හජ් වන්දනය ඉටුකළ පසුත් නැවත නැවත හජ් සහ උම්රා ඉටු කරන්නේය. අධික ලෙස මුදල් තිබේ නම් එසේ කලාට කම් නැත. එහෙත් ඔහු තම අසල්වැසියන්ට සහ ඥාතීන්ට ඉටු කල යුතු උදව් උපකාර පැහැර හරිමින් එසේ කරන්නේ නම් ඔහු එසේ කරන කාර්‍යය ප්‍රශ්න සහගත ය. ඇත්ත වශයෙන්ම කෙනෙක් පින් දහම් කරන විට වඩාත් වැදගත් දේවල් වලට ප්‍රමුඛ තාවය ලබා දිය යුතු වේ. බොහෝ අවස්ථාවලදී ඒ සඳහා විශාල මුදලක් සහ ශ්‍රමයක් අවශ්‍ය වන්නේ නැත. එහෙත් එවැනි ප්‍රයෝජනවත් දෙයක් කිරීම සඳහා හදවත සමග සටන් කල යුතු අතර බුද්ධිය ප්‍රයෝජනයට ගත යුතුව තිබේ. ඒ අනුව කෙනෙක් ඇතැම් වෛකල්පික ක්‍රියාවන් සඳහා යොදවන විශාල මුදලින් සුළු කොටසක් හෝ තම අසල්වැසියාගේ කුසගින්න නිවීමට හෝ එම දරුවන්ගේ පාසැල් ඇඳුම ලබා දීමට හෝ නැතහොත් ඔවුන්ගේ පොත් පත් ලබා දීමට හෝ යොදවන්නේ නම් ඉන් ලැබෙන පින ඉතා විශාලය. එය අල්ලාහ්ට සමීප වීමට හේතුවක් ද වේ.
සමහර උදවිය ප්‍රසිද්ධිය වෙනුවෙන් අප්‍රමාණව වියදම් කරන්නේය. එහෙත් ඉස්ලාම් දහම අනුව ඒවාට පින් ලැබෙන්නේ නැත. ඔවුන්ට ලැබෙන්නේ ලෞකික ජිවිතයේ තාවකාලිකව ප්‍රසිද්ධිය පමණි. මේ නිසා මරණය නියත බව තේරුම් ගත් තැනැත්තා කල යුත්තේ කෙළවරක් නැති ජීවිතය වෙනුවෙන් වැඩි වැඩියෙන් පින් එකතු කිරීම ය.
ඉස්ලාම් දහමෙහි විශේෂත්වය වන්නේ මිනිස් ජීවිතය නිවැරදි මාර්ගයට ගෙන ඒම සඳහා බොහෝ නීති රීති පනවා තිබ්මයි. ඒ අනුව මත්පැන්, සිගරට්, සංගීත සංදර්ශන වැනි දේවල් මුස්ල්ලිම්වරුන්ට සම්පුරණයෙන්ම තහනම් වේ. එවැනි වැරදි ක්‍රියාවන් මුලික කරගනිමින් අසල්වැසි සම්බන්දයන් පැවැත්වීම සපුරා තහනම් වේ. තම අසල්වැසියා යම් වැරැද්දක් කරන්නේ නම් එය වැළැක්වීම සඳහා උපදෙස් දීම මුස්ලිම්වරයෙකුගේ පරම යුතුකමකි. එවැනි දෙයක් කිරීමට ශක්තිය නොමැති නම් එම වැරැද්දෙන් වැලකී සිටිය යුතුය. අවම තරමින් ඔහු කරන වැරැද්ද පිළිකුල් කල යුතුය.
By Fasy Ajward
Comments
Post a Comment