ඔබට ආගමක් අවශ්‍ය ඇයි? (Why do you need a religion?)
ඇතැම් අය ආගමට මුල් තැන ලබා දෙද්දී තවත් සමහරු ලෞකික දේවල් වලට ප්‍රමුඛතාවයක් ලබා දෙන්නේය. ඊට හේතුව ලෞකික ජීවිතය මායාවක් බව ඔවුන් දැනගෙන නොසිටිමය. මේ හේතුවෙන් කුඩා අවදියේදී කෙලි සෙල්ලමේ කාලය ගත කිරීමටත් ඉන් පසු තම හපන්කම් ගැන පුරසාරම් දෙඩවීමටත් ඉන් පසු ලෞකික දේවල් වලට ඇලුම් කිරීමටත් යොමු වන්නේය. එහෙත් කිසිම කෙනෙක් සදා කල් ජිවත් වන්නේ නැත. තවද රැදවල් නොබලා ඔවුන් හම්බ කල දේවල් මරණයත් සමග එහා ලෝකයට ගෙන යන්නේද නැත.
යම් උපකරනයෙක් සෑදීමේ අරමුණ දැනගත හැක්කේ එහි නිෂ්පාදකයාගෙන් ය. එසේම මිනිස් ජිවිතයේ සැබෑ අරමුණ දැනගත හැක්කේ මිනිසාගේ මැවුම්කරුගෙන් ය. එය කල හැකි වන්නේ දෙවියන් පහළ කරන ලද නිවැරදි ආගමක් තුලින්ය.
ලෝකයේ බොහෝ ආගම් තිබුනත් ඒවායින් බොහොමයක් කාලයාගේ ඇවෑමෙන් වෙනස්කම් වලට භාජනය වී තිබේ. මේ හේතුවෙන් එවැනි ආගමක් පිලිපැදීමෙන් තම අරමුණ කරා ලඟා විය නොහැක. මේ හේතුවෙන් කෙනෙක් පිළිපැදිය යුත්තේ කිසිම වෙනසකට ලක් නොවූ ආගමකි. අද එවැනි දහමකට ඇත්තේ කුරානය පමණි.
අල් කුරානය මෙලොවට පහළ වූ අවසාන දේව පණිවිඩය වේ. එය පාර්ලිමේන්තුවකින් සම්මත කර ගත් අවසාන ව්‍යවස්ථාවට උපමා කල හැකිය. අල් කුරානයේ තිබෙන විශේෂත්වය වන්නේ එය දෙවියන්ගෙන් පහළ වූ බවට ප්‍රමාණවත් සාක්ෂි ඒ තුලින්ම සොයා ගත හැකි වීමයි. ඒ අනුව එහි සත්‍යතාවය තහවුරු කල හැකි වේ.
අල් කුරානයෙන් ලෞකික ජීවිතය ගැනත් මතු ජීවිතය ගැනත් විස්තර කොට තිබේ. එහි ඇති දේවල් මුහම්මද් නබි තුමා සහ ඔහුගේ අනුගාමිකයින් විසින් ක්‍රියාවට නංවා තිබේ. මේ හේතුවෙන් කුරානය මිනිසාට අනුගමනය කල හැකි ග්‍රන්ථයක් බව සනාථ කල හැකිය.
අල් කුරානය තුල විශ්වයේ ආරම්භය ගැනද එහි අවසානය ගැනද මිනිස් ජිවිතයේ ආරම්භය ගැනද එහි අවසානය ගැනද විස්තර කොට ඇත. තවද එහි විශ්වයේ අධිපති දෙවියන් ගැන මනාව විස්තර කොට තිබේ. මේ නිසා කුරානය පිලිපැදීමෙන් දෙවියන් ගැන නිවැරදිව දැනගෙන ඔහුට පමණක් නැමදීමට හැකියාව ලැබේ. මිනිසා කොපමණ පින් දහම් කලත් ඒවාට වටිනාකමක් ලැබෙන්නේ දෙවියන් කෙරෙහි තබා ඇති විශ්වාසය මතය. මේ හේතුවෙන් පින් දහම් කිරීමේදී නිවැරදිව දෙවියන් ගැන දැනගෙන ඔහු කෙරෙහි පමණක් විශ්වාසය තැබිය යුතුය.
මිනිසාට ලෞකික සම්පත් දෙවියන්ගේ මනාපය පරිදි ලබා දෙන්නේය. ඒවා ලබා දීමට දෙවියන්ව විශ්වාස කිරීම කොන්දේසියක් නොවේ. උදාහරණයක් ලෙස පාරාවෝ හට රජකම ලබා දී තිබුනේ ඔහු දෙවියන්ව ප්රතික්ෂේප කොට තිබියදීය. මේ නිසා කෙනෙකුට අසීමිත ලෙස වස්තුව ලැබීම ඔහුගේ නියම ජයග්‍රහණයක් නොවේ. නියම ජයග්‍රහණය විය යුත්තේ නිමක් නැති ස්වර්ගය අත්කර ගැනීමය.
ඇතැම් නබිවරුන්ගේ ලඟම ඥාතීන්ට පවා නිවැරදි මග අත්කර ගැනීමට හැකි වුයේ නැත. ඊට හේතුව ඔවුන්ට එය අවශ්‍ය නොවීමයි. එවැනි අයට දෙවියන්ද නිවැරදි මග පෙන්වන්නේ නැත. උදාහරණයක් ලෙස නුහ් නබිතුමාගේ භාර්යාව හෝ ඔහුගේ පුතා දෙවියන්ව විශ්වාස කලේ නැත. එසේම ඉබ්‍රාහිම් තුමාගේ පියා දෙවියන් වෙනුවට පිළිමවලට වඳ පුදා ගත්තේය. තවද ලුත් නබිතුමාගේ භාර්යාව නිවැරදි මාර්ගය ප්රතික්ෂේප කළාය. මේ හේතුවෙන් ඔවුන් නබිවරුන්ට නෑකම් කීවත් නිරයට යන්නේය. කෙසේ වෙතත් නිවැරදි මාර්ගය සොයන්නාට එය පෙන්වා දීම සඳහා දෙවියන් බැඳී සිටින්නේය.
කෙනෙක් දෙවියන් අනුමත කල නිවැරදි ආගමක් පිළිපැද්ද පමණින් ලෞකික ජීවිතය සුර ලොවක් වන්නේ නැත. මේ නිසා දෙවියන් පෙන්වා ඇති මාර්ගයේ ගමන් කරන බොහෝ අය නොයෙකුත් පරීක්ෂාවන්ට මුහුණ දී තිබේ. උදාහරණයක් ලෙස ජේසුස් වහන්සේට ජිවිත කාලය පුරා නිවසක් තිබුනේ නැත. මුහම්මද් නබිතුමා උපදින්නේම අනාත දරුවෙකු ලෙසය. ඔහු ජිවිත කාලය පුරා නොයෙකුත් ප්‍රශ්න වලට මුහුණ දුන්නේය. එසේම ඔහු මිය යන විට කිසිම දේපලක් ඉතිරිකර ගියේ නැත. මෙය ලෞකික ජිවිතයේ ස්වභාවය වේ.
ආගමක් අදහන තැනැත්තාගේ අරමුණ ලෞකික ජීවිතය ජය ගැනීම නොවේ. ඔහුගේ එකම බලාපොරොත්තුව විය යුත්තේ මරණයෙන් පසු ජීවිතය ජය ගැනීමයි.
By M. F. Ajward.
Twiter:- thetrue_path
Comments
Post a Comment