ඉස්ලාමයට අනුව දරුවන් සඳහා දෙමාපියන්ගේ වගකීම් ( Parental responsibilities for children according to Islam)

ඉස්ලාම් දහම අනුව දරුවන්ව නිවැරදි මාර්ගයට යොමු කිරීම ධාර්මික කටයුත්තකි. එය ආරම්භ කල යුත්තේ දෙමව්පියන් විසින්ම ය. මුල් අවදියේදී දරුවන් අධ්‍යාපනය ලබන්නේ වැඩිහිටියන්ගේ ක්‍රියාකාරකම් දෙස බැලීමෙන් බව විද්වතුන්ගේ මතය වේ. ළදරු කාලයේදී දෙමව්පියන් කරන සෑම දෙයකින්ම දරුවන් යමක් උකහා ගන්නේය. අල් කුරානයෙන් දෙමව්පියන් හට මෙසේ නියෝග කොට තිබේ. "ඔබගේ පව්ලේ උදවියට සලාතය අණ කරනු. ඔබද එය ඉවසීමෙන් රැක ගනු. ඔබගෙන් අපි අහාර නොඉල්ලන්නෙමු. අපිම ඔබට අහාර ලබා දෙන්නෙමු. හොඳ අවසානය බිය බැතිකම ඇති අයටම වේ"(කුරානය 20:132). මේ නිසා දෙමව්පියන්ගේ ප්‍රධාන වගකීමක් වන්නේ ළමයින්ට ඉස්ලාම් දහමේ ඇති විශ්වාසය සම්බන්ද කරුණු මෙන්ම ඉස්ලාමයේ අනිවාර්ය කරුණු කෙරෙහි යොමු කිරීම වේ. එසේම දෙමව්පියන්ද ඒවායේ ස්ථිරව සිටිය යුතුය. 

ළමුන්ට නිසි මග පෙන්වීමේ අවශ්‍යතාවය මෙම කුර්ආන් වැකියෙන් අවධාරණය කොට ඇත. "විශ්වාසවන්තයිනි! නුඹද නුඹගේ පව්ලේ උදවියද නිරයෙන් බේරා ගනු. එහි ඉන්දන මිනිසුන්ද ගල්ද වේ" (කුරානය66:6). ළමුන් නොමග යාමට දෙමව්පියන් හේතුවක් වන්නේ නම් මෙම කුර්ආන් වැකිය හොඳින් මතකයට ගත යුතුය. මේ නිසා තම දුවා දරුවන්ට ආදරය කරුණාව පෙන්නුවත් වේවැලකින් දඬුවම් කිරීමටද අමතක නොකළ යුතුය. අවම තරමින් දරුවන්ට පෙනෙන පරිදි නිවසේ වේවැලක් එල්ලා තැබිය යුතුය. 

නබිතුමාගේ හදිසයක දැක්වෙන අන්දමට සෑම කෙනෙකුම එඬේරෙකු වේ. සෑම එඬේරෙකුම තම පට්ටියට වග කිව යුතුය. එසේම සෑම කෙනෙකුම තම පව්ලේ අය ගැන වගකිව යුතුය. මේ හේතුවෙන් දෙමව්පියන් තම දරුවන්ට වයස 7 වන විට සලාතය පිළිබද පුහුණුව ලබා දීමට කටයුතු කල යුතුය. ඔවුන් ද එහි ස්තිරව සිටිය යුතුය. රමළාන් මාසයේදී උපවාස කිරීමට පුහුණු කල යුතුය. දෙමව්පියන්ද එහි ස්ථිරව සිටිය යුතුය.

අද අප සිටින කාලය දෙස බලන විට බොහෝ දුවා දරුවන්ට සමාජ ආශ්‍රයක් නැති තරම් වේ. එබැවින් එම දරුවන් ළඟම ඥාතින් පවා අඳුරන්නේ නැත. එහෙත් ඉස්ලාම් දහම අනුව නෑදෑයින් ට විශාල උරුමයක් තිබේ. නෑදෑයින් ගෙන් වෙන්ව සිටීම අල්ලාහ්ගේ කෝපයට හේතුවකි. අනෙක් අතට අසල්වැසියන් කුමන ආගමකට හෝ ජාතියකට අයත් වුවත් ඔවුන් සමග ආශ්‍රය කිරීමත් දහමේ කොටසකි. එබැවින් කුඩා අවදියේ සිටම එම පුහුණුව ලබා දීමට කටයුතු යෙදිය යුතුය.

ලංකාවේ පාසැල්වල මුස්ලිම් දරුවන් මුහුණ දෙන ප්‍රධාන ප්‍රශ්නයක් වන්නේ ආචාර කිරීම සම්බන්දයෙනි. බුදු දහම අනුව දෙමව්පියන්ට සහ ගුරුවරුන්ට හිස නමා හෝ දණගසා ආචාර කිරීම වරදක් නොවුනත් ඉස්ලාම් දහම අනුව එවැනි දෙයක් කල හැක්කේ අල්ලාහ්ට පමණි. එය ඉස්ලාම් දහමේ මුලික අවශ්‍යතාවයක් ද වේ. මේ ගැන මුස්ලිම් නොවන ගුරුවරුන් දැනුවත් වන්නේ නම් එය අගය කොට සැලකිය යුතුය. 

කුඩා අවදියේදී අල්ලාහ් කෙරෙහි බිය බැතිකමින් හැදී වැඩුනේ නම් ඔහු තනියෙන් සිටියත් කණ්ඩායම් සමග සිටියත් වැරදි කිරීමට පෙළඹෙන්නේ නැත. අල්ලාහ් තමන්ව බලා සිටින බව තරයේ විශ්වාස කරන බැවින් එම දරුවන් කිසි විටක මත්ද්‍රවය වලට හෝ වෙනත් වැරදි වලට ගොදුරු නොවනු ඇත. කෙසේ වෙතත් එවැනි දරුවන් බිහි කල හැක්කේ ඒ සඳහා අවශ්‍ය පරිසරය සහ  දැනුම කුඩා කාලයේදී ලබා දුන්නේ නම් පමණි. එබැවින් කුරානය අර්ථය නොදැන කියැවීමට පමණක් උගන්වන්නේ නැතුව එහි තේරුමත් සමග ඉගැන්වීමට කටයුතු කල යුතු ය. 

“ඔබගේ දෙවියන් ඔහුට පමණක් නමදින ලෙස ඔබට නියම කර ඇත. තවද ඔබ ඔබගේ දෙමව්පියන්ට  කෘතඥවිය යුතුය. ඔවුන් දෙදෙනාම හෝ එක්කෙනෙකු ඔබගේ ජිවිත කාලය තුල දී මහලු වියට පත් වූයේ නම් ඔවුන්ට අගව්රව වන ආකාරයේ කිසිම වචනයක් නොකියනු. ඔවුන් වෙත බැන නොවදිනු, ඔවුන්ට ගෞරවයෙන් ආමන්ත්‍රණ කරනු. ඔවුන් හට යටහත් පහත්ව නිහතමානීව කරුණාව දක්වනු. තවද පවසනු: මාගේ දෙවියනි, මා කුඩාකල සිට හදාවඩාගත් ඔවූන් වෙනුවෙන් ඔබගේ කරුණාව දක්වනු මැනව” (කුරානය 17:23,24).   

නබිතුමාගේ හදිසයක මෙසේ දැක්වේ. “අබ්දුල්ලා ඉබ්නු මසුද් රලි තුමා පවසන වගනම්: මා නබිතුමාගෙන් හොඳම පින (virtue) කුමක්දැය් ඇසුවෙමි. එවිට නබිතුමා, “සලාතය ප්‍රමාදයෙන් තොරව එයට නියමිත වෙලාවේදී ඉටුකිරීම” යනුවෙන් පැවසුවේය. ඉන්පසු හොඳම පින කුමක්දය් මා නබිතුමාගෙන් නැවත ඇසුවෙමි. එවිට නබිතුමා, “දෙමාපියන්ට හොඳින් සැලකීම සහ ඔවුන්ට කීකරු වීම” යනුවෙන් පැවසුවේය. ඉන්පසු ඇති හොඳම පින කුමක්දැයි නැවත ඇසුවෙමි. එවිට නබිතුමා, “අල්ලාහ් වෙනුවෙන් ජිහාද් කිරීම” යනුවෙන් පැවසුවේය. ඉන් එහා කිසිවක් මා නබිතුමාගෙන් ප්‍රශ්න කලේ නැත. මා තවත් ප්‍රශ්න අසා තිබුනේ නම් නබිතුමා ඒවාටත් පිළිතුරු දෙනු ඇත”. 

තම දරුවන් කුඩා කල දහම් මඟ පෙන්වීම් ලබා නොදී ලෞකික දේට මුල් තැන දුන් බොහෝ මවුපියන් වියපත් වූ පසු දුකට පත්වන අයුරු දැකගත හැකිය. ඊට හේතුව දෙමව්පියන්ගේ වටිනාකම කුඩා කාලයේදී ඔවුන් හ‍ට නොලැබීමය. සමහර දරුවෝ ලොකු වු පසු දෙමව්පියන්ට ඉතාම නින්දිත ආකාරයට සලකන අවස්ථා ඕනෑ තරම් අහන්න දකින්න තිබේ. එම වරදට වග කිව යුත්තේ කුඩා කාලයේදී ළමුන් වෙනුවෙන් නිසි ආගමික දැනුම ලබා නොදුන් දෙමව්පියන්ම ය.

By Fasy Ajward. B.Sc (PhysicsSpecial) Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/