ඉස්ලාම් ආගමට අනුව නැකැත් තිබේද? (Are there lucky times according to Islam?)

ඉස්ලාම් දහම ගොඩ නැගී තිබෙන්නේ අල්ලාහ් කෙරෙහි තබා ඇති අචල විශ්වාසය මතය. විශ්වය තුල සිදු වීමට නියමිත සෑම දෙයක් ගැනම දැනටමත් ලව්හුල් මහ්ෆුස් නමැති ලෑල්ලේ ලියා අවසානය. ඒ අනුව මිනිසාගේ දෛවය නොහොත් කලා කදර් ද ලියා අවසානය. එම ලියවිල්ලට අරාබි බසින් කලා කදර් යැයි කියනු ලැබේ. කලා කදර් ගැන විශ්වාස කිරීම මුස්ලිම්වරුන්ට අනිවාර්ය වේ. 

කෙනෙකුගේ දෛවය අල්ලාහ්ට මිස වෙනත් කිසිවෙකුට වෙනස් කල නොහැකිය. මේ නිසා මුස්ලිම්වරයෙකු කල යුත්තේ අල්ලාහ් කෙරෙහි පරිපුර්ණ විශ්වාසය තබමින් ජිවත් වීමය. එහෙත් මුස්ලිම් නොවන අය ග්‍රහ වස්තුන්ගේ පිහිටීම අනුව කෙනෙකුගේ දෛවය වෙනස්වන බව විශ්වාස කරති. එහෙත් ඉස්ලාම් දහමින් එම විශ්වාසය මුළුමනින්ම බැහැර කර තිබේ. එවැනි විශ්වාසයන් ඉස්ලාම් දහම අනුව අල්ලාහ්ට තවත් දෙයක් සමාන කිරීමක් ලෙස සලකනු ලැබේ. ඉස්ලාම් දහම තුල අල්ලාහ්ට සමානයන් තැබීම විශාල පාපයක් වන අතර එය සමාව දිය නොහැකි වරදක් ලෙස සලකනු ලැබේ. මේ හේතුවෙන් මුස්ලිම්වරුන් කිසිම හේතුවක් නිසාවත් නැකත් බලන්නේ නැත. කෙසේ වෙතත් මුස්ලිම් නොවන සමාජයන්හි විවාහ වීමේදී ද ගෙවල් පදිංචි වීමේදී ද ව්‍යාපාරයක් ආරම්භ කිරීමේදී ද වෙනත් වැදගත් කටයුතු වලදී ද නැකත් බලා සුබ මොහොතින් සිදු කරන්නේය. එය මුස්ලිම්වරයෙකුටත් මුස්ලිම් නොවන කෙනෙකුටත් අතර ඇති ප්‍රධාන වෙනකකි.

ඉස්ලාමිය විශ්වාසය අනුව සෑම ග්‍රහ වස්තූවක්ම අල්ලාහ්ගේ මැවීම් වේ. ඒවා අල්ලාහ් නියම කොට ඇති පරිදි විශ්වය තුල සැරිසරන්නේය. ඒවායේ පිහිටීම මිනිසාගේ අනාගතයට කිසිසේත්ම බල පාන්නේ නැත. එබැවින් ඒවායේ පිහිටීම අනුව කිසිවෙකුගේ දෛවය වෙනස් වන්නේ නැත. 

නැකත් බැලීම මිත්‍යා විශ්වාසයක් බව දැක ගත හැක්කේ නැකතට කරන බොහෝ දේවල් අසාර්ථක වීම දකින විටය. ඒ අනුව නැකතට කල ඇතැම් විවාහයන් දික්කසාදයෙන් කෙළවර වන්නේය. එසේම නැකතට කල ඇතැම් ව්‍යාපාර බංකලොත් වන්නේය. එහෙත් නැකතට නොකළ බොහෝ දේවල් සාර්ථක වන අවස්ථා අපට ඕනෑතරම් දැකිය  හැකිය. 

නබිතුමාගේ පුත් ඉබ්‍රාහීම් රලි තුමාගේ අභාවය සිදු වූ අවස්ථාවේදීම සුර්යග්‍රහනයක් සිදු විය. එය දැකීමෙන් ඇතැම් සහාබාවරුන් විශ්වාස කලේ එය නබිතුමාගේ පුත් ඉබ්‍රාහිම් තුමාගේ වියෝව නිසා සිදුව ඇති බවයි. කෙසේ වෙතත් එම කරුණ නබිතුමාට සැලවීමත් සමග ඔහු පැවසුවේ කිසිවෙකුගේ ඉපදීම නිසා හෝ මරණය නිසා හෝ සුර්යග්‍රහණයක් හෝ චන්ද්‍රග්‍රහණයක් සිදු නොවන බවයි.

ඉස්ලාම් දහම අනුව නැකත් බැලීම සහ සාස්ත්‍ර ඇසීම සපුරා තහනම් ය. නබිතුමාගේ හදිසයකට අනුව යම් කෙනෙක් සස්ත්‍ර කරුවෙකු හමුවීමට ගොස් ඔහු ලවා අනාගතයේදී සිදු වීමට යන දේවල් ගැන විමසා සිටියේ නම් ඔහුගේ දින හතලිහක සලාතය විනාශ වන්නේය (මුස්ලිම් 2230, අහමද් 4:68). තවත් හදිසයක සඳහන් වන ආකාරයට යම් කිසිවෙකු සාස්ත්‍ර කරුවෙකු වෙත යෑම හෝ එසේ ගොස් ඔහු කියන දේ විශ්වාස කිරීම නිසා ඔහු නබිතුමාට පහළ වූ දහම ප්‍රතික්ෂේප කල කෙනෙකු බවට පත් වේ (අබු දාවුද් 3904, තිරිමිසි 135, ඉබ්නු මාජා 639, අහමද් 2:408). 

මුස්ලිම්වරයෙකු සෑම විටම අල්ලාහ් කෙරෙහි විශ්වාසය තැබිය යුතුය. එහි අවසානය කුමක් වුවත් ඉවසීමෙන් භාර ගත යුතුය. කිසිම අන්දමකින් නරකක් සිදු වූ විට කාලයට දොස් නොපැවරිය යුතුය. හොඳ හෝ නරක අල්ලාහ්ගෙන්ම පැමිණෙන බව විශ්වාස කල යුතුය. 

By Fasy Ajward, B.Sc(PhysicsSpecial)HonsJapura.

Ex.Research officer at former Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twitter:-thetrue_path