ඉස්ලාමයේ දෙවන ප්‍රධාන කුළුණ වන සලාත් (Salat, the second main pillar of Islam)

සලාතය ඉස්ලාමයේ දෙවන අනිවාර්ය කුළුණ වේ. විශ්වය සහ එහි ඇති සියලුම දේවල් මැවූ අල්ලාහ් මිනිසාව සහ ජින්වරුන්ව මැව්වේ ඔහුට නැමදීම සඳහාය. ඒ අනුව අල්ලාහ්ව විශ්වාස කරන සෑම කෙනෙක්ම සලාතය ඉටු කල යුතුය. එමගින් කෙනෙකුගේ විශ්වාසයේ තරම තහවුරු කල හැකි වේ. එපමණක් නොව සලාතය මගින් කෙනෙකුගේ උවමනාවන් ඍජුවම අල්ලාහ් වෙත ඉදිරිපත් කිරීමට අවස්ථාව ලැබේ.

සලාතය ඉටු කිරීමෙන් මිනිසා මානසික සහ ශාරීරික ප්‍රයෝජන බොහොමයක් අත්කර ගන්නේය. එහෙත් අල්ලාහ්ට ඉන් කිසිම වාසියක් අත්වන්නේ නැත. ඇයිද යත් අල්ලාහ්ට කිසිවෙකුගේ උදව් උපකාර අවශ්‍ය නොවන නිසාය. 

සලාතය නිසිලෙස ඉටු කරන තැනැත්තාව පාපිෂ්ට ක්‍රියාවන්ගෙන් සහ ලජ්ජාශීලි දේවල්වලින් ආරක්ෂා කරන බව කුරානය මෙසේ සහතික කරයි. "සලාතය ස්ථාපනය කරන්න. නියතව සලාතය මගින් ලජ්ජාශීලි දේවල් වලින්ද පිළිකුල් සහගත දේවල් වලින්ද වළක්වන්නේය" (කුරානය 29:45). මේ නිසා සලාතය ඉටු කරන කෙනෙක් වැරදි කරන්නේ නම් ඔහුගේ සලාතයේ වැරැද්දක් ඇති බව කිව හැකිය. 

සලාතය ඉටු කිරීම නිසා කෙනෙකුගේ මානසික ආතතිය සැලකිය යුතු අන්දමින් අඩුවන අතර එමගින් ශාරීරික වියායාමයක් ද සිදු වන්නේය. එක් සලාතයක් ඉටු කිරීම සඳහා මස්ජිදය වෙත ඇවිද යාමටත් එය ඉටු කිරීම සඳහාත් ගත වන කාලය විනාඩි 20ක් ලෙස ගණන් බැලුවේ නම් පස්වේලා සලාතය වෙනුවෙන් විනාඩි 100ක් පමණ වැය වේ. එය අධ්‍යාත්මික ප්‍රයෝජනයට අමතරව ලැබෙන ප්‍රසාද දීමනාවක් ලෙස සැලකිය හැකිය. සලාතයේ ඉරුයව් නිසාද මොලයට අවශ්‍ය රුධිරය එම කාලය තුලදී වැඩියෙන් ලැබෙන්නේය. එය මොලයේ ක්‍රියා කාරිත්වයට ප්‍රයෝජනවත් වේ. 

සලාතය ඉටු කිරීමේදී කුරානයේ පළමු සුරාව වන ෆාතිහාව පාරායණය කිරීම අනිවාර්ය වේ. ෆාතිහා සුරාවේ සිංහල පරිවර්තනය පහත දැක්වේ. මෙම සුරාවෙන් අල්ලාහ්ගේ ගුණාංගයන් ගැන කියැවෙන අතර නිවැරදි මාර්ගය වෙත  යොමු කරන ලෙස අල්ලාහ්ගෙන් අයාචනා කරන්නේය. 

"අසීමිත කරුනාවන්තයාවුද අසම දයාවන්තයාවුද අල්ලාහ්ගේ නාමයෙන් (ආරම්භ කරමි). සියලු ප්‍රසංශා සකල ලෝකයම මවා පාලනය කරන්නාවූ අල්ලාහ්ටමය. (ඔහු) අසීමිත කරුනාවන්තයාය, අසම දයාවන්තයාය. විනිශ්චය දිනයෙහි අධිපති (ඔහුය). (ඕ අල්ලාහ්!) අපි නුඹවම නමදිමු. උඹගෙන්ම උදවු පතමු. නුම අපව ඍජු මගෙහි යවනු මැනව!. (එය) නුඹ කව්රුන් කෙරෙහි දායාදය පිරිනැමුවේද ඔවුන්ගේ මගය. (එය නුඹගේ) කෝපයට ලක්වුවන්ගේද නොමග ගියවුන්ගේද මඟ නොවේ" 

සලාතය ඉටුකරන තැනැත්තා අල්ලාහ් සමග ඍජුවම සම්භාෂණයේ යෙදෙන්නේය. මේ නිසා කෙනෙකුට යම් උවමනාවක් ඇති වූ විට රකාත් දෙකක් සලාතය ඉටු කිරීම මගින් ඍජුවම අල්ලාහ්ගෙන් තම උවමනාව ඉල්ලා සිටිය හැකිය. 

සලාතයේ නිසි පල නෙලා ගැනීමට නම් එය ඉටු කරන තැනැත්තා අල්ලාහ් හරාම් (තහනම්) කල දේවල්  වලින් වැලකී සිටීම ඉතා වැදගත් ය. ඇයිද යත් සලාතය ඉටු කරන අවස්ථාවේදී ඇඳ සිටින වස්ත්‍රය හලාල් විය යුතුය. ඔහු අනුභව කරන ආහාර පාන හලාල් විය යුතුය. මේ නිසා මුස්ලිම්වරුන් පොලී සම්බන්ද ගනු දෙනු වලින් වැලකී සිටිය යුතුය. තවද මිනිසුන් මුලා කොට මුදල් ඉපැයිමෙන්ද වැලකී සිටිය යුතුය. රැකියාවක් කරන විට අල්ලස් ගැනීමෙන් වැලකී සිටිය යුතුය. වෙළඳාම් කරන විට බොරු කීමෙන් වැලකී සිටිය යුතුය. එසේම සලාතය ප්‍රතික්ෂේප වීමට බලපාන තවත් හේතුවක් නම් අල්ලාහ්ට සමානයන් ඇති කිරීම ය. මේ නිසා මිය ගිය සාස්තෘවරුන් හරහා අල්ලාහ්ට සමීප වීමට උත්සාහ කිරීමෙන් වැලකි සිටීම අනිවාර්ය වේ. 

යම් කෙනෙක් තම දහම අනුව ක්‍රියා කරමින් සලාතය  ද නිසි පරිදි ඉටු කරන්නේ නම් ඔහුගේ කුලිය දෙවියන් අපතේ හරින්නේ නැත. ඒ බව අල්-කුරානයේ මෙලෙස පවසා ඇත. "කවරහු පුස්තකය ක්‍රියාවට නංවමින්, සලාතයද ස්ථාපනය කරත්ද නියතව ඔවුන්ගේ කුලිය අපි අපතේ නොහරින්නෙමු" (කුරානය 7:17).

මිය ගිය කෙනෙක් භූමිදානය කල පසු සොහොනේදී ඔහුගෙන් මුලින්ම ප්‍රශ්න කරනු ලබන්නේ සලාතය ගැනය. එය හොඳින් තිබුනේ නම් ඉන් පසුව එළෙඹෙන සෑම අදියරක්ම  සාර්ථක වනු ඇත. 

මුස්ලිම්වරයෙකුටත් මුස්ලිම් නොවන කෙනෙකුටත් අතර වෙනස සලාතය පැහැර හැරීම බව නබිතුමා සඳහන් කොට තිබේ. තවද සලාතය නිසි පරිදි ඉටු කිරීම නිසා සුළු වැරදි වලට සමාව ලැබෙන බව හදිස් වල දැක්වේ. නබිතුමා සලාතය උපමා කළේ තම නිවස අසලින් ගලා බසින ගංගාවකින් දෛනිකව පස් වතාවක් ස්නානය කිරීමටය. (මුලාශ්‍රය සහිහ් බුහාරි සහ මුස්ලිම්). 

By Fasy Ajward.B.Sc(PhysicsSpecial)Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/