සාතන් හට වැරදුණේ කොතැනද? ඔහුගේ අරමුණ කුමක්ද? (Where did Satan go wrong? What is his intention?)

යම් කෙනෙකුට ඉහලින් නියෝගයක් ලැබුනේ නම් එය පිළිපැදිය යුතුය. එසේ නොකළහොත් එහි විපාක අතිවින්දීමට සිදු වේ. එසේ තිබියදී ආදම්තුමාව මැටියෙන් මැවූ පසු ඔහුට සුජුද් (නමස්කාර) කරන ලෙස සර්ව බලධාරි අල්ලාහ් දෙවිඳුන් විසින් කල නියෝගය සාතන් හැර අනෙක් සියලුම දේවදුතයින් ඉටු කලෝය. එහෙත් සාතන් කලේ ආදම්තුමගේ මැවීම ඔහුගේ මැවීමත් සමග සංසන්දනය කොට බලා ආදම් තුමාට නමස්කාර නොකර හැරීමය. එම කරුණ අල් කුරානයේ මෙසේ දැක්වේ. "'මා නුඹට අණ දුන් කල්හි නුඹ සුජුද් නොකර සිටීම සඳහා නුඹව වැළැක්වූ දෙය කුමක්දැයි' ප්‍රශ්න කල කල්හි, 'මා ඔහුට වඩා උසස් වෙමි' 'නුඹ මාව ගින්නෙන් මවා ඇති අතර ඔහුව කිරි මැටියෙන් මවා ඇතැයි' පැවසුවේය. (කුරානය 7:12).

අල්ලාහ්ගේ නියෝගය හමුවේ සාතන් කලේ ඊට පිටු පෑමය. ඇත්ත වශයෙන්ම එය විශාල වරදක් බව ඔහු තේරුම් ගත යුතුව තිබුනේය. කෙසේ වෙතත් සාතන් කලේ ඔහුගේ නිදහසට කරුණු ඉදිරිපත් කිරීමය. එය සාතන් කල ලොකුම වැරැද්ද කි. මේ හේතුවෙන් උඩඟු කම ප්‍රදර්ශනය කොට මුල් වරට  තම විනාශය ලඟා කර ගත්තේ සාතන් ය. 

තම විනාශය ලඟා කර ගත් සාතන් අල්ලාහ්ගේ කෝපයටත් ශාපයටත් පාත්‍ර විය. එපමණක් නොව සාතන්ව ස්වර්ගයෙන්ද නෙරපා හරින ලදී. එහි පලිය ගැනීම සඳහා සාතන් එදා පටන් මිනිසාගේ පරම සතුරෙක් විය. අල් කුරානයේ බොහෝ තැන්වල සාතන් මිනිසාගේ පරම සතුරා බව දන්වා තිබේ. එසේ තිබියදීත් බොහෝ අය කරන්නේ සාතන්ගේ අඩිපාරේ ගමන් කිරීමයි. 

සාතන්ව ස්වර්ගයෙන් නෙරපන අවස්ථාවේදී ලෝකය අවසාන වන තුරු ජිවත් වීම සඳහා වරමක් ඉල්ලා සිටියේය. අල්ලාහ්, ඔහුට එම වරම ලබා දුන්නේය. එම වරම දිනා ගත් පසු සාතන් කියා සිටියේ ආදම්තුමාගේ දරුවන්ගෙන් සුළු පිරිසක් හැර අන් සියලුම දෙනා නරකාදියට යැවීම සඳහා ක්‍රියා කරන බවයි. එහෙත් අල්ලාහ් පැවසුවේ එවැනි දෙයක් කල හැක්කේ සාතන්ට අවනත වන අය සඳහා පමණක් බවයි. ඒ බව කුරානයේ මෙසේ දැක්වේ. "නියත වශයෙන්ම මාගේ (යහපත්) ගැත්තන් කෙරෙහි නුඹට කිසිඳු බලයක් නැත" (කුරානය 17:65).

සාතන්ට වැරදුනේ ඔහුගේ උඩඟු කම නිසාය. එය දැනදැනත් බොහෝ අය උඩඟු කමින් තම විනාශය අදටත් ලඟා කර ගන්නේය. 

මිනිසාට මෙලෝ ජීවිතය පරීක්ෂාවක් බව කුරානයේ දැක්වේ. ඒ අනුව සෑම කෙනෙකුම ඊට මුහුණ දිය යුතුව තිබේ. ඉන් ප්‍රධන තැනක් ගන්නේ තම මැවුම්කරු අල්ලාහ් බව විශ්වාස කිරීම වේ. එහෙත් සාතන් එය වළක්වාලීමට ක්‍රියා කරන්නේය. කෙසේ වෙතත් විශ්වය ඇතුළු සියලුම දේවල් අල්ලාහ් මවන ලද බවට  ප්‍රමාණවත් සාක්ෂි ලොව පුරා දැක ගත හැකිය. එපමනක් නොව බුද්ධිමතුන්ට මිනිසා තුලින්මද ඒ සඳහා සාක්ෂි ලබා ගත හැකිය. එසේ තිබියදී බොහෝ අය අල්ලාහ්ව විශ්වාස නොකරන්නේ උඩඟු කම නිසාය. 

මිනිසා මෙලොවට පැමිණ තිබෙන්නේ කෙටි කාලයක් සඳහාය. නැවත සවර්ගය අත්කර ගැනීම සඳහා කල යුත්තේ අල්ලාහ්ව විශ්වාස කොට ඔහුට පමණක් නැමදිමය. එසේ තිබියදීත් මිනිසා සාතන්ට අවනත වීම හේතුවෙන් එය මග හරින්නේය. එසේ කිරීමෙන් සිදු වන්නේ සාතන්ව ස්වර්ගයෙන් නෙරපන අවස්ථාවේදී දෙන ලද පොරොන්දුව ඉටු වීමයි. 

සැබැවින්ම කිසිම කෙනෙක් තමන්ව තමන් විසින්ම මවා ගත්තේ නැත. මිනිසාව මවා තිබෙන්නේ අල්ලාහ්ය මරණයෙන් පසු  සෑම කෙනෙකුම අල්ලාහ් ඉදිරියේ නවතා ප්‍රශ්න කිරීමට නියමිතය. එම දිනයේදී අල්ලාහ් වෙනුවට සිටි කිසිම කෙනෙක් උදව්වට එන්නේ නැත. සාතන්ද එම දිනයේදී මිනිසාව තනි කරනු ඇත. මිනිසා ඔහුගේ අතින්ම සාදාගෙන වැඳුම් පිදුම් කල දේව රූප වලින්ද කිසිවක් කල හැකි වන්නේ නැත. එම අවස්ථාවේදී මිනිසා මෙලොවදී කල වරද හොඳින් වටහා ගනු ඇත. එහෙත් එදාට අල්ලාහ්ගේ විනිශ්චයට යටත් වෙනවා හැර වෙන කල හැකි දෙයක් නැත. එම දිනයේදී සාතන් ද මිනිසාව අතරමං කරනු ඇත. ඒ බව මෙම කුර්ආන් වැකිය තුලින් දැක ගත හැකිය. "විනිශ්චය දෙනු ලැබූ කල, (සාතන් මෙසේ පවසනු ඇත) 'ඇත්ත වශයෙන්ම අල්ලාහ් නුඹලාට සත්‍යය ප්‍රතිඥාවක් දුන්නේය' එසේ තිබියදී මාද නුඹලාට ප්‍රතිඥා දුන්නෙමි. එහෙත් මා නුඹලාට වෙනස්කම් කළෙමි. මා නුඹලාව අඬගැසූ විට පිළිතුරු දුන් දෙය හැර මා හට නුඹලා කෙරෙහි කිසිඳු බලයක් තිබුනේ නැත. එබැවින් නුඹලා මා හට දොස් නොපවරනු. නුඹලා නුඹලාටම දොස් පවරාගනු. මා නුඹලාව ආරක්ෂා කරන්නෙක්ද නොවෙමි. නුබලා මාව ආරක්ෂා කාරන්නන් ද නොවේ. මීට පෙර නුඹලා මා සමග සම කරමින් සිටි දේවල් නියත වශයෙන්ම මා විසින් ප්‍රතික්ෂේප කරමි'යි සාතන් පවසනු ඇත" (කුරානය 14:22).

ඉහත ගෙන හැර දැක්වූ කරුණු අනුව විනිශ්චය දිනයේදී තමන්ට තමන් හැර වෙන කිසිවෙකු උදව්වට එන්නේ නැත. සාතන් ද එම දිනයේදී අසරණ වනු ඇත. ඒ අනුව ඔහු සිය ගැත්තන්ව මග හරිනු ඇත. මේ නිසා මරණයෙන් පසු ජීවිතය ජය ගැනීමට අපේක්ෂා කරන සියලුම දෙනා දෙවියන් පහළ කරන ලද නිවැරදි දහම පිළිපැදිය යුතුය. එහෙත් බොහෝ අය කරන්නේ හරි හෝ වැරදි පසෙකලා තමන්ගේ පාරම්පරික ආගම දහම පිළිපැදීම වේ. එහෙත් කල යුත්තේ තමන් අදහන කුමන හෝ ආගම හොඳින් ගවේශනය කොට බලා එය නිවැරදි නම් පමණක් පිළිපැදීම ය. 

By Fasy Ajward. B.Sc (Special) Hons.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twitter:- thetrue_path.