ඉස්ලාම් මිත්‍යාව මත පදනම් වූ ආගමක් ද? (Is Islam a Mythical religion?)

ඉස්ලාම් යනු අල්ලාහ්ගේ පැහැදිලි දිව්‍යමය පණිවිඩ සහිත ආගමකි. එම නිසා එහි මනඃකල්පිත අදහස් අඩංගු නොවේ. තවද අල් කුරානය තුල නවීන විද්‍යාවට අභියෝග කල හැකි නොයෙකුත් කරුණු අඩංගු වේ. ඉස්ලාම් මිත්‍යාව මත ගොඩ නැගී තිබුනේ නම් එහි අපැහැදිලි මෙන්ම වැරදි අර්ථ කථන සහ අධ්‍යාත්මික විශ්වාසයන් ඇතුලත් වීම වැළැක්විය නොහැක.

අල් කුරානය මුළුමනින්ම අල්ලාහ්ගෙන් පහළ වූ දේව පණිවිඩයකි. එය තහවුරු කිරීම සඳහා ප්‍රමාණවත් කරුණු කුරානය තුලින්ම ලබා ගත හැකිය. විශේෂයෙන්ම විද්‍යාව හා තාක්ෂනයයෙන් දියුණු මෙවන් යුගයක කුරානයේ ඇති බොහෝ කරුණු වලින් එය සනාථ කර ගත හැකිය. උදාහරණයක් වශයෙන් සුර්යයා ඊට නියමිත ගමන් මාර්ගයක සැරිසරන බව කුරානයේ දැකිය හැකිය. මෙවැනි වගන්තියක් ඉදිරිපත් කල හැක්කේ ඉස්ලාම් මිත්‍යාව මත පිහිටා නොමැති බැවිනි. එසේ නොවන්නට එදා තිබුණු මිත්‍යා විශ්වාසයන් කුරානය තුලට ඇතුලත් වනු ඇත.

ඉස්ලාම් මනඃකල්පිත පිළිරුවලට හෝ දේව රූපවලට දේවත්වයෙන් සලකන්නේ නැත. ඒ වෙනුවට සත්‍යය ලෙස පවතින දෙවියන් හට පමණක් දේවත්වයෙන් සලකන්නේය. එම දෙවියන් පිලිබඳ අර්ථ දැක්වීමක් ඉතා අලංකාර ලෙස කුරානයට ඇතුලත් කොට තිබේ. මේ හේතුවෙන් දකින දකින දේවල් වලට නැමදීම ඉස්ලාම් අනුමත කරන්නේ නැත. තවද ඉස්ලාම් දහම තුල රූප වන්දනාව හෝ යක්ෂ ප්‍රේත වන්දනාව හෝ සිදු කරන්නේ නැත. එසේම ග්‍රහ වස්තුන්වල බල පෑම නිසා මිනිසාට හොඳක් හෝ නරකක් සිදුවන බව විශ්වාස කරන්නේද නැත. ඉස්ලාම් දහමෙහි ප්‍රධන අරමුණ මිනිසා මිනිසාට වැඳිම වෙනුවට සර්වබලධාරී අල්ලාහ්ට පමණක් වැඳීමට පෙන්වා දීමය. 

ඇතැමුන් සිතන ආකාරයට නොදකින දෙවි කෙනෙකුට වැඳීම මිත්‍යා විශ්වාසයක් නොවේ. අල්ලාහ්ව දැකිය නොහැකි වුවත් ඔහු මවා ඇති විශ්වය සහ එහි ඇති සියලු දේවල් අපට දැකිය හැකිය. ඒවා ගැන ගැඹුරින් හදාරන විට ඒවා ඥානාන්විත එක් දෙවි කෙනෙකුගේ ක්‍රියාවක් බව දැක ගත හැකිය. එවැනි නිගමනයක්  කරා තිරිසන් සතුන්ට පැමිණිය නොහැකි වුවත් දියුණු මොලයක් තිබෙන මිනිසාට පිළිවන. ඇයිද යත් මිනිසාට යමක් තේරුම් ගෙන විශ්වාස කිරීම සඳහා යමක් දැකීම අනිවාර්‍ය නොවන නිසාය. මිනිසාව මවා තිබෙන්නේ අල්ලාහ්ව නොදැක තේරුම් ගැනීමට හැකි වන පරිද්දෙනි. 

විශ්වය සහ එහි ඇති සියලුම දේවල් පවතින්නේ දෙවි කෙනෙක් සිටින නිසාය. එසේ නොවන්නට කිසිසේත්ම විශ්වය බිහි වීමට වෙනත් ක්‍රමයක් නැත. මහාචාර්ය ස්ටෙෆාන් හොකින් මහතා විසින් රචිත "A brief history of time from big bang to black hole" යන ග්‍රන්ථයෙහි එම අදහස පල කොට තිබේ. එම ග්‍රන්ථය තුල ඔහු පවසන්නේ විශ්වය සර්වබලධාරී දෙවිකෙනෙකුගේ මැවීමක් බවයි. එසේ නම් එම සුප්‍රකට විද්‍යාඥයා මිත්‍යා දෘෂ්ටිකයෙක් විය හැකිද? 

ඉස්ලාම් දහමෙහි මිත්‍යා විශ්වාසයන් නොමැති නිසා ග්‍රහ වස්තුන්ගේ වෙනස් වීම නිසා මිනිසාගේ දෛවය වෙනස් වන බව විශ්වාස කරන්නේ නැත. තවද කේන්දර බැලීම, නැකත් බැලීම, සාස්තර බැලීම ඉස්ලාම් දහම අනුමත කරන්නේ නැත. 

ඉස්ලාම් දහම අනුව අල්ලාහ් වෙත ලඟා විය හැක්කේ ඔහු විසින් පෙන්වා දී ඇති දහම් මාර්ගය ඔස්සේ පමණි. එම මාර්ගය පෙන්වා දීම සඳහා නබිවරුන් විශාල සංඛ්‍යවක් මෙලොවට පැමිණ තිබේ. බොහෝ ආගම් පුස්තක මෙලොවට පැමිණියත් අද අප අතර කිසිම වෙනසකට ලක් නොවී තිබෙන එකම දහම් පණිවිඩය කුරණයයි. අල් කුරානය මුළු මහත් මිනිස් වර්ගයා වෙනුවෙන් පහළ කරන ලද්දකි. එම දහම් පණිවිඩයත් සමග ඉස්ලාම් දහම සම්පුර්ණ වේ. 

By Fasy Ajward B.Sc(PhysicsSpecial)Hons,Japura,

Ex.Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twiter:- thetrue_path