මුස්ලිම්වරුන්ට වෙනම බැංකුවක් අවශ්‍ය වන්නේ ඇයි? ( Why do Muslims need a separate bank?)

අල්-කුරානයේ ඇති වගන්ති ප්‍රකාරව මුස්ලිම්වරුන් හට පොළිය සපුරා තහනම් ය. එබැවින් මුස්ලිම්වරුන් පොලිය සම්බන්ද සියළුම ගනුදෙනු වලින් ඉවත් වීම අනිවාර්ය වේ. මේ හේතුවෙන් පොලියට ගැනීම, පොලියට දීම, පොලි ගනුදෙනු සඳහා සාක්ෂි දීම ඒවා සටහන් කිරීම තහනම් ය. මේ හේතුවෙන් මුස්ලිම්වරුන්ට පවතින සාම්ප්‍රදායික බැංකුවලින් ඉවත්වී මුස්ලිම්වරුන්ගේ අවශ්‍යතාවයන් සපුරාදෙන බැංකු ස්ථාපනය කිරීමට සිදු වන්නේය. නැතහොත් පවතින සම්ප්‍රධායික බැංකුවලින් මුස්ලිම්වරුන්ගේ අවශ්‍යතාවන් සපුරා දිය යුතුය.

පොලිය තහනම් කොට ඇති කුර්ආන් වැකිය මෙසේය. "පොලිය අනුභව කරන්නෝ සානත් විසින් ස්පර්ශ කරනු ලැබූ උමතුවෙකු මෙන් මිස (මරණයෙන් පසු එලොවේදී) නොනැගිටින්නෝය. වෙළඳාම පොලියට සමකිරිම මෙයට හේතුවයි. එහෙත් අල්ලාහ් පොලිය තහනම් කොට වෙළඳාම අනුමත කළේය. කවරෙකු තම සමිඳුන්ගෙන් උපදෙස් ලැබුණු පසු පොලිය හැර දමයිද ඔහු කලින් ගත් දෙයට දඬුවම් කරනු නොලැබේ. ඔහුගේ කාර්යය අල්ලාහ් වෙතම ඇත. කව්රුන් (පොලිය දෙසට) හැරෙන්නෝද ඔවුහු නිරා වැසියෝ වෙති. ඔවුහු එහි සදාකල් සිටින්නෝය" (කුරානය 2:275). 

ඉස්ලාමීය බැංකු ආකෘතිය පදනම් වන්නේ ලාභ බෙදා ගැනීමේ මූලධර්මය මතය. එම නිසා සිදු විය හැකි පාඩුවක් ඇතොත් බැංකුව සහ පාරිභෝගිකයා අතර බෙදා ගනු ලැබේ. මෙම  ක්‍රමය ආදායම හා ධනය වඩාත් සමානව බෙදා හැරීමට දායක වේ.

සම්ප්‍රධායික බැංකුවලින් නියමිත පොලියකට ණයක් ගත හැකි වුවත් ඉස්ලාමිය බැංකුවලින් ණයට මුදල් දෙනු නොලැබේ. එහෙත් පරිබෝගිකයාගේ උවමනාවන් බැංකුව විසින් තේරුම් ගෙන කලින් පැමිණි එකඟතාවයක් අනුව එම උවමනාව ඉටු කර දීමට කටයුතු කරන්නේය. එහිදී සිදු විය හැකි ලාභ හෝ පාඩුව බැංකුව සහ පරිබෝගිකයා අතර බෙදා ගනු ලැබේ. මෙම ක්‍රමය නුගමනය කිරීමෙන් ව්‍යාපෘතිය සමග පොලිය සම්බන්ද වන්නේ නැත.

මෙය පැහැදිලි කිරීම සඳහා සරල උදාහරනයක් ගෙන බලමු. කෙනෙකුට නිවසක් මිළදී ගැනීමට අවශ්‍ය යැයි සිතන්න. එවිට ඉස්ලාමිය බැංකුවෙන් කරන්නේ ඔහුගේ එම අවශ්‍යතාවය ඉටුකර දීමෙන් පසු එම නිවස ඔහුට කුලියට දීමයි. මෙම කුලිය ඔහු මාසිකව ගෙවන වාරික අනුව අඩු කරනු ලැබේ. නිවස වෙනුවෙන් ගෙවිය යුතු සම්පුර්ණ මුදල පියවීමෙන් පසු එහි අයිතිය පාරිබෝගිකයා වෙත පවරා දෙනු ලබේ. යම් හේතුවක් නිසා වාරික කිහිපයක් ගෙවීමට නොහැකි වීම නිසා අමතර පොලියක් එකතු නොකිරීම ඉස්ලාමීය බැංකුවක සහ සම්ප්‍රදායික බැංකුවක ඇති ප්‍රධාන වෙනසකි. 

කරුණු එසේ තිබියදී ඇතැම් අය පෙන්වා දීමට උත්සාහ කරන්නේ ඉස්ලාමිය බැංකු ඇති කිරීම නිසා රට ඉස්ලාමීයකරණයට පත් වන බවයි. එය ඉතා බොළඳ මතයකි. . 

By Fasy Ajward. B.Sc (Sp,Phy) Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/