අල්ලාහ් සමඟ හවුල්කරුවන් ඇති කිරීම මහා පාපයක් වන්නේ ඇයි? (Why is associating partners with Allah a great sin?)

අල්ලාහ් එක්කෙනෙකි. ඔහුට සමාන වෙනත් කිසිවෙකු නැත. එසේ තිබියදී අල්ලාහ් සමග වෙනත් දේවල් ආදේශ කිරීම මහා පාපයක් ලෙස සලකනු ලැබේ. මේ නිසා සෑම මුස්ලිම්වරයෙකුම අල්ලාහ්ට පමණක් නැමදුම් කල යුතුය. එසේ තිබියදී අල්ලාහ් හැර වෙනත් කිසිවෙකු වෙනුවෙන් පඬුරු දැමීම හෝ වෙනත් අය වෙනුවෙන් සතුන් කැප කිරීම හෝ මිය ගිය අය හරහා අල්ලාහ්ගෙන් දුආ ප්‍රාර්ථනය කිරීම නොකළ යුතුය. එවැනි වැරැද්දක් කරන කෙනෙක් කරන්නාවූ සලාතයෙන් හෝ සකාත්වලින් හෝ උපවාසයෙන් හෝ පලක් වන්නේ නැත. මේ හේතුවෙන් ලුක්මාන් අලෛහි සලාම් තුමා සිය පුතුන්ට මෙසේ අවවාද කළේය. "ලුක්මාන් තම පුතාට අවවාද කරන කල පැවසුවේ, 'මාගේ දයාබර පුතුනි! අල්ලාහ්ට කිසිම දෙයක් සම නොකරන්න! නියතවශයෙන්ම අල්ලාහ්ට වෙනත් දෙයක් සමකිරිම ඉතා දරුණු අපරාධයකි" (කුරානය 31:13). 

ඉස්ලාම් දහම අනුව කෙනෙක් මිය ගියේ නම් ඔහුගේ දේහය පොදු සුසාන භුමියක මිහිදන් කල යුතුය. එසේ තිබියදී එම දේහය ගොඩනැගිල්ලක් තුල මිහිදන් කිරීම හෝ මිහිදන් කල සොහොන වටා ස්ථිර ගොඩනැගිලි ඉදිකොට එය පුජනීය ස්ථානයක් කර ගැනීම ඉස්ලාමීය ඉගැන්වීම් වලට පටහැනි වේ. නබිතුමා මිය යාමට පෙර එවැනි දෙයක් කරන අයට ශාප කළේය. මළවුන් වෙනුවෙන් ස්ථිර ගොඩනැගිලි ඉදිකිරිම යුදෙව්වන්ගේ ක්‍රියාවක් වේ. 

අල්ලාහ්ට සමානයන් ඇති කරන තැනැත්තාට සමාව නැත. "නියතවශයෙන්ම අල්ලාහ් ඔහුට (වෙන දෙයක්) සම කරනු ලැබීම ක්ෂමා නොකරන්නේය. එය හැර අනෙක්වා ඔහුගේ අභිමතය පරිදි ක්‍ෂමා කරන්නේය. කවරෙක් (නැමදීමේ දී) අල්ලාහ්ට (යමක්) ආදේශ කරයිද ඔහු නියතවශයෙන්ම මහා පාපයක්  ගොතන ලද්දෙක් වේ" (කුරානය 4:48). මේ හේතුවෙන් මුස්ලිම්වරයෙකු තමන් ගරු කරන කෙනෙකුගේ සොහොන වෙත හෝ වෙනත් සාස්තෘවරුන්ගේ සොහොන වෙත හෝ ගොස් අල්ලාහ්ගෙන් ප්‍රාර්ථනා කිරීම මහා පාපයකි. ඉස්ලාම් දහම පෙන්වා දෙන අන්දමට කෙනෙක් නැමැදිය යුත්තේද, ප්‍රාර්ථනා කල යුත්තේද, පඬුරු දැමිය යුත්තේද අල්ලාහ්ට පමණි. අල් කුරානයේ මෙසේ සඳහන් වේ. "නුඹගේ 'ර‍බ්' ඔහුට හැර (වෙන කිසිවෙකුටත්) නැමදුම් නොකළ යුතු යැයි නියෝග කරයි" (කුරානය 17:23). කුරානයේ තවත් තැනක මෙලෙස සඳහන් වේ. "අවංක ලෙස අල්ලාහ්ට පමණක් මිස වෙන කිසිවෙකුට නැමදුම් කරන ලෙස ඔවුන්ට නියෝග කෙරුවේ නැත" (කුරානය 98:5). 

ආදම් තුමාගේ පටන් නුහ් නබි තුමා දක්වා සොහොන් වන්දනාවක් තිබුනේ නැත. එහෙත් නුහ් නබිතුමාගේ කාලයේදී සාස්තෘවරුන්ට ගෞරව කිරීමේ අරමුණ ඇතිව එය ආරම්භ විය. පසුව ඔවුන්ව අල්ලාහ්ගේ අතරමැදියන් බවට පත් කර ගන්නා ලදී. එවැනි වැරදි නිසා කෙනෙක් කරන සෑම කුසල් ක්‍රියාවක්ම නිෂ්පල වේ. "ඔබ පිළිම වන්දනාවේ යෙදෙනවා නම්, නුඹලාගේ සියලු ක්‍රියා නිෂ්ඵල වන්නේය. තවද ඔබ පරාජිතයින් සමඟ සිටින්නෙහිය" (කුරානය 39:65).

මුස්ලිම්වරයෙකු නමදින විට සුරා ෆාතිහාව පරයනය කරමින් මෙසේ පවසන්නෙමු. කරන අවස්ථාවේදී "අපි නුඹවම නමදිමු. නුඹගෙන්ම උදව් පතමු" (කුරානය 1:5) එසේ තිබියදී වෙනත් අයගෙන් උදව් පැතීම කල හැකිද? එසේම අත්තහියාත් පරායණය කිරීමේදී සෑම පඬුරක්ම අල්ලාහ්ට යැයි පවසමු. එසේ තිබියදී මළවුන් වෙනුවෙන් පඬුරු දැමිය හැකිද? 

By Fasy Ajward.B.Sc(Sp.Phy) Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twiter:- thetrue_path