ඉස්ලාම් දහම තුල අධ්‍යාපනයට හිමි තැන (The place of education in Islam)
ඉස්ලාම් දහමින් අධ්‍යාපනයට ඉතා ඉහල වටිනාකමක් ලබා දී තිබේ. ඒ අනුව ආධ්‍යාපනය හැදෑරීම සෑම මුස්ලිම්වරයෙකුටම අනිවාර්ය බව නබි තුමා පවසා ඇත. මේ හේතුවෙන් පිරිමින් මෙන්ම කාන්තාවන් අධ්‍යාපනය හැදෑරිය යුතුවේ. අල් කුරානයේ මුල්ම් පරිජ්ජේදය ආරම්භ වන්නේ ද "කියවනු" යන නියෝගයත් සමගය. එමගින් කියවීමේ ඇති වැදගත්කම කියා පාන්නේය. දැනුම සම්බන්දයෙන් නබිතුමාගේ හදිසයක මෙසේ දැක්වේ. යම් කෙනෙක් දැනුම සොයා යන්නේ නම්, අල්ලාහ් ඔහුට ස්වර්ගයට යන මාර්ගය පහසු කරන්නේය. මින් අදහස් කරන්නේ කුරානය සහ හදිස් පිලිබඳ දැනුම වේ. ඉස්ලාම් දහමින් දැනුමට ලබා දී ඇති වැදගත්කම නිසාම අල් කුරානය පහළ වීමට පෙර දැනුම අතින් ඉතා පසුගාමිව සිටි ජනතාව පසු කාලයේ ලෝකයේ ඉතා ශ්‍රේෂ්ඨ ජාතියක් බවට පත්විය. එම හේතුවෙන් මුස්ලිමරුන් විසින් විද්‍යාවේ දියුණුවට පවා විශාල ලෙස දායක වී තිබේ.
එදා අඳුරේ තිබුණු යුරෝපය ආලෝකය කරා ගෙන ගියේ මුස්ලිම්වරුන් විසින් ලෝකයට දායාද කල විද්‍යාත්මක සොයා ගැනීම් නිසාය. ඒ අනුව ඉතිහාසයේ සිටම මුස්ලිමරුන් ආගමට මෙන්ම ලෞකික අධ්‍යාපනය වෙනුවෙන් විශාල කාර්ය භාරයක් ඉටු කොට තිබේ. මුස්ලිම් විද්‍යාඥයින් වන අබු මුසා ජබර්, අල් කෝහි, ඉබ්නු අල් හෛතම් වැනි අය විසින් තාරකා භෞතික විද්‍යාව, රසායන විද්‍යාව, විජ ගණිතය, භෞතික විද්‍යාව, වෛද්‍ය විද්‍යාව යන අංශ වලට විශාල සේවයක් ඉටු කොට තිබේ. ඒවා අද තිබෙන විද්‍යාත්මක දියුණුවට ප්‍රධාන හේතුවකි. කෙසේ වෙතත් නවීන ලෝකය ගත්කල මුස්ලිම්වරුන් ඉතා පසුගාමී තත්වයකට වැටී තිබීම ඉතා කනගාටුදායක තත්වයකි.
ඉස්ලාම් දහම අනුව දැනුම කොටස් දෙකකට වෙන් කල හැකිය. ඉන් එකක් ලෞකක දැනුම වන අතර අනෙක අධ්‍යාත්මික දැනුම වේ. මිනිසාගේ පැවැත්ම සඳහා මේ දැනුම් දෙකම අවශ්‍ය වේ. මෙම දෙවන වර්ගයේ දැනුම සෑම කෙනෙකුටම අනිවාර්ය නැතත් සුළු පිරිසක් හෝ එය ලබා තිබීම ඉස්ලාම් දහමින් අනිවාර්ය කෙරෙන්නේය. මේ නිසා එක් ගමක අඩුම තරමින් එක් වෛද්‍යවරයෙක්, ඉංජිනේරුවෙක්, නීතිඥවරයෙක් හෝ සිටිය යුතුය. එසේ නැති විට ගමේ සිටින සියලු දෙනාම වරද කරුවන් වන්නේය. අනෙක් අතට සෑම මුස්ලිම්වරයෙකුම ඉස්ලාම් දහමේ මුලික දේවල් ගැන දැනගෙන සිටීම අනිවාර්ය වේ. තවද, ඔවුන්ගෙන් කිහිප දෙනෙකු හෝ ඉස්ලාම් දහම ගැන මනා ලෙස හදාරා තිබීම අනිවාර්ය වේ. එවිට දහම තුල පැන නගින ප්‍රශ්න වලට ඔවුන් ලවා විසඳුම් ලබා ගැනීමට හැකි වන්නේය.
ඉතිහාසය දෙස බලන කළ මුස්ලිම් විද්වතුන් විසින් ඉස්ලාම් දහමෙහි උන්නතිය වෙනුවෙන් විශාල කාර්ය භාරයක් ඉටු කර තිබේ. ඒ අනුව ඇතැම් අය කුරානයට අටුවා ටීකා ලියා තිබේ. තවත් සමහරු ඉස්ලාමිය නීතිය සම්බන්දයෙන් විශාල කාර්ය භාරයක් ඉටු කර තිබේ. තවත් සමහරු නබිතුමාගේ හදිස් එක් රැස්කොට ග්‍රන්තාරුධ කොට ඇත. මේ නිසා අපට දැන් ඉස්ලාම් දහම ඉතා පහසුවෙන් හැදෑරීමට හැකි වී තිබේ. අද ඇති නවීන තාක්ෂනයත් සමග එය තවත් පහසු වී ඇත.
කිසියම් කෙනෙකුට අල්ලාහ් හොඳක් කිරීමට අදහස් කලේ නම් ඔහුට ඉස්ලාම් දහම ගැන දැනුම ලබා දෙන බව මුආවියා රලි තුමා නබිතුමාගේ හදිසයක් මෙසේ දැනුම් දෙන්නේය. "යම් කෙනෙකුට හොඳක් කිරීමට අල්ලාහ් අදහස් කලේ නම් ඔහුට ආගම පිලිබඳ අවබෝදය ලබා දෙන්නේය" (බුහාරි සහ මුස්ලිම්). අල් කුරානය තුලද දැනුම වැඩි කර දෙන මෙන් අල්ලාහ්ගෙන් දුආ ප්‍රාර්ථනා කරන ලෙස මෙසේ නියෝග කොට ඇත. "මාගේ සමිඳුනි! මට දැනුම අධික කරනු මැනව'යි පවසන්න" (කුරානය 20:114). මෙය සෑම මුස්ලිම්වරයෙකු විසින්ම කල යුතු ප්‍රාර්තනාවකි.
කෙනෙකු හම්බ කල වස්තුව ඔහුගේ මරණයත් සමග ගෙන නොගියත් ඔහුගේ දැනුමෙන් ලැබෙන කුසල් ඔහුගේ මරණයට පසුත් පල දෙන්නේය. ඒ සම්බන්දයෙන් වන හදිසයක් අබු හුරෛරා රලි තුමා මෙසේ පවසා ඇත. "කෙනෙක් මිය ගිය පසු කරුණු තුනක් හැර අනෙක් සෑම දෙයක්ම මේ ලෝකය තුල නතර වන්නේය. ඒවා කවරේද යත්, නිතරම පුනරාවර්තනය වන දානමය කුසල් (ever recurring charity), ප්‍රයෝජනයට ගන්නා දැනුම, සැදැහැවත් දරුවෙකු දෙමව්පියන් වෙනුවෙන් කරන ප්‍රාර්ථනයන් වේ" (මුලාශ්‍රය මුස්ලිම්). මේ නිසා යම් දෙයක් ගැන කෙනෙක් දැනගත් විට එය අනෙක් අය සමග බෙදා හදා ගැනීමෙන් එය මරණයට පසුත් ප්‍රයෝජනවත් වේ.
නවීන ලෝකය ගත් කළ බොහෝ අය ලෞකික අධ්‍යාපනයට පමණක් මුල් තැන දෙන්නේය. එහි ප්‍රතිපලයක් ලෙස ඔවුන්ට දහම ගැන ඇත්තේ අල්ප දැනුමක් පමණි. මේ හේතුවෙන් ඔවුන්ට අල්ලාහ් ගැන හෝ මරණයෙන් පසුව ඇති ජීවිතය ගැන හෝ ඇත්තේ ඉතා දුර්වල විශ්වාසයකි. සාතන්ට එවැනි අයව ඉතා පහසුවෙන්ම නොමග යැවිය හැකි වන්නේය. එපමණක් නොව අල්ලාහ් ගැන බියබැතිකම නොමැති විට කෙනෙක් ඕනෑම වැරදි වැඩක් කිරීමට පසු බට වන්නේ ඇත. මේ හේතුවෙන් බොහෝ අය මත්කුඩු වලටත් ත්‍රස්තවාදයටත් වෙනත් වැරදි වැඩ වලටත් ඇබ්බැහි වී තිබේ. මෙය වැළැක්වීමට නම් නිවැරදි මග පෙන්වීම මුල සිටම අවශ්‍යවේ. කෙසේ වෙතත් ලෝකය අවසන් හෝරාවට ළං වනවාත් සමග දැනුම උදුරා ගනු ලැබේ. එවිට මිනිසුන් අතර කැරලි කෝලාහල් පැතිරී යනු ඇත. තවද, මසුරුකම මිනිසුන්ගේ හදවත් තුළ තැන්පත් වනු ඇත. එසේම එම කාලය ලඟා වත්ම ලේ වැගිරීම් වැඩි වනු ඇත. මේවාට එක් හේතුවක් වන්නේ මිනිසා දහම් දැනුම නොසලකා හැරීම වේ.
By Fasy Ajward.B.Sc(Special)Hons.
Ex: Research officer at Ceylon Institute of Scientific and Industrial Research.
Comments
Post a Comment