ඉස්ලාමයට අනුව දෙවියන් යන්නෙහි නිර්වචනය කුමක්ද? (What is the definition of God according to Islam?)

ඕනෑම දෙයකට අර්ථ දැක්වීමක් තිබේ. දෙයක් හඳුනාගත හැක්කේ එම අර්ථ දැක්වීම අනුවය. උදාහරණයක් ලෙස පෑනක් සඳහා නිශ්චිත අර්ථ දැක්වීමක් තිබේ. ඒ අනුව කිසිම කෙනෙක් පොතක් දෙස බලා පෑනක් යැයි කියන්නේ නැත. එසේම ඉස්ලාම් දහම අනුව දෙවියන් සඳහා අර්ථ දැක්වීමක් තිබේ. එබැවින් මුස්ලිම්වරයෙක් පිළිමයක් දෙස බලා දෙවියන් යැයි අමතන්නේ නැත. 

ඉස්ලාම් දහම තුල දෙවියන්ට 'අල්ලාහ්' යැයි ආමන්ත්‍රණය කරන්නේය. අල්ලාහ් පිලිබඳ අර්ථ දැක්වීම කුරානය තුල මෙසේ දැක්වේ. "පවසනු; අල්ලාහ් එක්කෙනෙකි. අල්ලාහ් කිසිවෙකුගේ අවශ්‍යතාවයන් නොමැත්තාය. ඔහු (කිසිවෙකුව) ප්‍රසුත කළේ නැත. ඔහු (කිසිවෙකුගෙන්) ප්‍රසුත වුයේද නැත. තවද, ඔහුට සමාන කිසිවෙකුද නැත" (කුරානය 112:1-4). මෙම අර්ථ දැක්වීම අනුව ලෝකයේ තිබෙන කිසිම දෙයක් හෝ කෙනෙක් අල්ලාහ්ට සමාන නැත. ඒ අනුව ජේසු තුමා හෝ මුහම්මද් නබි තුමා හෝ වෙනත් නබිවරයෙකු හෝ සාස්තෘ වරයෙක්ව අල්ලාහ්ට ආදේශ කල නොහැක. 

අල්ලාහ්ට නැති දෙයකින් අලුත් දෙයක් මැවීමට හැකිය. ඔහු විශ්වය ඇතුළු සියලුම දේවල් මවා පාලනය කරන්නේය. මිනිසා ඇතුළුව ලෝකයේ සිටින සෑම ජීවියෙකුම මැව්වේ ද ඔහුය. සෑම දෙයකම අවශ්‍යතාවයන් ඉටු කර දෙන්නේද ඔහුය. මරණයෙන් පසු ඔහු වෙතම යා යුතුය. සෑම ආත්මයක්ම අල්ලාහ්ට වග කිව යුතුය. 

අල්ලාහ් ඔහු මැවූ විශ්වය තුල නැත. එහෙත් ඔහු සිටින ස්ථානයේ සිට සියල්ල නිරීක්ෂණය කරන්නේය. සෑම දෙයක් ගැනම ඔහු දන්නේය. ඔහු ගැන දැනගැනීම සඳහා නබිවරුන් හරහා දහම් පණිවිඩ විශාල ප්‍රමාණයක් යවා තිබේ. එසේ පැමිණි දහම් පණිවිඩ අතරින් අවසාන දහම් පණිවිඩය වන්නේ අල් කුරණයයි. ඉන් ලෝවැසියන් සියලු දෙනා ආමන්ත්‍රණය කොට තිබේ.  

By Fasy Ajward.B.Sc (PhysicsSp) Hons.Japura,

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twiter:- thetrue_path