ඉස්ලාමය තුල දෙමාපියන් සහ දරුවන් අතර තිබිය යුතු අන්‍යෝන්‍ය යුතුකම් (Mutual duties between parents and children in Islam)
දරුවන් ඇති දැඩි කිරීම ඉතා භාරදුර කර්තව්‍යයකි. මේ නිසාම දරුවන්ව රැකගැනීම, පෝෂණය කිරීම සහ ඔවුන් හට නිසි මග පෙන්වීම සම්බන්දයෙන් කුරානය තුල බොහෝ දේවල් සඳහන් වේ. එසේම දරුවන් විසින් දෙමව්පියන් හට කල යුතු දේවල් ගැන ඊටත් වඩා වැඩියෙන් දැකිය හැකිය. නබිතුමාගේ හදිසයක දැක්වෙන පරිදි කෙනෙක් මිය ගිය පසු ඔහුට ප්‍රයෝනනවත් වන්නේ ඔහු ඉතිරිකර යන ගුණධර්මවලින් පිරි යහපත් දරුවන්, ජනතාවට ප්‍රයෝජන ගෙන දෙන දේවල් වෙනුවන් සිදු කල ආයෝජන සහ ප්‍රයෝජනවත් දැනුම යනාදිය වේ (ඉබ්නු හිබ්බාන්).
දෙමව්පියන් හට සහජයෙන්ම දරුවන් කෙරෙහි සෙනෙහස පිරි ඇත. මේ නිසා ඔවුන් තම ජිවිතයම දරුවන් වෙනුවෙන් කැප කරන්නේය. එහෙත් දෙමව්පියන් වයසට ගිය පසු දරුවන් විසින් ඊට කෙලෙහි ගුණ දක්වන්නේ ඉතා කලාතුරකින් ය. මේ හේතුවෙන් දෙමව්පියන් හට කල යුතු යුතුකම් ගැන ඉස්ලාම් දහම වැඩි අවධානයක් යොමු කොට තිබේ. නබි වදනක දැක්වෙන අන්දමට දරුවෙකුගේ ස්වර්ගය රඳා පවතින්නේ මවකගේ දෙපාමුල ය. එසේම පියාගේ සතුට අල්ලාහ්ගේ සතුටට හේතුවක් බව ද නබිතුමා පවසා තිබේ.
“මිනිසා තම දෙමව්පියන්ට කෘතඥ වන මෙන් සහ කරුණාව දක්වන මෙන් අපි ඔහුට නියම කරන්නෙමු. ඔහුගේ මව ඉතාමත් අමාරුවෙන් (ගර්භයෙහි) ඔහුව උසුලාගෙන හිද, ඉතාමත් අමාරුවෙන්ම ඔහුව ප්‍රසුත කරන්නීය. ඇය ගැබ් ගෙන සිටීමත් (ප්‍රසුත කල දරුවාට) කිරිවලින් පෝෂණය කිරීමත් මාස තිහකි. මොහු තරුණ වියට පත් වී අවුරුදු හතලිහ අත්කර ගත්පසු, “මගේ දෙවියනි! ඔබ මා කෙරෙහිද, මාගේ දෙමව්පියන් කෙරෙහිද, පහල කරන ලද දයාව සදහා මා කෘතඥ වී ඔබගේ තෘප්තිය අත් කර ගත හැකි හොද ක්‍රියාවන් කරන මෙන් ඔබ මා හට ශක්තිය ලබා දෙනු මැනව!, තවද මාගේ දු දරුවෝ යහපත් දරුවන් කරනු මැනව!” (Q 46:15).
දරුවන් විසින් දෙමව්පියන් හට කල යුතු යුතුකම් මෙන්ම දෙමව්පියන් හටද දරුවන් කෙරෙහි විශාල වගකීම් ප්‍රමාණයක් පැවරී තිබේ. ඒවා මග හැරීමෙන් විශාල පාඩුවක් සිදු වන්නේය. කුර්ආන් වැකියක මෙසේ දැක්වේ. "විශ්වාසවන්තයිනි! ඔබද ඔබගේ පව්ලේ උදවියද නිරයේ ගින්නෙන් ආරක්ෂා කර ගනු. එහි ඉන්දන ගල් සහ මිනිසුන් ය" (කුරානය 66:6). මේ නිසා දරුවන් හට දහම ගැන කියා දීමට වැඩි සැලකිල්ලක් දැක්විය යුතුය.
දෙවියන් කෙරෙහි විශ්වාසය වැඩි වන තරමට වැරදි කිරීමට ඇති ප්‍රවනතාව අඩු වන්නේය. මේ නිසා සෑම දරුවෙකුටම කුරානය සහ හදිස් පිලිබඳ දැනුම කුඩා කාලයේදීම ලබා දීමට කට යුතු කල යුතුය. එය නිසි ලෙස ඉටු නොවූ කල දරුවන් මත් ද්‍රව්‍ය වලට පෙළඹිය හැකිය. එය ඔවුන්ගේ ලෞකික ජිවිතයට පමණක් නොව මතු ජිවිතයටද විශාල හානියකි.
සලාතය නිසි ලෙස ඉටු කිරීම නිසා වැරදි වලින් ආරක්ෂා කරන බව කුරානය සඳහන් කරයි. "සලාතය සහතික කරන්න! නියතව සලාතය මගින් ලැජ්ජාශීලී දේද, පිළිකුල් සහගත දේද වළක්වන්නේය" (කුරානය 29:45). මේ නිසා හැකි පමණින් දරුවන්ගේ සලාතය ගැන අවධානය යොමු කිරීමට වග බලා ගත යුතුය.
දෙමව්පියන් හට කීකරු වීම දරුවන් වශයෙන් අනිවාර්ය වුවත් දැනුම නොමැති කමින් අල්ලාහ්ට සමානයන් තබන ලෙස දෙමව්පියන් විසින් නියෝග කලේ නම් ඊට එකඟ විය යුතු නැත. “දෙමාපියන්ට හොඳ කරනමෙන් සහ කීකරුවන මෙන් අපි මිනිසාට නියමකර ඇත්තෙමු. එහෙත් ඔවුන් ඔබට දැනුම නොමැති දෙයක් මා සමග (සමාන කිරීමට) උත්සාහ කරන්නේනම් ඔවුන්ට අවනත නොවනු” (Q 29:8).
දෙමව්පියන් මහලු වියට පත් වීමෙන් පසු ඇතැම් උදවිය ඔවුන් කෙරෙහි ආදරය කරුණාව නොදක්වන්නේය. කෙසේ වෙතත් මෙම කුර්ආන් වැකිය අවවාද කරන්නේ ඔවුන් වෙනුවෙන් ප්‍රාර්ථනා කරන ලෙසය. “ඔබගේ දෙවියන් ඔහුට
පමණක් නමදින ලෙස ඔබට නියම කර ඇත. තවද ඔබ ඔබගේ දෙමව්පියන්ට කෘතඥවිය යුතුය. ඔවුන් දෙදෙනාම හෝ එක්කෙනෙකු ඔබගේ ජිවිත කාලය තුල දී මහලු
වියට පත් වූයේනම් ඔවුන්ට අගව්රවවන ආකාරයේ කිසිම වචනයක් නොකියනු. ඔවුන්වෙත බැන නොවදිනු,
ඔවුන්ට ගෞරවයෙන් ආමන්ත්‍රණ කරනු. ඔවුන්හට යටහත් පහත්ව නිහතමානීව කරුණාව දක්වනු.
තවද පවසනු: මාගේ දෙවියනි, මා කුඩාකල සිට හදාවඩාගත් ඔවූන් වෙනුවෙන් ඔබගේ කරුණාව
දක්වනු මැනව, ” (Q 17:23-24).
දෙමව්පියන් හට උපකාර කිරීමෙන් ස්වර්ගය සඳහා වරම් නොලබන තැනැත්තාට නබි තුමා ශාප කළේය. “අබුහුරෛරා රලි තුමා පවසන වගනම්: “ඔහු දුවිලි මෙන් අවමානයට පත්වේවා! ඔහු දුවිලි මෙන් අවමානයට පත්වේවා!” එවිට සහාබාවරු ඔවුන් කව්රුන්දැයි නබිතුමාගෙන් විමසුවෝය. ඊට පිළිතුරු දුන් නබිතුමා මෙසේ පැවසුවේය. ඔවුන් තම දෙමව්පියන් දෙදෙනාම හෝ ඉන් එක්කෙනෙකු මහලු වියට පත් වූ පසු ඔවුන් හට උපකාර කිරීමෙන් ස්වර්ගය අත්කර නොගන්නා අය බවයි”(මුස්ලිම් 6189).
ඉස්ලාම් දහමින් ජිවිතයේ සෑම අංශයක් ගැනම පෙන්වා දී තිබේ. මේ නිසා දෙමව්පියන් දරුවන් කෙරෙහිද දරුවන් දෙමව්පියන් කෙරෙහිද නිසි අවබෝදයෙන් කටයුතු කිරීම ලෞකික ජිවිතයේ මෙන්ම මතු ජිවිතයේ ජයග්‍රහණයට හේතුවක් වනු ඇත.
By Fasy Ajward. B.Sc(PhysicsSpecial)Hons.Japura.
Ex: Research officer at Ceylon Institute of Scientific and Industrial Research.
Twiter:- thetrue_path
Comments
Post a Comment