ඉස්ලාම් දහම තුල ලිංගික අධ්‍යාපනය (Sex Education in Islam)

බටහිර සංස්කෘතිය සහ ඉස්ලාමිය සංස්කෘතිය අතර විශාල වෙනස්කම් දැකිය හැකිය. ඒ අනුව බටහිර අධ්‍යාපනය ලබන අයට පාසල් අවදියේදීම ලිංගික අධාපනය ලබා දීම අත්‍යාවශ්‍ය කරුණක් වේ. එහෙත් ආසියානු රටවල්වල පවතින ආගමික පරිසරය තුල පාසල් යන කාලයේදී ලිංගික අධාපනයක් ලබා දීමේදී එය කල යුත්තේ දහමත් මුල් කරගෙනය. ඉස්ලාම් දහම අනුව ඕනෑම දෙයක් සිදු වීමට පෙර ඉන් ආරක්ෂා වන විදිය පෙන්වා දෙන්නේය. ඒ අනුව වයස හත වන විට ළමයින්ට සලාතය ඉටු කිරීමට පෙන්වා දිය යුතු අතර ඔවුන් නිදියන ඇඳවල් වෙන් කල යුතුය. තවද ලජ්ජා ශීලි කම කුඩා අවදියේ සිටම ඔවුන්ගේ සිත් තුලට ඇතුලත් කල යුතුය. 

සහජයෙන්ම මිනිස් ජිවිතයේ ඇතිවන පරිවර්තන ඒ ඒ අවදියේදී සිදු වෙමින් පවතින්නේය. එය මිනිසාට පමණක් නොව සෑම ජිවියෙකුටම අයත් වේ. එම හැඟීම් පාලනය කල යුත්තේ දහමින් පෙන්වාදී තිබෙන රාමුව තුලය. 

ඉස්ලාම් අංගසම්පුර්ණ දහමක් හැටියට මිනිස් හැඟීම් පාලනය කල යුතු අන්දම පෙන්වා දී තිබේ. එම මාර්ගෝපදේශ පිලිපැදීමෙන් යහපත් පුරවැසියෙක් විය හැකිය. උදාහරණයක් වශයෙන් පිරිමින් සහ කාන්තාවන් යම් වයස් සීමාවකදී වෙන් කල යුතුය. එසේම විරුද්ධ ලිංගිත අය මුණ ගැසෙන විට ඔවුන් අතර අනවශ්‍ය බැඳීම් ඇති නොවන ආකාරයට පාලනයක් ඇති කල යුතු ය. මේ නිසා මුස්ලිම් කාන්තාවන් නිවසින් පිටව යාමේදී තම මුළු ශරීරයම වැසෙන පරිදි ඇඳුම් අන්දින්නේය. පිරිමින්ට ලබා දී ඇති නියෝගය පරිදි ඔවුන් පිටස්තර කාන්තාවක් දුටු වහාම ඔවුන්ගේ බැල්ම පහත හෙළිය යුතුය. මෙම ක්‍රමය වැරදි ලිංගික ඇසුරෙන් වැළකීමට හොඳටම ප්‍රමාණවත් වේ. කෙසේ වෙතත් විවාහ ජිවිතයේදී ඇතිවන ප්‍රශ්න වලට පිළිතුරු ලබා දීම සඳහා වැඩ පිළිවෙලක් ඇතිකිරීම ඉස්ලාම් දහම අනුව වරදක් නොවේ.

බටහිර අධාපනය අනුව ලබා දෙන ලිංගික අධ්‍යාපනය නිසා ළමුන්ගේ ලජ්ජාශීලි බව නැතිවී යන්නේය. එබැවින් ඔවුන්ගේ ආගමික සහ සංස්කෘතික වටිනාකම් විනාශයට පත් විය හැකිය. බොහෝ විට බටහිර ලිංගික අධ්‍යාපනයෙන් සිදු වන්නේ  ආරක්ෂිතව ලිංගිකව හැසිරීමට උපදෙස් ලබා දීමකි. එවැනි දේවල් බටහිර සමාජයට නම් වැදගත් විය හැකිය. ඇයිද යත් එම සමාජය විවාහයට පෙර ඔවුන්ගේ පෙම්වතියන් සමග ලඟින් ඇසුරු කරන බැවිනි. එවැනි ලිංගික අධ්‍යාපනයක් ආසියානු රටවල් වලට ලබා දීමෙන් සිදු වන්නේ බොහෝ ළමුන්ගේ ලෞකික අධ්‍යාපනය කඩා කප්පල් වීමය. ඇයිද යත් ළමුන් වැදු පසු පාසල් යාම ආසියානු රටවල් වල සිටින ළමුන්ට නුහුරු දෙයක් වන නිසාය. විදේශයක සිදුවූ සත්‍ය සිදුවීමක් මෙහිදී ගෙන හැර දක්වන්නේ එම කරුණ සනාථ කිරීම සඳහාය. එක්තරා සිසුවියක් දෙමව්පියන්ගේ අවසරය ඇතුව ලිංගික අධ්‍යාපන චාරිකාවක් නිමා කොට නිවසට පැමිණ ඇත්තේ එම දරුවාගේ ශරීරයට වසර තුනක් දක්වා වලංගුවන උපත්පාලකයක් සමට යටින් රෝපණය කරගෙනය (three-year birth control implant- reported by Fox 23). මෙවැනි සිද්ධීන් වලින් පෙන්නුම් කරනු ලබන්නේ ලිංගික අධ්‍යාපනයේ මුඛ්‍ය පරමාර්ථය කුමක්ද යන්නයි. 

ලිංගික අධ්‍යාපනයකින් ලිංගිකතාවය, චිත්තවේගාත්මක ලිංගික හැසිරීම්, අන්‍යෝන්‍ය වගකීම්, මිනිස් ලිංගික ව්‍යුහවිද්‍යාව, ලිංගික ක්‍රියාකාරකම්, විවාහයට කැමැත්ත ප්‍රකාශ කළ යුතු වයස, උපත් පාලන ක්‍රම යනාදිය ඉගැන්විය යුත්තේ විවාහ වීමට සුදුසු කාලයේදීය. එබැවින් නිසි කලට පෙර එවැනි අධාපනයක් ලබා දීමෙන් සිදු වන්නේ ළමයින්ට සහජයෙන් ලැබී ඇති ලැජ්ජාශිලිබව නැති වී යාමය. එහි ප්‍රතිපල බටහිර රටවල් වල දැනටමත් අත්විඳිමින් ඇත. ලිංගික අධ්‍යාපනය නොතිබුණු යුගයට වඩා අද බොහෝ සමාජ රෝග ගැන ඇසීමට ලැබෙන්නේ එම නිසාය. 

පාසල් යන කාලයේදී ළමුන්ට ලබා දිය යුත්තේ ඔවුන්ගේ වයසට සුදුසු අධ්‍යාපනයකි. එබැවින් ඔවුන්ට ආගමික අධ්‍යාපනය ඇතුළු ලජ්ජාශීලි බව ඉගැන්වීම ප්‍රයෝජනවත් ය. සෑම ආගමකින්ම කාමය වරදවා හැසිරීම වරදක් බව උගන්වා ඇත. ඒ අතර ඉස්ලාම් දහම මේ සම්බන්දයෙන් බොහෝ නීති පනවා තිබේ. ඉන් අදහස් කරන්නේ යම් වරදක් වීමට පෙර එය වැළැක්වීමට සුදුසු පියවරවල් ගැනීම වේ. 

By Fasy Ajward.B.Sc(PhyscisSpecial)Hons,Japura.
Ex: Research officer at former Scientific and Industrial Research Institute.


https://www.facebook.com/thetruepathofislam
http://truepath1.blogspot.com/