ඉස්ලාම් දහම තුල ඉවසීම වෙනුවෙන් ඉහළ වටිනාකමක් ලැබෙන්නේ ඇයි? (Why is patience highly valued in Islam?)

සෑම ආගමකම ඉවසීමේ වැදගත්කම උගන්වා තිබේ. එහෙත් ඉස්ලාමීය ඉගැන්වීම අනුව ඉවසිලිවන්තයින් සමග අල්ලාහ් සිටින්නේය. මේ නිසා සෑම තරාතිරමකම අයට ඉවසීම අත්‍යාවශ්‍යවේ. ඒ අනුව තනිව ක්‍රියා කිරීමේදී මෙන්ම කණ්ඩායම් වශයෙන් ක්‍රියා කිරීමේදී ද පවුල් පාලනයේදී මෙන්ම රාජ්‍ය පාලනයේදී ද ඉවසීම තිබිය යුතුය. ඉවසීම නොමැති විට මිනිසාටත් තිරිසනාටත් අතර වෙනසක් නැති තරම් වේ. බොහෝ මිනීමැරුම්, දික්කසාද වීම්, ඥාතිත්වය සදහටම පලුදු වීම් වලට ප්‍රධාන හේතුවක් ලෙස පෙන්වා දිය හැක්කේ ඉවසීම නොමැති කමය. කුරානයේ එක් තැනක මෙසේ සඳහන් වේ. "තවද, නුඹලා අල්ලාහ්ටද ඔහුගේ දුතයාටද අවනත වන්න. නුඹලා අතර මතබේද ඇති නොකරන්න. එසේ වුයේ නම්, අධෛරියමත් වන අතර නුඹලාගේ ශක්තියද හීන වනු ඇත. ඉවසිලිවන්තව සිටින්න, නියතව ඉවසිලිවන්තයින් සමග අල්ලාහ් ද සිටින්නේය" (කුරානය 8:46).

ඉවසීම නායකත්වය සඳහාද තිබිය යුතු ඉතා වැදගත් ලක්ෂණයකි. අල්-කුරානයේ එක් තැනක මෙසේ සඳහන් වේ. "ඔවුන් ඉවසිලිවන්තයින් ලෙසද අපගේ වැකි ස්ථිරව විශ්වාස කරන්නන් ලෙසද සිටි කළ, ඔවුන් අතරින් යහමග පෙන්වන නායකයින්ව අපගේ අණ පරිදි පත් කළෙමු" (කුරානය 32:24). 

ඉවසීම නිසා ප්‍රශ්න වලට සාර්ථකව මුහුණ දීමට හැකි වන්නේය. කුරානයේ එක් තැනක මෙසේ සඳහන් වේ. "නුඹලා ඉවසිලිවන්තව (අල්ලාහ්ට) බියවී ක්‍රියා කලේ නම් ඔවුන්ගේ කුමන්ත්‍රණ නිසා ඔබලාට කිසිඳු පිඩාවක් නොකරන්නේය" (කුරානය 3:12). එහෙත් බොහෝ අය ඉවසීම වෙනුවට යම් කෙනෙකුගෙන් වරදක් සිදු වූ විට ඒ වෙනුවෙන් පලිගන්නේය. විශේෂ අවස්ථාවකදී මිස එවැනි පියවරවල් ගැනීම මුස්ලිම්වරයෙකුට සුදුසු නොවේ.

ඉස්ලාමීය ඉගැන්වීම අනුව මුස්ලිම්වරයෙකුට යම් අවශ්‍යතාවයක් තිබේ නම් මුලින්ම කල යුත්තේ ඉවසීමෙන් යුතුව සලාතය ඉටු කර අල්ලාහ්ගෙන් උදව් පැතීමය. මේ සම්බන්දයෙන් කුරානයෙන් මෙසේ සඳහන් කොට ඇත. "ඉවසිමෙන්ද, සලාතය ඉටු කිරීමෙන්ද, (අල්ලාහ්ගෙන්) උදවු පතන්න. නියත වශයෙන්ම එය සත්‍යය විශ්වාසයින්ට මිස අනෙක් අයට බරක් වේ" (කුරානය 2:45). එහෙත් බොහෝ අය කරන්නේ තම ශක්තිය කෙරෙහි විශ්වාසය තබමින් කටයුතු කිරීම ය. එසේ කරන විට අල්ලාහ්ගේ උදව් නොලැබී යා හැකිය.

ඉවසිලිවන්තයින් සමග අල්ලාහ් සිටින විට ඊට වඩා දෙයක් අවශ්‍ය වේද? මේ සඳහා කුරානය තුල බොහෝ උදාහරණ තිබේ. යුසුෆ් නබිතුමාගේ සහෝදරයින් විසින් ඔහුව පාළු ලිඳක දමා විත් ඔහුගේ පියා වන යඃකුබ් නබිතුමා හට බොරු පුවතක් සැල කල අවස්තාවේදී එතුමා එය බොරුවක් බව දැනගෙනත් ඉවසීමෙන් ක්‍රියා කළේය. කෙසේ වෙතත් වසර දහයක් පමණ දුක සේ තම ආදරනීය පුතුන්ගෙන් වෙන් වී සිටීම හේතුවෙන් යඃකුබ් නබි තුමාගේ දෑස් නොපෙනී ගියේය. කෙසේ වෙතත් යඃකුබ් නබි තුමාගේ ඉවසීමේ ප්‍රතිපලයක් ලෙස නැවතත් යුසුෆ් නබිතුමා ඇතුළු පව්ලේ සියලු දෙනාම එකතු විය. තවද අල්ලාහ්ගේ ආශීර්වාදයෙන් යඃකුබ් නබි තුමාගේ දෑස්වල පෙනුමද යතා තත්වයට පත් විය. යුසුෆ් නබි තුමා ඊජිප්තුවේ ධාන්‍යාගාරයට අධිපති විය. 

ඉවසීම දුර්වලතාවයක් නොවේ. ඇත්ත වශයෙන්ම ඉවසීම සඳහාද ධෛරියවන්ත මනෝභාවයක් තිබිය යුතු ය. ඒ අනුව එය සෑම කෙනෙකුටම කල හැකි දෙයක් නොවේ. කෙසේ වෙතත් අල්ලාහ් වෙනුවෙන් ඉවසන තැනැත්තාට ලැබෙන කුලිය සඳහා සිමාවක් නැති බව කුරානයේ සඳහන් කොට ඇත.

මුස්ලිම්වරයෙකුට තම කාලය වෙන් කොට සලාතය ඉටු කිරීම සඳහාද ඉවසීම අවශ්‍යය. එසේම දවස පුරා නිරාහාරව සිට උපවාස ඉටු කිරීම සඳහාද ඉවසීම අවශ්‍යය. තමන් මහන්සියෙන් උපයාගත් ධනයන් කොටසක් zසකාත් වශයෙන් නැති බැරි අය වෙනුවෙන් ලබා දීමටත් එක්තරා ඉවසීමක් අවශ්‍යය. එසේම හජ් වන්දනය ඉටු කිරීම සඳහා සුදුසුකම් සපුරා තිබුනත් එය ඉටු කිරීම සඳහා කැපකිරීමක් සහ ඉවසීමක් අවශ්‍ය ය. එහෙත් මේ සෑම දෙයක් වෙනුවෙන් ම ලැබෙන කුලිය අති විශාලය. එනම් ස්වර්ගය ඒ සඳහා ලැබෙන කුලිය වේ. ස්වර්ග ජිවිතයට නිමක් නැත. එහි ලෙඩ රෝග වැළඳෙන්නේ නැත. සදාකල් තරුණ වියේ පසු වන්නේය. සිතන පතන සෑම දෙයක්ම එහිදී ලැබෙන්නේය. එහෙත් ඒ සඳහා උත්සාහ කරන්නේ ඉතා සුළු පිරිසකි. 

By Fasy Ajward.B.Sc(Special)Hons.
Ex: Research officer at Ceylon Institute of Scientific and Industrial Research.
https://www.facebook.com/thetruepathofislam
http://truepath1.blogspot.com/
Twiter:- thetrue_path