ජීවිතයේ අරමුණ කුමක්ද? (What is the purpose of life?)

සෑම නිර්මාණයක් පිටුපසම අරමුණක් තිබේ. එය හරිහැටි දන්නේ එම නිර්මාණය කල තැනැත්තා පමණි. ඒ අනුව මිනිස් ජීවිතයටත් නිශ්චිත අරමුණක් තිබිය යුතුය. එම අරමුණ නිශ්චිතව දන්නේ මිනිසාගේ මැවුම්කරු වන අල්ලාහ් ය. අල්ලාහ් දෙවිඳුන් විසින් පහළ කරන ලද සෑම දහම් පණිවිඩයකින්ම මිනිස් ජිවිතයේ අරමුණ පැහැදිලි කොට තිබේ. කෙසේ වෙතත් බොහෝ අය ජිවත් වන්නේ ලෞකික ජිවිතය ජය ගැනීම සඳහා පමණි. මේ නිසා ඔවුන් මතු ජීවිතය ගැන සැලකිල්ලක් දක්වන්නේ නැත. කෙසේ වෙතත් යම් කිසි දවසකදී මරණයට පත්වන බව දැනගෙන ජිවත් වීම වඩා සුදුසුය. 

කිසිම දෙයක් ඉබේ ඇති වන්නේ නැත. එය විශ්ව සත්‍යයකි. ඒ අනුව මෙම විශ්වය සහ එහි ඇති සියලුම දේවල් මැවූ සර්වබලධාරී දෙවි කෙනෙක් සිටිය යුතුමය. එහෙත් එම දෙවියන් කිසිවෙකුගේ මැවීමක් විය නොහැකිය. ඇයිද යත් දෙවියන්ව මැවූ වෙනත් දෙවි කෙනෙකු සිටින්නේ නම් එහි සීමාවක් නොමැතිව ආපස්සට යා හැකිය. එහෙත් එහි කෙළවරක් දැකීමට ලැබෙන්නේ නැත. මේ නිසා සෑම දෙයක්ම යම් නිශ්චිත දෙවි කෙනෙකුගෙන් ආරම්භ විය යුතුය. ඉස්ලාම් දහම අනුව ඔහු ආරම්භයක් හෝ අවසානයක් නොමැති සර්වබලධාරී අල්ලාහ් ය.

දෙවියන්ගේ නියෝජිතයින් වන නබිවරුන් විසින් දක්වන ලද හාස්කම් හරහා දෙවියන්ගේ පැවැත්ම සනාථ කල හැකිය. උදාහරණයක් වශයෙන් ජේසු තුමා මළවුන් නැගිට්ටුවේය. තවද උපතින්ම අන්ද වූ අයට පෙනුම ලබා දුන්නේය. එවැනි දේවල් දෙවියන්ගේ උදව්වෙන්ම මිස වෙන කිසිම ක්‍රමයකින් සිදු කල නොහැකිය. මේ අකාරයටම ලොව පහළ වූ  සෑම නබිවරයෙක්ම දෙවියන්ගේ උදව් ඇතිව හාස්කම් පා තිබේ. මෙවැනි හාස්කම් පෑමට අද නබිවරයෙකු ජිවතුන් අතර නැතත් මුහම්මද් නබි තුමාට පහළ වූ අල් කුරානය ජීවමාන ප්‍රාතිහාරයක් වේ.

සත්ව ලෝකය තුල මිනිසාට සුවිශේෂී තැනක් හිමිවේ. ඇයිද යත් මිනිසාට නොයෙකුත් භාෂාවන් කතා කල හැකිය. කිසිම ජීවියෙකුට නොදෙවෙනි බුද්ධියක් ලැබී තිබේ. එපමණක් නොව ජීවින් අතරින් ආගමක් අදහන එකම ජීවියා මිනිසාය. මෙවැනි දෙයක් සිදු වන්නේ මිනිසා දෙවියන්ගේ විශේෂ මැවීමක් නිසාය. අල් කුරානයට අනුව මිනිසාව මවා තිබෙන්නේ දෙවියන්ව හොඳින් තේරුම් ගෙන ඔහුට පමණක් නැමදීම සඳහා ය. එසේ නොකරන්නේ නම් මිනිසාගේත් සෙසු ජිවින්ගේත් වෙනසක් නැත.

දෙවියන් පහළ කල සෑම දහම් පණිවිඩයකින්ම කියවෙන්නේ ලෞකික ජීවිතය නිමක් නැති සංසාර ගමනේ එක් අවස්තාවක් පමණක් බවයි. ඒ අනුව මිනිසා මරණයෙන් පසු තවත් ජිවිතයකට සුදානම් විය යුතුය. එම ජිවිතයට කෙළවරක් නැති බව දහම් පණිවිඩවලින් කියැවේ. එහෙත් එම ජිවිතයේ ජය හෝ පරාජය තීරණය කරනු ලබන්නේ මෙලොවදී කරන ලද පින් දහම් අනුවය. එය සිදු කරනු ලබන්නේ දේව විනිශ්චයකින් පසුවය. 

මෙලොව ඉපදිනු සෑම ආත්මයක්ම විනිශ්චය දිනයේදී ඒ සඳහා නියමිත ස්ථානයට එක්රැස් කිරීමට නියමිතය. එහෙත් එම දිනයේදී කෙනෙකුගෙන් කෙනෙකුට උදව් කිරීමට නොහැකිය. මේ නිසා තම තමන් මෙලොවදී කල කුසල් අනුව අවසානය තීන්දු කිරීමට නියමිතය. කෙසේ වෙතත් දෙවියන්ගේ ඒකීයත්වය විශ්වාස නොකළ කිසිවෙකුට ස්වර්ගය ලැබෙන්නේ නැත. මේ නිසා මරණයට කලින් තමන්ගේ මැවුම්කරු ගැන හරි හැටි දැනගෙන ඔහු පෙන්වා දී ඇති මාර්ගයේ ගමන් කිරීම තම තමන්ගේ විමුක්තියට හේතුවක් වේ.

By Fasy Ajward,B.Sc(Special)Hons.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twiter:- thetrue_path