මරණින් මතු ජීවිතය පිළිබඳ ඉස්ලාමීය විශ්වාසය (Islamic belief in life after death)
ලෞකික ජිවිතය දිගු ගමනක එක් අදියරක් පමණි. එය කොතරම් කෙටි ද යත්, ගමනක් යන විට විඩාව හැරීම සඳහා ගසක් යට රැඳී සිටි ටික කාලයට සමාන කල හැකිය. එහි සබැ සමය ඇත්තේ මරණින් මතු ජිවිතයේදීය. ලෞකික ජීවිතය ඇත්තේ ඊට සුදානම් වීම සඳහා ය. අල් කුරානයට අනුව ලෞකික ජීවිතය පරීක්ෂාවකි. සෑම කෙනෙක්ම ඊට මුහුණ දිය යුතුය.
ඉස්ලාම් දහම අනුව මිය යන කිසිවෙකු නැවත, නැවත උපදින්නේ නැත. ඒ අනුව මරණයට පත්වෙන සෑම ආත්මයක්ම වින්ශ්චය දිනය දක්වා සොහොන් ජිවිතය ගත කල යුතුය. විනිශ්චය දිනය යනු දෙවියන් නියම කල දිනයකදී සෑම ආත්මයක්ම නැවත නැගිටවා ප්‍රශ්න කරන දිනය වේ. එම දිනය අපගේ ගණන් ගැනීම අනුව වසර පනස්දහසක් වූ එක් දිනයකි. එම දිනයේදී සෑම ආත්මයක්ම කැඳවා ඔවුන් මෙලොවදී ක්‍රියා කල අන්දම ගැන වෙන වෙනම ප්‍රශ්න කිරීමට නියමිතය. එම විනිශ්චයට සාර්ථකව මුහුණ දුන් අයට ස්වර්ගයත් අනෙක් අයට නිරයත් ලබා දීමට නියමිතය.
මිනිසාගේ සීමිත දැනුමෙන් මතු ජීවිතය ගැන දැනගැනීමට නොහැකිය. ඒ අනුව මතු ජීවිතය ගැන දැනගත හැක්කේ දෙවියන් පහළ කරන ලද දහම් පනිවිදයකින්ම පමණි. අල් කුරානය මෙලොවට පහළ වූ අවසාන දේව පණිවිඩය වේ. මරණයෙන් පසු නැවත නැගිටවිමක් නැතැයි කියන අයට කුරානයෙන් මෙසේ පිළිතුරු දී තිබේ. “අහෝ අපගේ ශෝකයි! අපව අපගේ (සොහොන් වන) නිදා සිටි ස්ථානයන්ගෙන් නැගිට්ටෙව්වේ කවරෙක් දැයි (ඔවුන්) විමසන්නෝය (එවිට දේවදුතයින්) “රහ්මාන් (ඔබට) දුන් පොරොන්දුව නබිවරුන් (ඔබට) සත්‍යය යැයි ගෙනහැර දැක්වුයේද මෙය”යි (කියනු ලැබේ). එය එකම එක ශබ්දයක් මිස (වෙන කිසිවක්) නොවන්නේය. ඒ ඇතුලත ඔවුන් සියල්ලෝම අප වෙත ඒකරාශී කරගෙන එනු ලබන්නෝය. තවද එදින කිසිම ආත්මයකට කිසිම අසාධාරණයක් නොකරනු ලබන්නේය. ඔබ කල දැයට (පමණක්) ඔබට පලවිපාක දෙනුලබන්නේය" (කුරානය 36:51-54).
කෙසේ වෙතත් ඇතැමුන් මරණයෙන් පසු නැවත නැගිටවිමක් ගැන විශ්වාස කරන්නේ නැත. ඔවුන් විශ්වාස කරන්නේ මිය ගිය පසු ශරීරය පසට දිරාපත් වන බවත් ඉන් පසු ජීවිතය කෙළවර වන බවත් ය. මේ නිසා ඔවුන් නැවත නැගිටවිම සමච්චල් කරති. එහෙත් අල් කුරානය එවැනි අයට මෙසේ පිළිතුරු දෙන්නේය. “කිමෙක්ද! අපි මරණයෙන් පසු (දිරා) ඇටකටු හා දුවිලි බවට පත්වුවායින් පසු ඇත්තෙන්ම අපිට පන දී නැගිටවනු ලබන්නෙමුද?” “(එසේම) පෙර ඉකුත්වූ අපගේ පියවරුන් (නැගිට්ටවනු ලබන්නෙහු) දැ"යි (සමච්චලයෙන් මෙන් ඔවුන්) කියමින් සිටියෝය. (නබියේ!) ඔබ මෙසේ පවසනු. ඇත්තෙන්ම ඔබට පෙර සිටිය වුන්ද පසුව සිටිය වුන්ද නියමිත දිනයකදී (පන දී නැගිට්ටවනු ලැබ) ඒකරාශී කරනු ලබන්නේහුය” (කුරානය 56:47-50).
කුරානයේ බොහෝ අනාවැකි සහ විද්‍යාත්මක සත්‍යයන් සඳහන් කොට තිබේ. ඒවායින් බොහොමයක් සත්‍යය කරුණු බව දැනට විද්‍යාව ලබා ඇති දැනුමෙන් සනාත කොට තිබේ. එසේම එහි සඳහන් කිසිම කරුණක් වැරදි බවට සොයාගෙන නැත. ඒ අනුව කුරානයේ ඇති අනෙක් කරුණුද කාලයාගේ ඇවෑමෙන් සනාත වනු ඇත. කෙසේ වෙතත් මතු ජීවිතය සම්බන්ද දේවල් සනාත වන විට ඊට සුදානම් නොවූ අය පසුතැවිලි වනවා හැර කල හැකි දෙයක් ඉතිරි වන්නේ නැත.
නබිතුමාගේ හදිසයකට අනුව කෙනෙක් මිය ගිය පසු ඔහුගෙන් ප්‍රශ්න කිරීම ආරම්භ වන්නේ සොහොනේදිය. ඒ අනුව කෙනෙක්ව භූමිදානය කළ පසු දේවදුතයින් දෙදෙනෙකු පැමිණ ඔහුව නැගිටුවා ප්‍රශ්න කිරීමට නියමිතය. එම දේවදුතයින්ගේ ප්‍රශ්න වලට නිවැරදිව පිළිතුරු දෙන තැනැත්තන්ට විනිශ්චය දිනය දක්වා සොහොන් ජීවිතය සතුටින් ගත කිරීමට ලැබෙන්නේය. අනෙක් අයට විනිශ්චය දිනය දක්වා සොහොනේදී දඬුවම් කරනු ලැබේ. සොහොන් ජිවිතය කෙල්වර වීමත් සමග විනිශ්චය දිනය ආරම්භ වේ. ඒ අනුව ඊට නියමිත දේවදුතයා විසින් දෙවන වර නලාව පිඹීමෙන් පසු සොහොන්වල සිටින සියලු දෙනා ඉන් පිටතට පැමිණෙන අතර ඔවුන්ව විනිශ්චය සිදු කිරීමට නියමිත ස්ථානය කරා රැගෙන යනු ඇත.
විනිශ්චය දිනය ඉතා භයානක ය. එම දිනයේදී සුර්යයා ඉතා සමීපයට ගෙන එනු ලැබේ. අහස සහ පොලොව වෙනත් අකාරයකට පත් කරනු ලැබේ. ඒ අනුව මිනිසුන් එක් එක්කෙනා කල පව් වල තරම අනුව දහඩියේ ගිලී යන්නේය. කෙසේ වෙතත් එම දිනයට සුදානම් වෙමින් මෙලොවදී පින් දහම් කල අය අල්ලාහ්ගේ අර්ෂ්හි සෙවන තුල රැඳී සිටිනු ඇත.
එම දිනයේදී සාක්ෂි කැඳවනු ලබන්නේ මිනිසාගේම ශරීර අවයව වලින් වීම විශේෂත්වයකි. ඒ සම්බන්දයෙන් අල් කුරානය තුල මෙසේ දැකිය හැකිය. "අද දවසෙහි ඔවුන්ගේ මුඛයෙහි මුද්‍රා තබන්නෙමු. ඔවුන් කරමින් සිටි දේ ගැන, ඔවුන්ගේ අත් අප සමග කථා කරන්නේය. තවද, ඔවුන්ගේ පා සාක්ෂි දරන්නේය" (කුරානය 36:65). මේ නිසා කිසිම වැරදි කරුවෙකුට එම දිනයේදී ගැලවුමක් ලැබෙන්නේ නැත.
සොහොනින් නැගිටවනු ලැබූ සෑම කෙනෙකුටම ඔවුන් මෙලොවදී කල කී සෑම දෙයක් ගැනම ලියවිල්ලක් භාර දෙනු ලැබේ. එහි තමන් විසින් කරන ලද දේවල් අනු පිළිවෙලට සඳහන් වී තිබීම දැක මවිතයට පත්වී ඔවුන් කරන ලද දේවල් වලට වඩා කිසිම දෙයක් වැඩියෙන් හෝ අඩුවෙන් සඳහන් නොවී ඇතැයි පවසන්නේය.
මෙම දේව විනිශ්චයෙන් පසු මිනිසා, මිනිසාට කල වැරදි සමතයකට පත්කර ගැනීම සඳහා අවස්තාවක් දෙනු ලැබේ. ඒ අනුව මනු ලොවේදී කෙනෙකුට කෙනෙක් කල වැරදි වෙනුවෙන් තමන් රැගෙන ගිය කුසල් වලින් වන්දි ගෙවිය යුතු ය. එහි ප්‍රතිපලයක් ලෙස නිරයට නියම වූ ඇතැම් අය ස්වර්ගයටත් ස්වර්ගයට නියම වූ ඇතැම් අය නිරයටත් යන්නේය.
නිරය ඉතා භයානක තැනක් වේ. එහෙත් බොහෝ අය මේ ලෝකයේදී ඒ ගැන කිසිම තැකීමක් නොමැතිව කල් ගෙවන්නේය. නිරයේ වේදනාව සදාකල් ය. නිරයට යන අය ගැන කුරානයේ මෙසේ විස්තර කොට ඇත. "නියතව කවරහු අපගේ වැකි ප්‍රතික්ෂේප කළෝද ඔවුන්ව අපි නිරයේ ඇතුළු කරන්නෙමු. ඔවුන් වේදනාව අත්විඳිම පිණිස ඔවුන්ගේ සම පිළිස්සෙන සෑම අවස්ථාවකම අපි ඔවුන්ට වෙනත් සම් මාරු කරන්නෙමු. නියතව අල්ලාහ් සියළු දෑ අභිබවූ කෙනා ද අධික ඥානවන්තයා ද වේ" (කුරානය 4:56).
නිරය ඉතා වේදනාකාරී තැනක් වුවද ඊට ඇතුළුවන පිරිස ඉතා විශාල ය. එතරම් විශාල පිරිසක් නිරයට ඇතුළු වීම දැක නිරයට භාරව සිටින දේවදුතයින් පුදුමයට පත් වේ. ඔවුන් ගැන කුරානයේ මෙලෙස විස්තර කොට ඇත. "ප්‍රතික්ෂේප කළවුන් කණ්ඩායම් වශයෙන් නිරය කරා ඇදගෙන එනු ලබන්නේය. ඔවුන් එහි පැමිණි කල එහි දොරටු විවුර්ත කරනු ලබන්නේය. එවිට එහි ආරක්ෂකයෝ ඔවුන්ගෙන්, 'නුඹලාගේ සමිඳුන්ගේ වැකි නුඹලාට කියවා පෙන්වා, නුඹලාගේ මෙම දවසෙහි හමුවීම ගැන අවවාද කරන දුතයෝ නුඹලා අතරින්ම නුඹලා හමුවට නොපැමිනියෙහිදැ'යි ප්‍රශ්න කරනු ඇත. එවිට ඔවුන් පැමිණියේයැයි පවසන්නෝය. මෙලෙස ප්‍රතික්ෂේප කරන්නන් කෙරෙහි වේදනාවෙහි වදන තහවුරු කරනු ලබන්නේය" (කුරානය 39:71).
ලෞකික ජීවිතයේදී මොන තරම් කරදර පැමිණියත් ඒවා දෙවියන්ගේ නාමයෙන් ඉවසගෙන යහ මගෙහි ගමන් කල අයට මතු ජීවිතයේදී ස්වර්ගය ලැබීමට නියමිතය. ස්වර්ගය ගැන කුරානයේ බොහෝ විස්තර දැකිය හැකිය. කුරානයේ එක් තැනක ස්වර්ගය ගැන මෙසේ විස්තර කොට තිබේ. "(ස්වර්ගවාසින්) රන් හා දියමන්ති වලින් විසිතුරු කරන ලද සිංහාසනයන් මත කෙනෙකුට කෙනෙකු මුහුණ ලා හාන්සි වී සිටිනු ඇත. වෙනස් නොවන තරුණ වියෙහිම පසුවන තරුණයින් (සේවය සඳහා සෑම විටම) මොවුන් වටා සැරසෙමින් සිටිනු ඇත. මිහිරි රසැති පානයන්ගෙන් පිරි භාජනද, කෙණ්ඩිද රැගෙන (ඔවුන් වටා සැරසෙමින් සිටිනු ඇත). ඒවා පානය කිරීමෙන් මොවුන්ට හිසරදය ද වෙරි මතද ඇති නොවනු ඇත" (කුරානය 56:15-19).
http://truepath1.blogspot.com/
Twiter:- thetrue_path
Comments
Post a Comment