මිනිසා ආරම්භ වන්නේ ආදම්තුමාගෙන් බවත් මුල්ම කාන්තාව බිහි වන්නේ ආදම්තුමාගේ ඉල ඇටයකින් බවත් කුරානයේ මෙන්ම අනෙක් ප්‍රධාන ආගම් සියල්ලෙන්ම කියැවේ. ඔවුන් දෙදෙනාගෙන් මිනිස් පරපුර බිහි වේ. ඒ අනුව මිනිසාගේ මුල් වාසස්ථානය ස්වර්ගය යි. ආදම්තුමා ස්වර්ගයේදී තහනම් ගසේ ගෙඩි කෑම නිසා දඬුවමක් වශයෙන් මෙලොවට පැමිණ ඇත.
මිනිසාට මෙලොව ජීවිතය පරීක්ෂාවක් බව කුරානයේ සඳහන් වේ. ඒ අනුව මෙලොවදී මිනිසා මුහුණ පාන පරීක්ෂාවන්ට සාර්ථක ලෙස මුහුණ දීමෙන් මුල් වාසස්ථානය වෙත නැවතත් යාහැකිය. එහෙත් වැරදි මාර්ගය තෝරා ගත් විට තවත් අදියරක් පහලට ගොස් නිරයට යා හැකිය. එසේ බලන කල ලෞකික ජීවිතය කෙළවරක් නැති ගමනක එක් අධියරක් පමණි.
මිනිසා මෙලොවට පැමිණීමට පෙර ආත්මීය ලොවේ සිට ඇත. මවක් ගැබ් ගත් පසු දේවදුතයෙකු විසින් ආත්මයක් රැගෙන විත් මව් කුසට ඇතුලත් කරන්නේය. කෙනෙකුගේ මරණය ලඟා වූ විට තවත් දේවදුතයෙකු පැමිණ ඔහුගේ ආත්මය අත්පත් කර ගෙන යන්නේය. එහෙත් පිනක් හෝ පවක් නොකර මෙලොවට පැමිණි ආත්මය නැවත හැරී යන්නේ තමන් කල පින් සහ පව්ද සමගය. කෙනෙකුගේ මතු ජිවිතයේ සාර්ථකත්වය හෝ අසාර්ථකත්වය රඳා පවතින්නේ එහි ප්‍රතිපල අනුවය.
"සෑම ආත්මයක්ම මරණය අත්විඳින්නේම ය. විනිශ්චය දිනයේදී නුඹලාට අයත් කුලිය පුර්ණව දෙනු ලබන්නේය. කවරෙක් නිරයෙන් ඈත් කරවනු ලැබ ස්වර්ගයට ඇතුලත් කරනු ලබන්නේද ජයග්‍රාහකයා ඔහුම වේ. මෙලෝ ජීවිතය රැවටිල්ලක් මිස වෙන නොමැත" (කුරානය 3:185).
ලෞකික ජීවිතය රැවටිල්ලක් මිස වෙන කිසිවක් නොවන බව ඉහත දැක්වෙන කුරආන් වැකියේ සඳහන් වේ. එසේ තිබියදීත් බොහෝ අය තාවකාලික ජිවිතයේ සතුට පමණක් තෝරා ගනිති. ඔවුන්ට මරණයෙන් පසු ගෙන යෑම සඳහා කිසිවක් ඉතිරි වන්නේ නැත. තවත් පිරිසක් මතු ජීවිතය ගැන සිතා කටයුතු කරන්නේය. ඔවුන් මතු ජීවිතයේදී ස්වර්ගය අත්කර ගැනීමට අවශ්‍ය දේවල් සමග එලොවට යන්නේය. මේ හේතුවෙන් ඔවුන් තම මුල් වාසස්ථානය වන ස්වර්ගයට නැවත යාමට නියමිතය.
කෙසේ වෙතත් රැදවල් නොබලා මෙලොව ජිවිතයට පමණක් වස්තුව එකතු කල සෑම කෙනෙක්ම ඒවා තවත් කෙනෙකු වෙනුවෙන් ඉතිරිකොට හිස් අතින් අවසන් ගමන් යාමට නියමිතය. එසේ තිබියදී මරණින් පසු ජිවිතය විශ්වාස කොට ඒ සඳහා පින් දහම් කල අය ඔවුන් කල කුසල් සමග අවසන් ගමන් යාමට නියමිතය. ඇත්ත වශයෙන්ම ඔවුන් වසනා වන්තයෝ වෙති.
මිනිසාට නිවැරදි මාර්ගය පෙන්වා දීම සඳහා සිය දහසකට වඩා නබිවරුන් මෙලොවට පැමිණ තිබේ. සෑම නබිවරයෙකුම කලේ අල්ලාහ්ගෙන් ලැබුණු දහම් පණිවිඩය මිනිසාට ප්‍රචාරය කිරීමය. මිනිසුන්ගෙන් එක් කණ්ඩායමක් ඒවා අනුගමනය කරන්නේය. තවත් කණ්ඩායමක් එම දහම් පණිවිඩ වෙනුවට වෙනත් දේවල් අනුගමනය කරන්නේය. තවත් පිරිසක් දහමක් පිලිපදින්නේම නැත. මොනවා කලත් නියමිත වේලාව පැමිණි කල මරණය වැළඳ ගැනීමට සිදුවේ. ඉන් පසු තමන් වපුරපු දේවල් වල පල නෙලා ගැනීමට සිදු වනු ඇත.
By Fasy Ajward.B.Sc (PhysicsSpecial) Hons.Japura.
Ex: Research officer at Ceylon Institute of Scientific and Industrial Research.
Twitter:-thetrue_path
Comments
Post a Comment