මුස්ලිම්වරුන් පිළිබඳව ගොඩනැගී ඇති වැරදි මත (Misconceptions about Muslims)

ඈත ඉතිහාසයේදී මුස්ලිම්වරුන් සහ සිංහල ජනතාව අතර ඉතා හොඳ විශ්වාසයක් ගොඩ නැගී තිබුනේය. ඒ අනුව සිංහල රජවරුන් ඉතිහාසයේදී මුස්ලිම්වරුන්ට තාන්න මාන්න සහ විශේෂ පදවි පිරිනමා තිබුනේය. බොහෝ විට පැරණි රජවරුන් විදේශ තානාපති සම්බන්දකම් පවත්වා තිබුනේ මුස්ලිම්වරුන් හරහාය. තවද සතුරු ආක්‍රමණ වලදී මුස්ලිම්වරුන් වෙනත් මුස්ලිම් රටවල් වලින් හමුදාව ගෙන්වා ලංකාව වෙනුවෙන් සටන් කල ඉතිහාසයක් ද තිබේ.  කෙසේ වෙතත් මෑත ඉතිහාසය ගත්කල ඇතැමුන්ගේ පටු පරමාර්ථයන් ඉටු කර ගැනීම සඳහා මුස්ලිම්වරුන් පිළිබද අනිසි බියක් ඇති කොට තිබේ. ඒ අනුව මුස්ලිම්වරුන්ව ආශ්‍රය කල අය හැර සෙසු අයට ඇත්තේ මුස්ලිම්වරුන් පිළිබඳව සැකයක් සහ භීතියක් පමණි. මෙය හොඳින් දැක ගත හැක්කේ මුස්ලිම්වරුන්ව ආශ්‍රය කොට නොමැති ග්‍රාමීය ජනතාව අතරය. කෙසේ වෙතත් නාගරික පාසල්වල ඉගෙන ගන්නා සිංහල ළමුන් මුස්ලිම් ළමුන්ව ආශ්‍රය කොට ඇති බැවින් ඔවුන් අතර ඉතා හොඳ බැඳීමක් දැක ගත හැකිය.

නවීන ලෝකයේ මුදලට සහ බලයට විශේෂ තැනක් හිමිවී ඇත. එය රැක ගැනීමේ ප්‍රධාන උපාය ක්‍රමයක් ලෙස ලොව පුරා වෙසෙන ජාතීන් බෙදා වෙන් කොට ඒ මත බලය රැක ගැනීමේ වැඩපිළිවෙලක් දැන් දියත් වෙමින් තිබේ. මේ සඳහා ඉතා සුක්ෂම වැඩපිළිවෙලවල් ක්‍රියාත්මක කරනු දැකිය හැකිය. එහි ප්‍රතිපලයක් ලෙස අතලොස්සක් දෙනා සුර සැප විඳින අතර බහුතරයක් ජනතාව සැමදාම කුලල් කාගන්නේය. බලය හොබවන අයට අවශ්‍යය වන්නේද එයයි. 

ඉස්ලාම් දහම ගැන වැරදි මත සමාජ ගත වීමට ප්‍රධාන හේතුවක් වන්නේ එම දහම ගැන නිවැරැදි තතු ලෝකයට හරියාකාරව විවෘත නොවීමයි. මෙම දුර්වලතාවයෙන් ප්‍රයෝජන ගැනීමට මාන බලා සිටින ඇතැම් අය කරන්නේ එය ඔවුන්ගේ වාසියට හරවා ගැනීමයි. උදාහරණයක් වශයෙන් එක්තරා ස්වාමින්වහන්සේ කෙනෙක් ඉස්ලාමිය විද්වතෙක් ලබා දුන් ෆත්වා හෙවත් ආගමික තීන්දුවක් යැයි පවසමින් කිසිම මුලාශ්‍රයක් ඉදිරිපත් නොකර ඉස්ලාම් දහම පිලිබදව සාවද්‍යය වෛරී ප්‍රකාශයක් සිදු කර තිබුනේය. ඔහු පවසන්නේ යුදෙව් කාන්තාවන්ගේ බඩේ සිටින දරුවා කපා කොට විනාශ කල යුතු බවට යුසුෆ් කර්ලාවී යන විද්වතා තීන්දුවක් හෙවත් ෆත්වා එකක් දී ඇති බවයි. ඔහු එසේ පැවසුවත් ඉස්ලාම් දහම අනුව හේතුවක් නොමැතිව එක් මිනිස් ඝාතනයක් සිදු කිරීම ලොවැසියන් සියලු දෙනා ඝාතනය කලාට සමාන බව අල්-කුරානයේ සඳහන් වේ. එසේ තිබියදී කාන්තාවකගේ බඩේ සිටින දරුවා කපා ඝාතනය කිරීමට ඉඩ ලැබෙන්නේ කෙසේ දැයි සිතා බැලිය යුතු නොවේද? ඒ අනුව එම ස්වාමින් වහන්සේ කරන්නේ බොරු ප්‍රචාර තුලින් ජාතින් අතර වෛරය වැපිරීමයි. එම ස්වාමින්වහන්සේ මෙසේද පවසා තිබුනේය. ඉහ්වාන් මුස්ලිමින් සංවිදානය දී තිබෙන තීරණය අනුව දෙවියන් උදෙසා මිනී මැරිය යුතු වන්නේය. එහෙත් මෙය කිසිසේත්ම පිළිගත නොහැකිය. එවැනි තීරණයකට පැමිණීම සඳහා ඉස්ලාම් දහම තුල කිසිම මුලාශ්‍රයක් දැකිය නොහැකිය.

ඇතැම් අය අල්-කුරානයේ යුද්ධය සම්බන්ද වැකි ඇතුලත්ව තිබීම ප්‍රයෝජනයට ගෙන ඉස්ලාම් දහමට මඩ ගසන්නේය. එහෙත් එම වැකි පහළ වී තිබෙන්නේ ලෝකයේ සාමය ඇති කිරීම සඳහය. අල්-කුරානයේ පමණක් නොව එක්සත් ජාතීන්ගේ සාම මණ්ඩලයේ පවා නිත්‍යය බට කණ්ඩායම් සිටින්නේය. ඊට හේතුව අවශ්‍යය විටකදී සාමය වෙනුවෙන් ක්‍රියා කිරීමටය. එසේ තිබියදී ඇතැම් අය කරන්නේ කුරානයේ ඇති යුද්ධයකට ආදාළ වැකි සන්දර්බයෙන් තොරව අසුලාගෙන ජනතාව මුලා කිරීමයි. ඇත්ත වශයෙන්ම බුද්ධිමත්ව අල්-කුරානය හදාරා බලන්නේ නම් සත්‍යය වැටහෙනු ඇත.

ඉස්ලාම් දහම අනුව සතුරා යුද්ධය ආරම්භ කරනු තුරු යුද්ධයකට මුල පිරිය නොහැකිය. එසේ තිබියදී කුමන ජාතියකට අයත් වුවත් ත්‍රස්තවාදීන් කරන්නේ ඔවුන්ගේ පෞද්ගලික උවමනාවන් සඳහා අහිංසක මිනිසුන් ඝාතනය කිරීමයි. උදාහරණයක් වශයෙන් මුස්ලිම්වරුන් දේව මෙහෙය සඳහා සහභාගී වෙමින් සිටියේදී නවසීලන්තයේ සිටි ත්‍රස්තවාදියෙක් කලෙත් එවැනිම වරදකි.

ඕනෑම ආගමක වැරදි කරන අය නැතුවා නොවේ. ඒ අනුව මුස්ලිම්වරුන් අතරත් වැරදි කරන අය දැකිය හැකිය. එසේම අනෙක් ජාතින් අතර මෙන්ම මුස්ලිම්වරුන් අතරත් ත්‍රස්තවාදීන් නැතුවා නොවේ. එබැවින් ඔවුන් කරන වැරදි වලට ඉස්ලාම් දහම ආඳා ගත යුතු නැත. එහෙත් ඇතැම් අය උත්සාහ කරන්නේ මුස්ලිම්වරුන් අතර සිටින වැරදිකරුවන් කරන දේවල් වලින් ඉස්ලාම් දහම විග්‍රහ කිරීමට ය. එමගින් ඔවුන්ගේ අරමුණු ඉටු කෙරුණත් ජාතීන් අතර සැකය සහ බිය ඇතිවීමට හේතුවක් වන්නේය. 

By Fasy Ajward, B.Sc(Sp.Phy) Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/