ජාතිවාදයට සහ ආගම් වාදයට විසඳුම් (Solutions to racism and religiosity)

මිනිසුන් ජාතින් වශයෙන් වෙන් කිරීමට හේතුව අල් කුරානයෙන් මෙසේ විස්තර කොට ඇත. "මිනිසුනි! නියතවශයෙන්ම අපි නුඹලාව පිරිමියෙකුගෙන් සහ ගැහැනියෙකුගෙන් මවා, නුඹලා එකිනෙකාව හඳුනාගැනීම පිණිස නුඹලාව ජාතීන් ලෙසද, ගෝත්‍ර ලෙසද පත් කළෙමු. නුඹලා අතරින් වඩාත් බිය බැති කෙනා අල්ලාහ් හමුවෙහි වඩාත් ගෞරවයට පාත්‍ර කෙනාය" (කුරානය 49:13). එහෙත් මෙහි සඳහන් කොට ඇති අවශ්‍යතාවය අද ඉටු වන්නේ නැත. ඊට හේතුව ආගම ගැන ඇති අනවබෝදය සහ මහා ජාතිය උසස් යැයි තිබෙන හැඟීම වේ. මීට පිළියම එකිනෙකා අතර අන්‍යෝන්‍ය අවබෝදය ඇති වීමට කටයුතු කිරීම යි. මේ නිසා නබි තුමා ඔහුගේ අවසාන අරෆා දේශනයේදී මෙසේ පවසා ඇත. "ඔබගේ ජීවිතය සහ වස්තුව එකිනෙකා අතර පුණ්‍ය දේවල් වන අතර ඒවාට අනතුරු නොකළ යුතු ය. ඒවා මෙම පුණ්‍ය සුල් හජ් මාසය සහ පුණ්‍ය අරෆා දිනයට සමානය. තවද ඔබව, ඔබගේ අධිපති දෙවියන් ඉදිරියට කැඳවනු ඇත. එම දිනයේදී ඔබගේ සෑම ක්‍රියාවක් ගැනම  ඔහු ඔබගෙන් ප්‍රශ්න කිරීමට නියමිතය". ඉන් පසු නබිතුමා එම දේශනයේදී මෙසේද පවසා තිබේ. "අරාබි ජාතිකයා අරාබි නොවන්නාට වඩා උසස් වන්නේ නැත. එසේම අරාබි නොවන්නා අරාබි ජාතිකයාට වඩා උසස් වන්නේද නැත. සියල්ලෝම ආදම්ගේ දරුවෝ ය". ඇත්තෙන්ම එම කියමන සෑම කාලයකටම වටින්නේය.

අද තිබෙන බොහෝ ආගමික ප්‍රශ්න වලට හේතුව ආගම් අතර තිබෙන අනවබෝදය යි. එම නිසා අන්තර් ආගමික දැනුම වර්ධනය කිරීම සඳහා වැඩ පිළිවෙලක් සකස් කිරීමේ අවශ්‍යතාවය පැන නැගී තිබේ. ඊට ආරම්භයක් ලෙස ඇතැම් ප්‍රදේශ වල සිකුරාදා දේශනය සිංහල භාෂාවෙන් සිදු කරන අතර අන්‍ය ආගමික පුජකයින් ඇතුළු ගිහියන්ට සහබාහි වීමට ඉඩ සලසා දී තිබේ. ඊට අමතරව ඇතැම් මුස්ලිම් දේවස්ථාන වල දවස පුරා පැවැත්වෙන වැඩ සටහන් මගින් මුස්ලිම් නොවන ජනතාවට ඉස්ලාම් දහම ගැන පැහැදිලි කිරීම් සිදු කරනු ලැබේ. මෙය තවත් ව්‍යාප්ත කල හැකි නම් ඉස්ලාම් දහම කෙරෙහි ඇති අවිශ්වාසය සහ සැකය දුරු කිරීමට හැකි වනු ඇත. 

ඇතැම් අය උවමනාවෙන්ම ඉස්ලාම් භීතිකාවක් මවා ජාතිවාදය අවුස්සන්නේය. තවත් සමහරු වගකීමෙන් තොර ප්‍රකාශනයන් මාධ්‍යයට නිකුත් කරන්නේය. පහු ගිය සමයේ බොහෝ කඩ සාප්පු සහ නිවාස ගිනි තැබුවේ මෙවැනි හේතුන් මතය. ඉන් සිදු වන හානිය රටේ දියුණුවටත දැඩි ලෙස බලපාන බව සියලුම දෙනා හොඳින් තේරුම් ගත යුතුය. 

ඇතැම් ජන මාධ්‍යවලින් විශේෂයෙන්ම මුස්ලිම්වරුන්ව ඉලක්ක කරගෙන මුදා හරින බොරු ප්‍රචාර නිසා අහිංසක මහා ජාතිය භීතියට පත් වේ. ප්‍රධාන වශයෙන්ම මේ සඳහා ගොදුරු වන්නේ ගම්බඳ ජනතාවයි. උදාහරණයක් වශයෙන් වඳ කොත්තු සහ වඳ යට ඇඳුම් කතාව පෙන්වා දිය හැකිය. එහෙත් මේ දක්වා එවැනි දෙයක් සඳහා කිසිවෙකුට නඩු දමා නැත. එසේම කිසිම කෙනෙකු ඒ වෙනුවෙන් වරද කරුවෙක් බවට පත් කොට නැත. එම නිසා මේවා යම් අයගේ පෞද්ගලික උවමනාවන් සඳහා සිදු කරනු ලබන කට කතා බව මහා ජනතාව හොඳින් තේරුම් ගත යුතුය. කෙසේ වෙතත් මෙවැනි බොරු ප්‍රචාර සිදු කිරීම නවතා මිනිසුන්ට වැදගත් වන දේවල් සහ මිනිසුන් අතර සැකය දුරු කල හැකි ප්‍රචාරයන් සිදු කරන්නේ නම් එය විශාල ජාතික මෙහෙවරක් වනු ඇත.

මිශ්‍ර පාසල් ඇති කිරීමද ජාතිවාදය මුලින් උපුටා දැමීම සඳහා වන හොඳ විසඳුමකි. එය වෙනත් ආගම් අදහන අය සහ ජාතින් අතර සුහදත්වය ගොඩ නැගීමට රුකුලක් වනු ඇත. තවද ගුරුවන්ට සහ ආගමික නායකයින්ට මෙහිදී විශාල කාර්ය භාරයක් පැවරෙන්නේය. ඔවුන් සෑම විටම සත්‍යය වෙනුවෙන් සහ සාධාරණය වෙනුවෙන් පෙනී සිටිය යුතුය. ඇයිද යත් ඔවුන් පවසන දේවල් කුඩා දරුවන්ගේ මනසේ ගැඹුරින් තැන්පත් වන නිසාය. 

ඉස්ලාම් දහම ජාතිවාදයට ප්‍රයෝගික විසඳුම් ලබා දී තිබ්. එය විශේෂයෙන්ම හජ් උත්සවයේදී සහ සාමුහික සලාතය තුලින් පිළිබිඹු වන්නේය. එම ආගමික වතාවන් දෙකෙහිදීම සෑම ජාතියකටම අයත් සෑම දේශයකටම අයත් ජනතාව කිසිම ගැටුමකින් තොරව එකතු වී පසුව විසිර යන්නෝය. බොහෝ අවස්ථාවලදී එකම භාජනයේ අත දමා කෑම අනුභව කරන්නෝය. මේ සඳහා නබි තුමාම ආදර්ශය ලබා දී තිබේ. 

ලෝකයේ බොහෝ දියුණු රටවල් වල ජාතිවාදය හෝ ආගම් වාදය නැත. එම නිසා ඔවුන් විශාල දියුණුවක් ලබා තිබේ. එහෙත් ඇතැම් අය ඔවුන්ගේ පැවැත්ම සඳහා ජාතිවාදය යොදා ගන්නේය. එය සියලු දෙනාම හොඳින් තේරුම් ගන්නේ නම් ජාතිවාදය මුලින් උපුටා දැමීමට හැකි වනු ඇත. 

By Fasy Ajward.B.Sc(Phy.Sp)Hons.Japura,

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twitter:-thetrue_path