නබිතුමා ඔහුගේ උපන් දිනය සැමරුවාද? (Did the Prophet celebrate his birthday?)

මුස්ලිම්වරයෙකු පිළිපැදිය යුතු සෑම දෙයක්ම ඉස්ලාමිය ෂරියාව තුල අඩංගු වේ. ඒවා අල් කුරානයෙන්ද නබි තුමාගේ හදිස් වලින්ද ආවරණය කොට ඇත. එබැවින් ෂරියාවේ නැති කිසිම දෙයක් ඉස්ලාම් දහම ලෙස සැලකිය නොහැකිය. එසේ තිබියදී යම් කෙනෙක් කුරණයෙන් හෝ නබි තුමාගේ හදිස්වලින් පෙන්වා නොදුන් දෙයක් දහමේ කොටසක් ලෙස හඳුන්වා දෙන්නේ නම් ඔහු කියන්නට උත්සාහ කරන්නේ නබි තුමා දහමේ ඇති ඇතැම් කොටස් ජනතාවට වසම් කල බවයි. එවැනි සිතිවිල්ලක් පවා විශාල වරදකි. 

නබිතුමාගේ වියෝවට කලින් ඉස්ලාම් පණිවිඩය සම්පුර්ණ විය. එම කරුණ කුර්ආන් වැකියකින්ද තහවුරු කොට තිබේ. නබිතුමාද ඉස්ලාම් දහමේ සෑම කරුණක්ම ජනතාවට හෙළි කළේය. උපන්දින සැමරීම අල්ලාහ්ගේ නියෝගයක් වුයේ නම් එය ජනතාවට හෙළි කිරීම නබිතුමාගේ වගකීමකි. ඒ අනුව නබිතුමාගේ වියෝවෙන් පසු කිසිම දෙයක් දහම තුලට ඇතුලත් කිරීමට හෝ කිසිම දෙයක් ඉන් ඉවත් කිරීමට හෝ නොහැකිය.

උපන්දින සැමරීම නබිතුමා ජිවතුන් අතර සිටිය දී කිසිවෙකු වෙනුවෙන් සිදු කල බවට කිසිම හදිසයක් නැත. එය ශරියාවේ කොටසක් වුයේ නම නබිතුමා ඔහු වෙනුවෙන්ද  ඔහුගේ භාර්‍යාවන් වෙනුවෙන්ද ඔහුගේ සහබා වෙනුවෙන්ද උපන්දින සැමරීම් සිදු කොට තිබිය යුතුය. එහෙත් කිසිම තැනක එවැනි දෙයක් වාර්තා වන්නේ නැත. එසේ තිබියදී ෂරියාව පෙන්වා නොදුන් දෙයක් අලුතින් දහමට එක්කිරීම බලවත් වරදකි. නබිතුමා පවසා ඇති අන්දමට දහමට අලුතින් එක් කරන දේවල් බිද්අත් හෙවත් නොමග ගිය දේවල් වන අතර නොමග ගිය සෑම දෙයක්ම නිරයට අයත් බව නබිතුමා පවසා තිබේ.

නබිතුමා විසින් වර්ණනා කරන ලද මුල් කාල වකවානුවේ ජිවත් වූ කලීෆා වරුන් විසින් නබිතුමාගේ උපන්දිනය සමරුවේ නැත. තවද ශ්‍රේෂ්ඨ ඉමාම් වරුන් වන අබුහනිෆා, මාලික්, ෂාෆි හෝ හම්බලි (ඔවුන් සියලු දෙනා කෙරෙහි අල්ලාහ්ගේ ශාන්තිය අත්වේවා) යන විද්වතුන් විසින්ද නබි තුමාගේ උපන් දින සැමරීම සඳහා අනුමැතිය ලබා දී නැත. එපමණක් නොව වර්තමානයේ ජිවත්වන කිසිම විද්වතෙක් නබිතුමාගේ උපන්දිනය සැමරීම දහමේ කොටසක් ලෙස පිළිගන්නේ නැත. 

නබිතුමාගේ උපන්දිනය සමරන ඇතැම් උදවිය තබන තර්කයක් වන්නේ නබිතුමා සඳුදා දිනක ඉපදුනු බැවින් එය සැමරීම සඳහා ඔහු එම දිනයේදී උපවාස කල බවයි. එහෙත් එම හදිසයේ උපන්දින සැමරීමක් ගැන සඳහන් නොවන අතර එහි දැක්වෙන්නේ සඳුදා සහ බ්‍රහස්පතින්දා දිනයන්හි උපවාස කිරීමක් ගැන පමණි.

ඇත්ත වශයෙන්ම නබිතුමා කෙරෙහි සෙනෙහස ඇති අය කල යුත්තේ ඔහු පෙන්වා නොදුන් උපන්දින සැමරීම නොව එතුමාව අනුගමනය කිරීමය. අල් කුරානය මගින්ද මෙසේ පවසා ඇත: “පවසනු: ඔබ අල්ලාහ් කෙරෙහි සෙනෙහස දක්වන්නේ නම්, මාගේ (නබිතුමාගේ) මාර්‍ගය පිලිපදිනු, එවිට අල්ලාහ් ඔබව ප්‍රිය කරන අතර ඔබගේ පව් සමාකරනු ඇත. අල්ලාහ් මහත්සේ සමාකරන්නාද මහත් කාරුනිකයාද වන්නේය” (Q3:31)

නබිතුමාගේ උපන්දින සැමරීම ආරම්භ වන්නේ හිජ්රි හතර වන සිය වසේදීය. එනම් නබිතුමාගේ අභාවයෙන් වසර පන්සියයක් පමණ ගෙවී ගිය පසුවය. මුල් වරට උපන්දින සැමරීමක් සිදු කරනු ලැබුවේ ඊජිප්තුවේ අග නගරය වන ඉර්බිල්හි  අල්-මාලික් අල්-මුලෆ්ෆර් අබු සඊද් (al-Malik al-Muzaffar Abu Sa‘eed) යන තැනැත්තා විසිනි. එවකට කලීෆා වුයේ ෂියා නිකායට අයත් ෆාතිමිඩ් වරයෙකු වන ෂෙයික් අල්-මහ්ෆුස් ය.

පසු කාලයේදී අල්-අෆ්දාල් නමැති හමුදා පාලකයා විසින් මිලාද් උත්සවය නතර කරන ලදී. නැවතත් අල්-අමීර් බි-අහ්කාම් අල්ලාහ් විසින් හිජ්රි 524 දී නැවතත් මිලාද් උත්සවය ආරම්භ කළේය. 

බොහෝ අය විසින් රබියුල් අව්වල් මස 12 වන දිනයේදී නබිතුමාගේ උපන්දිනය සැමරුවත් එතුමාගේ උපන්දිනය කිසිවෙකු විසින් හරි හැටි දන්නේ නැත. මේ හේතුවෙන් නබිතුමාගේ උපන් දිනය සඳහා බොහෝ දිනයන් උපකල්පනය කොට තිබේ. 

By Fasy Ajward. B.Sc(PhysicsSpecial)Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twiter:- thetrue_path