විශ්වය ආරම්භ වූයේ කෙසේද? (How did the universe begin?)
සෑම පර්යේෂනයක්ම සිදු කරන්නේ පවතින දේවල් සඳහා ය. එබැවින් ඒවා කෙසේ ඇතිවූයේද යන්න ගැන කිසිවෙකු විසින් සොයා බලන්නේ නැත. එහෙත් දැනුමේ ඉතා වැදගත් හරය එයයි. එබැවින් සෑම ප්‍රධාන ආගමකින්ම මැවීම ගැන සඳහන් කොට ඇත. ඒ අනුව සෑම දෙයක්ම දෙවියන්ගේ මැවීම් බවත් ඒවා ක්‍රියා කරන්නේ දෙවියන් පනවා ඇති නීති රාමු තුල බවත් කියැවේ. කෙසේ වෙතත් මෙහිදී සැලකිල්ලට ගත යුතු වැදගත් කරුණක් වන්නේ සෑම දෙයක්ම දෙවියන්ගේ මැවීම් වුවත් දෙවියන් කිසිවෙකුගේ මැවීමක් නොවන බවයි. අර්ථ දැක්වීමෙන්ම දෙවියන් කිසිවෙකුගේ මැවීමක් නොවේ. මේ නිසා දෙවියන්ගේ ආරම්භය ගැන ප්‍රශ්න කිරීම අර්ථ විරහිත ක්‍රියාවකි.
විශ්වය ගැන සැලකීමේදී එහි බිහිවීම සම්බන්දයෙන් නොයෙකුත් විශ්වාසයන් තිබී ඇත. ඒ අනුව විද්‍යාවේ දියුණුවට පෙර සිතුවේ විශ්වය සදාකල් පැවති එකක් බවයි. එහෙත් හබල්ගේ දුරේක්ෂය නිපදවීමෙන් පසු ලබා ගන්නා ලද දත්ත විශ්ලේෂණය කිරීමෙන් පසු විශ්වයට ආරම්භයක් තිබිය යුතු බව නිගමනය කෙරින. එහෙත් එම ආරම්භය සිදු වුයේ කෙසේදැයි මෙතෙක් සම්පුර්ණයෙන්ම තේරුම් ගැනීමට හැකිවී නැත. ඒ අනුව විශ්වය බිහිවීමට මොහොතකට පෙර වූ අවස්ථාව, ස්වභාවික නීති ක්‍රියාත්මක නොවන අවස්ථාව සහ මන්දාකිණිවල උපත යන දේවල් පිළිබඳව තවමත් හරි හැටි තේරුම් ගෙන නොමැති බව මහාචාර්ය ජෝසෆ් සිල්ක් මහතා ඔහුගේ "The Big Bang" යන කෘතියෙන් පෙන්වා දෙන්නේය. මේ නිසා විශ්වයේ බිහිවීම සම්බන්දයෙන් විද්‍යාඥයින් අතර තවමත් තිබෙන්නේ අවිනිශ්චිත තත්වයකි. කෙසේ වෙතත් දේව පණිවිඩ වලින් පවසන්නේ විශ්වය දෙවියන්ගේ මැවීමක් බවයි.
විශ්වයේ බිහිවීම සම්බන්දයෙන් දැනට ඇති ප්‍රධාන මතය වන්නේ මහා පිපිරුම් වාදයයි. කෙසේ වෙතත් එම වාදයේ බොහෝ අඩුපාඩු තිබේ. එබැවින් එම වාදය මගින් විශ්වය බිහිවූ අන්දම සම්පුර්ණයෙන්ම විස්තර කල නොහැකිය. එසේ තිබියදී විශ්වය ස්වයං නිර්මාණයක් බවටත් අලුත් මතයක් පවතින්නේය. එහෙත් එම මතය සමග බොහෝ විද්‍යාඥයින් එකඟ වන්නේ නැත.
විශ්වයේ බිහිවීම සම්බන්දයෙන් 21 වන සිය වසේ ජීවත්වූ ක්ශ්‍රේෂ්ඨ ඇමරිකානු විද්‍යාඥයෙකු වූ ස්ටෙෆාන් ඩබ්ලිව් හෝකින් මහතා විසින් පල කරන ලද කෘතියක පවසා තිබුනේ විශ්වයේ උපත ගැන සලකා බැලීමේදී එහි මුලික වින්‍යාසය දෙවියන් විසින් යම් හේතුවක් උදෙසා නිර්මාණය කර ඇති බව පෙනී යන බවයි. තවද ඔහු පවසා තිබුනේ එම කාර්ය කෙසේ සිදු වුයේද යන්න තේරුම් ගැනීම අසීරු කරුණක් බවයි. කෙසේ වෙතත් එය සර්වබලධාරියෙකුගේ අධිකාරි බලයට යටත් වූ ක්‍රියාවක් බව ඔහු පවසන්නේය.
අල් කුරානයට අනුව දෙවියන් කිසිවෙකුගේ මැවීමක් නොවේ. තවද ඔහු ස්වයංව පවතින්නේය. ඔහු නැති දෙයකින් අලුත් දෙයක් මවන්නාය. එම අර්ථ දැක්වීම අනුව විශ්වය දෙවියන්ගේ මැවීමක් ලෙස පිළිගැනීම විශ්වයේ අරම්බයට සහ පැවැත්මට එක් විසඳුමකි.
විශ්වයේ බිහිවීම සම්බන්දයෙන් අල් කුරානය මෙසේ සඳහන් කරයි: "නියත වශයෙන්ම නුඹගේ අධිපතියා අල්ලාහ්ය, ඔහු අහස් සහ පොළව දවස් හයකදී මැව්වේය, පසුව ඔහු (සිය තත්වයට ගැලපෙන පරිදි) අර්ෂ් මත නැඟුණේය. ඔහු දවහල ආවරණය කරමින් රාත්‍රිය ඇති කරන්නේය, ඒවා (රාත්‍රිය සහ දහවල) එකිනෙක ළුහු බඳින්නේය, තවද සුර්යාවද චන්ද්‍රයාවද තරකාවන්ද සිය අණට වසඟ වන දේවල් ලෙස (මවා ඇත්තේය). නියත වශයෙන්ම මැවිමද, අණ කිරීමද, ඔහුටම අයත් ඒවා වේ. සකල ලොවැසියන්ගේ අධිපති වූ අල්ලාහ් භාග්‍යවන්තයා ය" (කුරානය 7:54).
කිසිම දෙයක් ඉබේ ඇතිවූ බව මෙතෙක් සොයාගෙන නැත. අපි ලබාගෙන තිබෙන අත්දැකීම් අනුව ද සැලසුමකින් තොරව කිසිම දෙයක් ඉබේ නිර්මාණය වෙන්නේ නැත. මේ නිසා විශ්වය ඇතිවීමටත් මුලික සැලසුමක් සකස් කල කෙනෙක් සිටිය යුතුය. ඒ සඳහා අවශ්‍යකරන පදාර්ථ නැතහොත් ශක්තිය උත්පාදනය කල කෙනෙක් සිටිය යුතුය. විශ්වය බිහිවූ පසු එහි පැවැත්මට අවශ්‍ය භෞතික නීති පැනවීමට කෙනෙක් සිටිය යුතුය. මේවා ඉබේ ඇති නොවන නිසා යම් කිසි ඥානාන්විත දෙවි කෙනෙක් මේවා මවා තිබිය යුතුය යන නිගමනයට පැමිණිය හැකි වන්නේය.
විශ්වයේ බිහිවීම පිලිබඳව දැනට අප සතුව ප්‍රධාන විශ්වාසයන් දෙකක් ඇත. ඉන් එකක් මහා පිපිරුමකින් විශ්වය බිහිවී ඇති බව පැවසෙන අසම්පුර්ණ මතයයි. අනෙක විශ්වය දෙවියන්ගේ මැවීමක් බවයි. මෙය අපට වැදගත් වන්නේ මිනිසාගේ මරණයෙන් පසුව ඇති දේවල් නිගමනය වන්නේ එය මත වන නිසාය.
දෙවියන් පහළ කරන ලද සෑම දහම් පණිවිඩයකින් ම මිනිස් ජිවිතයේ අරමුණ විස්තර කොට ඇත. එය නිවැරදිව තේරුම් ගැනීම මිනිසාට පැවරෙන ඉතා භාර දුර කටයුත්තකි. ඒ සඳහා මිනිසාට ආගමක් සහ එම ආගමේ කියැවෙන දේවල් තේරුම් ගැනීමට ඥානයද ලබා දී තිබේ. එසේ තිබියදීත් මිනිසා තමන්ට ලැබී ඇති වටිනා ජීවිතය වෙනත් දේවල් සඳහා යොදා ගන්නේ නම් මරණයෙන් පසු දෙවියන් ඉදිරියේ නිරුත්තර වීමට සිදු වනු ඇත. ඉන් පසු තමන්ට සිදුවූ වැරැද්ද නිවැරදි කිරීම සඳහා නැවත මෙළොවට පැමිණීමටද හැකි වන්නේ නැත. මෙය මිනිසා හොඳින් තේරුම් ගත යුතු වේ.
By Fasy Ajward.B.Sc(Special)Hons.
Ex: Research officer at Ceylon Institute of Scientific and Industrial Research.
Twiter:- thetrue_path
Comments
Post a Comment