කුරානයට අනුව ලෞකික ජීවිතයේ යතාර්ථය කුමක්ද? (What is the reality of worldly life according to the Quran?)

අල් කුරානය පෙන්වා දෙන පරිදි ලෞකික ජීවිතය තාවකාලික සතුටක් පමණි. කෙසේ වෙතත් ඇතැම් අය ජිවත් වන්නේ මරණයක් නැතැයි සිතාගෙන ය. ඔවුන් එසේ සිතුවත් ලෝකයේ සිටින ධන කුවේරයින් පවා හිස් අතින් මිය යන්නේය. ඔවුන් යන විට කිසිම දෙයක් ගෙන යන්නේ නැත. එසේ නම් නොකා නොබී කිසිවෙකුට නොදී වස්තුව පොදි ගසන්නේ කුමක් සඳහාද? 

ඇත්ත වශයෙන්ම කොතරම් තිබුනත් කෙනෙකුට අයත් වන්නේ ඔහු කෑමට කල වියදමත්, වස්ත්‍ර වෙනුවෙන් කල වියදමත් පින් දහම් වෙනුවෙන් කල වියදමත් පමණි. ඒ හැර අනෙක් සෑම දෙයක්ම ඔහු ඉතිරිකර හිස් අතින් අවසන් ගමන් යන්නේය. ඔහු ගෙන යන්නේ තමන් කල හොඳ හෝ නරක පමණි. ඒ අනුව ඔහු ජිවතුන් අතර සිටියදී කළේ නාගයෙකු මැණිකක් රකිනා සේ තම වස්තුව වෙනත් කෙනෙකු වෙනුවෙන් රැක ගැනීම ය. සාරාංශයක් ලෙස ලෞකික ජීවිතය අල් කුරානයෙන් මෙලෙස විස්තර කොට ඇත. "මෙලෝ ජීවිතය විනොදයක්ද, නිෂ්පල දෙයක්ද, අලංකාරයද, නුඹලා අතර අහංකාරකම පෙන්වා ගැනීමද, සම්පත් හා දරුවන්ව අධික කරගැනීමද හැර වෙන දෙයක් නොවේ" (කුරානය 57:20). 

මරණය සැබෑවකි. කිසිවෙකුට ඉන් ගැලවුමක් නැත. ජිවත්වන ටික කාලය තුලදී දෙවියන් පෙන්වා දුන් මාර්ගය පිළිපැද්දේ නම් මරණයෙන් පසු උදාවන සැබෑ ජීවිතය ජය ගත හැකිය. ජිවිතයේ යතාර්ථය කෙටියෙන් කුරානය තුල මෙසේ සඳහන් වේ. "සෑම ආත්මයක්ම මරණය අත් විඳිය යුතුමය! නුඹලාට අයත් කුලිය එලොවදී පූර්ණව දෙනු ලබන්නේය. කවරෙක් නිරයෙන් ඈත් කරනු ලැබ ස්වර්ගයට ඇතුලත් කරනු ලබයිද ජයග්‍රාහකයා ඔහුය. මෙලෝ ජීවිතය රවටන සැපතක් මිස වෙන කිසිවක් නොවේ" (කුරානය 3:185). 

ඇත්ත වශයෙන්ම කෙනෙක් හම්බ කරන්නේ නම් හම්බ කල යුත්තේ මතු ජිවිතයට රැගෙන යාම සඳහාය. එය කල හැක්කේ තමන් උපයන දේ සඳහා යුක්තිය ඉටු කිරීමෙන්ම පමණි. ඒ අනුව සාදාරන ලෙස උපයා ඒ වෙනුවෙන් ඉටුකළ යුතු දුගී බද්ද හරියාකාරව ඉටු කර තමන්ගෙන් යැපෙන උදවියටත් නැති බැරි අයටත් උදව් උපකාර කිරීම හරහා ය. කෙසේ වෙතත් බොහෝ අය තම තාවකාලික සතුට වෙනුවෙන් පමණක් ජිවත් වෙති. එම කරුණ මෙම කුර්ආන් වැකිය තුලින් පෙන්වා දී තිබේ. "මෙලෝ ජීවිතය නිෂ්පල දෙයක්ද විනෝදයක්ද හැර වෙන නැත.  ඔවුන් දැන ගන්නේ නම් නියත වශයෙන්ම එලෝ නිවසම ස්ථිර ජීවිතය වේ" (කුරානය 29:64). කුරානයේ තවත් තැනක මෙසේ සඳහන් කොට ඇත.. "මෙලෝ ජීවිතය සෙල්ලමක්ද, විනෝදයක්ද මිස වෙන දෙයක් නොවේ. එහෙහ් එලෝ නිවස (අල්ලාහ්ට) බිය වී ක්‍රියා කරන්නන්ට වඩාත් හොඳ වේ. නුඹලා (එය) අවබෝද කර නොගන්නේහුද?" (කුරානය 6:32). 

මිනිස් ජිවිතයේ සැබෑ අරමුණ අමතක කොට අන්දයින් මෙන් ජිවත් වන අය ගැන කුරානය මෙසේ පවසා ඇත. "කවරෙක් මාගේ උපදේශය ඉවතලන්නේද නියතවශයෙන්ම ඔහුට දුෂ්කර ජිවිතයක් ඇත. තවද, අපි ඔහුව විනිශ්චය දිනයේදී අන්දයෙකු ලෙස නැගිටවන්නෙමු" (කුරානය 20:124). එලොවාදී ඇස් පනා පිටම සත්‍යය දුටු පසු ඔවුන් මෙසේ පවසන්නේය. "මාගේ සමිඳුනි! පෙනුම ඇත්තෙකුව සිටි මාව අන්දයෙකු ලෙස නැගිට්ටෙව්වේ ඇයි?" (කුරානය 20:125). එවිට මෙසේ පිළිතුරු දෙනු ලබන්නේය. "එලෙසම, අපගේ වැකි නුඹ වෙත පැමිණියේය. ඒවා නුඹ නොසලකා හැරියේය. මේ අන්දමට අද දින නුඹද නොසලකා හැර ඇතැයි (අල්ලාහ්) පවසන්නේය" (කුරානය 20:126). තවද, "සීමාව ඉක්මවා තම සමිඳුන්ගේ වදන් විශ්වාස නොකළේද, ඔහුට අපි එලෙසින්ම කුලිය ලබා දෙන්නෙමු. තවද, එලොවෙහි දඬුවම වඩාත් දැඩිද ස්ථිරද වේ" (කුරානය 20:127).

කුරානයට අනුව ලෞකික ජීවිතය පරික්ෂාවකි. ඒ අනුව කෙනෙකුගේ ජීවිතය පුරා නොයෙකුත් පරීක්ෂාවන්ට මුහුණ දීමට සිදු වේ. නබිතුමා සහ එතුමාගේ සහාබා වරුන් අල්ලාහ්ගේ ආදරයට පාත්‍ර වුයේ ඔවුන් කුරානයට අනුව ජිවත් වීම නිසාය. ඒ අනුව ඔවුන්ට මරණයෙන් පසු ස්වර්ගය ලැබීමට නියමිතය.

ආශාවන්ට වහල් වෙමින් ජිවත් වූ අය මරණ මංචකයේදී මෙසේ පවසන බව කුරානය සඳහන් කරයි. "අහෝ දෙවියනි, අපි දුටුවෙමු. අපි සවන් දුන්නෙමු. නුඹ අපව (මනු ලොවට) යවනු මැනව! (එසේ කලේ නම්) අපි යහ කම් කරන්නෙමු"යි (පවසනු ඔබ දකින්නේහිය). (කුරානය 32:12). එහෙත් කෙනෙකුගේ අවසාන මොහොත ලඟා වූ පසු නැවත හැරීමක් නැති බව කුරානයේ සඳහන් වේ. මේවා අවබෝද කරගෙන ජිවත් වන තැනැත්තා සත්‍ය වශයෙන්ම වසනා වන්තයෙකි.

By Fasy Ajward.B.Sc(PhysicsSpecial)Hons.Japura,

Ex: Research officer at Ceylon Institute of Scientific and Industrial Research.

https://w:ww.facebook.com/thetruepathofislam
http://truepath1.blogspot.com/
Twiter:- thetrue_path