අල් -කුර්ආනය ලෞකික ජීවිතය විස්තර කරන්නේ කෙසේද? (How does the Quran describe worldly life?)

ලෞකික ජීවිතය ගැන අල් කුරානයේ එක් තැනක මෙසේ විස්තර කොට ඇත. "සෑම ආත්මයක්ම මරණය අත් විඳිය යුතුමය! නුඹලාට අයත් කුලිය එලොවදී පූර්ණව දෙනු ලබන්නේය. කවරෙක් නිරයෙන් ඈත් කරනු ලැබ ස්වර්ගයට ඇතුලත් කරනු ලබයිද ජයග්‍රාහකයා ඔහුය. මෙලෝ ජීවිතය රවටන සැපතක් මිස වෙන කිසිවක් නොවේ" (කුරානය 3:185). ඒ අනුව මෙලෝ ජීවිතය මායාවක් වේ. සත්‍ය ජීවිතය මරණයෙන් පසුව ඇති ජීවිතය වේ.

ඇතැම් අය මරණයක් ඇති බව සිතන්නේ නැත. එම නිසා ඔවුන් ජීවිතය සදාකාලික යැයි සිතමින් ලෞකික දේවල් පසු පස හඹා යන්නෝය. එහෙත් සත්‍යය කුමක්ද යත් යම් දිනක ඔවුන් රැස්කළ සියලුම වස්තුව ඉතිරිකොට හිස් අතින් මරණය වැළඳ ගැනීම යි. එබැවින් මෙලෝ ජීවිතය ගැන කුරානයේ මෙසේ විස්තර කොට ඇත. "මෙලෝ ජීවිතය නිෂ්පල දෙයක්ද විනෝදයක්ද හැර වෙන නැත.  ඔවුන් දැන ගන්නේ නම් නියත වශයෙන්ම එලෝ නිවසම ස්ථිර ජීවිතය වේ" (කුරානය 29:64). කුරානයේ තවත් තැනක මෙසේ සඳහන් වේ. "මෙලෝ ජීවිතය සෙල්ලමක්ද, විනෝදයක්ද මිස වෙන දෙයක් නොවේ. එහෙහ් එලෝ නිවස (අල්ලාහ්ට) බිය වී ක්‍රියා කරන්නන්ට වඩාත් හොඳ වේ. නුඹලා (එය) අවබෝද කර නොගන්නේහුද?" (කුරානය 6:32). 

බොහෝ අය මෙලොව ජිවිතයට රැවටී වස්තුව සෙවීමේ කාර්යයේ පමණක් නිරත වෙති. ඔවුන්ට මරණයෙන් පසු ගෙන යාමට කිසිම දෙයක් නැත. ඔවුන් ගැන කුරානයේ මෙසේ විස්තර කොට ඇත.  "කවරෙක් මාගේ උපදේශය ඉවතලන්නේද නියතවශයෙන්ම ඔහුට දුෂ්කර ජිවිතයක් ඇත. තවද, අපි ඔහුව විනිශ්චය දිනයේදී අන්දයෙකු ලෙස නැගිටවන්නෙමු" (කුරානය 20:124). එවිට ඔවුන් මෙසේ පවසනු ඇත. "මාගේ රබ්! පෙනුම ඇත්තෙකුව සිටි මාව අන්දයෙකු ලෙස නැගිට්ටෙව්වේ ඇයි?" (කුරානය 20:125). ඊට පිළිතුරු වශයෙන්, "එලෙසම, අපගේ වැකි නුඹ වෙත පැමිණියේය. ඒවා නුඹ නොසලකා හැරියේය. මේ අන්දමට අද දින නුඹද නොසලකා හැර ඇතැයි (අල්ලාහ්) පවසන්නේය" (කුරානය 20:126). තවද, "සීමාව ඉක්මවා තම රබ්ගේ වදන් විශ්වාස නොකළේද, ඔහුට අපි එලෙසින්ම කුලිය ලබා දෙන්නෙමු. තවද, එලොවෙහි දඬුවම වඩාත් දැඩිද ස්ථිරද වේ" (කුරානය 20:127) යැයි පවසනු ලැබේ. 

මිනිසාට ලැබී ඇති මෙලොව ජීවිතය තාවකාලික ය. එය මතු ජීවිතය සමග සැසඳීමේදී සිහිනයක් බඳුය. නැතහොත් සාගරයේ ඇඟිල්ලක් ඔබා පිටතට ගත්විට තැවරෙන ජලයේ තරම් වත් නැත. මිනිසා එම ජීවිතය ගැන සිතා බැලිය යුතුය. නැතහොත් ලෞකික ජීවිතය තුල මුලා වෙන්නේ මිනිසාම ය. 

මිනිසාට වටිනා ජිවිතයක් ලබා දී තිබෙන්නේ යම් කිසි අරමුණක් සඳහාය. මිනිසා එම අරමුණ ඉටු නොකර ජීවිතය කෙලි සෙල්ලමේ ගත කලේ නම් විශාල පාඩුවක්ම ලබනු ඇත. මිනිසා මරණයට පත්වූ පසු කිසිවෙකු උදව්වට පැමිණෙන්නේද නැත.  එම නිසා මේ ලැබී ඇති අවස්ථාවෙන් ප්‍රයෝජන ගත යුතුය. ඒ සඳහා මුලින්ම කල යුත්තේ අපගේ මැවුම්කරු කව්රුන්දැයි දැනගෙන ඔහු පෙන්වා දෙන මාර්ගයේ ගමන් කිරීම යි. ඒ හැර අප විසින්ම අපගේ ජීවිතය තීරණය කල නොහැකිය. 

By Fasy Ajward.B.Sc(Sp.Phy)Hons.Jpura,

Ex: Research officer at Ceylon Institute of Scientific and Industrial Research.

https://w:ww.facebook.com/thetruepathofislam
http://truepath1.blogspot.com/
Twiter:- thetrue_path