ඉස්ලාම් දහම අනුව විනිශ්චය දිනය යනු කුමක්ද? (What is Judgment Day according to Islam?)
මෙලොව ඉපදී මිය ගිය සෑම ආත්මයක්ම නැවත නැගිටවා ප්‍රශ්න කරන දිනයට විනිශ්චය දිනය යැයි කියනු ලැබේ. එම දිනයේදී මිය ගිය සෑම ආත්මයක්ම දෙවියන් වෙත ඉදිරිපත් කරනු ලබන අතර ඔවුන්ව වෙන වෙනම ප්‍රශ්න කිරීමට නියමිතය. අල් කුරානයේ එම දිනය යව්මුල් කියාමා (يوم القيامة) ලෙස ද වෙනත් නම් වලින්ද විස්තර කොට තිබේ. විනිශ්චය දිනය පිළිබඳව විශ්වාස කිරීම සෑම මුස්ලිම්වරයෙකුට අනිවාර්ය වේ. මෙලොව ඉපදී මිය ගිය සෑම කෙනෙකුම ඊට මුහුණ දිය වේ. මෙම විනිශ්චයෙන් පසු මිනිසා මෙලොවදී කල හොඳ හෝ නරක අනුව ස්වර්ගය හෝ නිරය ලැබීමට නියමිතය. තවද විනිශ්චය දිනයට පෙර නැවත ඉපදීමක් නැත. ඒ අනුව ඉස්ලාම් දහම අනුව පුනරුත්පක්තියක් නැත. එම දිනයේදී කිසිවෙකුටත් අසාධාරණයක් සිදු වන්නේ නැත. තවද එම දිනයේදී කෙනෙකුට කෙනෙක් උදව් කල නොහැකිය. ඒ අනුව මිනිසාගේ මුඛයට මුද්‍රා තබන අතර ශරීර අවයව වලින්ම සාක්ෂි කැඳවනු ලැබේ. එම නිසා කිසිවෙකුට එම දිනයේදී ගැලවුමක් ලැබෙන්නේ නැත.
විනිශ්චය දිනයේ ඇති භයානක කම මෙම කුර්ආන් වැකියෙන් විස්තර කොට ඇත. "නුඹලා එය දකින දවසෙහි, කිරි පොවන එක් එක් මවක්ව තමා කිරි පෙවූ දෙය අමතක කරන්නීය. එක් එක් ගැබිනියක්ම තම ගැබ් බර ප්‍රසුත කරන්නීය. 'නුඹ මිනිසුන්ව මත්වුවන් ලෙස දකින්නේහිය' (එහෙත්) ඔවුන් (මත්පැනින්) මත්වුවන් නොවෙති. නමුත් අල්ලාහ්ගේ වේදනාව දැඩි දෙයක් වේ" (කුරානය 22:2). තවද එම දිනයේදී සුර්යයා ඉතා කිට්ටුවට ගෙනවිත් තබනු ලැබේ. ඒ අනුව මිනිසුන් අධික ලෙස දහඩිය දමා මහත් පිඩාවට පත්වන්නෝය. ඒ අනුව ඇතැම් අය වළලු කර දක්වාද, දණහිස දක්වාද, ඉන දක්වාද ඇතැම් අය උරහිස දක්වාද දහඩිය තුල ගිලී යන්නෝය. එසේ තිබියදී කණ්ඩායම් හතකට පමණක් දෙවියන්ගේ අර්ෂ් හි සෙවන ලැබෙන බව නබිතුමා පවසා ඇත. ඔවුන් කව්රුන්ද යත්; ධර්මිෂ්ඨ පාලකයෙක්; අල්ලාහ්ගේ අණ පිළිපදිමින් හැදී වැඩුණු තරුණයෙක්; මස්ජිදය කෙරෙහි හදවත බැඳී තිබුණු කෙනෙක්; අල්ලාහ්ගේ කරුණාව උදෙසා එකිනෙකා ආදරය කල දෙදෙනෙක්, ඔවුන් එකතුවීමත් වෙන්වයාමත් අල්ලාහ් වෙනුවෙනි; අලංකාරවත් කුලවත් ස්ත්‍රියක් නීති විරෝදී කටයුත්තක් සඳහා ආරාධනා කලත්, 'මා අල්ලාහ්ට බිය වන්නෙමි'යි පවසා ඉන් වැලකී සිටි කෙනෙක්; දකුණු අතින් දෙන දේ වම් අතටව නොපෙනෙන පරිදි පුණ්‍ය කටයුතු කල දානපතියෙක්, හුදකලා ස්ථානයක සිටිමින් අල්ලාහ්ව මෙනෙහි කොට එම බියෙන් කඳුළු සැලූ කෙනෙක් වන්නෝය.
විනිශ්චය දිනයේ ඇති භයානක කම නිසා ජනතාව රංචු ගැසී නබිවරුන් වෙත ගොස් අල්ලාහ්ගෙන් සහනයක් ඉල්ලා දෙන මෙන් ආයාචනා කරනු ඇත. එහෙත් මුහම්මද් නබිතුමා හැර අනෙක් සෑම නබිවරයෙක්ම ඔවුන් කල වරදක් කියා පාමින් එම ඉල්ලීම ඉටු කර දීමට නොහැකි බව පවසනු ඇත. අවසානයේදී මුහම්මද් නබිතුමා ඒ සඳහා ඉදිරිපත් වෙමින් සුජුද් හි වැටෙනු ඇත. ඒ අනුව නිරයට පාත්‍ර වූ විශාල පිරිසකට ස්වර්ගයට ඇතුලත් වීමේ අවස්තාව උදා කර දෙන්නේය. කෙසේ වෙතත් අල්ලාහ්ව විශ්වාස නොකළවුන්ට එම භාග්‍යය උදා වන්නේ නැත.
විනිශ්චය දිනයේදී මිනිසා දෙවියන්ගේ අණ පිළිපැදීම ගැන ප්‍රශ්න කිරීමේදී ඇතැම් අයගෙන් එය ඉතා ලිහිල් ආකාරයට සිදු කරනු ලබන බවත් ඇතැම් අයගෙන් එය ඉතා දරුණු ලෙස සිදු කරනු ලබන බවත් නබිතුමා පවසා ඇත. එම දිනයේදී දෙවියන්ගේ කරුණාව විශ්වාසවන්තයින් සඳහා ඉතා විශාල ලෙස ලැබීමට නියමිතය. කෙසේ වෙතත් ලෞකික ජීවිතයේදී දෙවියන් වෙනුවට වෙනත් දේවල්වලට වැඳුම් පිදුම් කල අයට ඒවායින්ම පිහිට පැතීමට සිදු වන්නේය.
එම දිනයේදී මිනිසාටත් දෙවියන්ටත් අතර ඇති දේවල් සියල්ලම විනිශ්චය කළ පසු මිනිසා මිනිසාට කළ වැරදි සමතයකට පත් කර ගැනීමට අවස්ථාව ලබා දෙන්නේය. ඒ අනුව ස්වර්ගයට නියම වූ ඇතැම් අය ඔවුන් මනු ලොවේදී අනුන්ට කළ වැරදි සඳහා වන්දි වශයෙන් තම කුසල් ලබා දීමට සිදු වන්නේය. ඔවුන්ගේ කුසල් අවසාන වූ පසු වන්දි වශයෙන් අනුන්ගේ අකුසල් ලබා ගැනීමට සිදු වන්නේය. එම හේතුවෙන් ඔවුන් ආරම්භයේදී ස්වර්ගයට නියම වුවත් අවසානයේදී නිරයට පාත්‍ර වන්නෝය.
විනිශ්චය දිනයේදී වන්දි වශයෙන් පොළව පිරෙන්නට රත්‍රන් දෙනු ලැබුවත් ඒවා භාර ගනු ලබන්නේ නැත. එබැවින් මෙලොවදී දෙවියන්ව ප්‍රහික්ෂේප කල් වැරදි කරුවන්ට නරකාදිය අනිවාර්ය වේ. පහත දැක්වෙන කුර්ආන් වැකියෙන් එය විස්තර කොට ඇත.
"කවරෙකු (දෙවියන්ව) ප්‍රතික්ෂේප කරමින් සිට ප්‍රතික්ෂේප කරන්නන් වශයෙන්ම මිය ගියෝද, වන්දි වශයෙන් පොළව පිරෙන්නට රත්‍රන් දෙනු ලැබුවත් ඔවුන්ගෙන් එය පිළිගනු ලබන්නේ නැත. ඔවුන්ට හිමි වන්නේ වේදනාකාරී දඬුවම පමණි. ඔවුන් වෙනුවෙන් උදව්වට ද කිසිවකු නොමැත" (කුරානය 3:91).
මෙම විනිශ්චයෙන් පසු මෙලොවදී අසාධාරණයට පත්වූ සෑම විශ්වාසවන්තයෙකුටම සාධාරණය ඉටුකර දෙනු ඇත. එසේම විනිශ්චය දිනයක් නැතැයි පවසමින් සිටි සෑම කෙනෙක්ම මහත්සේ දුකට පත්වනු ඇත. එහෙත් ඔවුන්ට සිදුවූ වරද ආපසු හැරවීමට හැකිවන්නේ නැත. එබැවින් ඔවුන්ගේ අවසානය නිරයේදී කෙළවර වීමට නියමිතය. මෙය තේරුම් ගෙන නොසිටීම මිනිසා මිනිසාටම කරගන්නා විශාල පාඩුවකි.
මෙම විනිශ්චයෙන් පසු මෙලොවදී අසාධාරණයට පත්වූ සෑම විශ්වාසවන්තයෙකුටම සාධාරණය ඉටුකර දෙනු ඇත. එසේම විනිශ්චය දිනයක් නැතැයි පවසමින් සිටි සෑම කෙනෙක්ම මහත්සේ දුකට පත්වනු ඇත. එහෙත් ඔවුන්ට සිදුවූ වරද ආපසු හැරවීමට හැකිවන්නේ නැත. එබැවින් ඔවුන්ගේ අවසානය නිරයේදී කෙළවර වීමට නියමිතය. මෙය තේරුම් ගෙන නොසිටීම මිනිසා මිනිසාටම කරගන්නා විශාල පාඩුවකි.
By Fasy Ajward. B.Sc (Sp,Phy) Hons.Japura.
Ex: Research officer at Ceylon Institute of Scientific and Industrial Research.
Comments
Post a Comment