කුරානය දෙවියන්ගෙන් ලැබුණු පණිවිඩයක් වන්නේ ඇයි? (Why is the Quran a message from God?)

අල් කුරානය යනු මිනිස් වර්ගයා හට යහ මග පෙන්වීම සඳහා අල්ලාහ් දෙවිඳුන්ගෙන් පහළ කරන ලද පණිවිඩයකි. එය ජිබ්‍රිල් නම් දේවදුතයා හරහා මුහම්මද් නබි තුමා හට වසර විසි තුනක් පුරාවට කොටස් වශයෙන් පහල කරන ලදී. කුරානයේ ඇති විශේෂත්වය වන්නේ එය ලෝක වාසි සියලු දෙනා වෙනුවෙන් පහළ කොට තිබීම ය.

කුරානයෙන් මිනිසාට යහ මහ පෙන්වීම හැරුණු කොට ව්‍යාපාර ආචාරධර්ම, විවාහය සහ දික්කසාදය, අසල්වැසි ප්‍රේමය, නිතිය, සමාජ ඇසුර ඇතුළු බොහෝ දේවල් පෙන්වා දී තිබේ. ඒ හැරුණු විට අභ්‍යාවකාශ විද්‍යාව, සාගර විද්‍යාව, වෛද්‍ය විද්‍යාව, භූ ගර්බ විද්‍යාව වැනි ශේස්ත්‍ර පිලිබඳවද මිනිසාව දැනුවත් කොට ඇත. තවද කුරානය පහළ වන යුගයේ සැඟවී ගිය බොහෝ ඓතිහාසික සිදුවීම් කුරානය මගින් එලි දක්වා ඇත. එසේම අනාගතය පිලිබඳ නොයෙකුත් පුරෝකථනයන් කුරානය තුල දැකිය හැකිය. ඉන් ඇතැම් දේවල් නබිතුමාගේ ජිවත කාලය තුලදීම සිදුවී තිබේ. තවත් සමහර දේවල් ඉදිරියේදී සිදු වීමට නියමතය. 

අල් කුරානය දේව පණිවිඩයක් බව සනාත කල හැක්කේ එය කිසිවෙකුටත් අනුකරණය කිරීමට නොහැකි වීම නිසාය. තවද එය ලෝකය අවසාන වන තෙක්ම සංරක්ෂණය කරන බවට දෙවියන් විසින් සහතිකයක් ලබා දී තිබේ. මේ හේතුවනේ අල් කුරානය පහළ වී දැනට වසර එක්දහස් පන්සීයක් පමණ ගෙවී ගොස් තිබුනත් එහි අකුරක් හෝ වෙනස් වී නැත.

අල් කුරානය ලියැවී ඇති භාෂා ශෛලිය නබිතුමා එදිනෙදා කතා කල භාෂා ශෛලිය නොවේ. ඒ අනුව කුරානයේ ඇති භාෂා විලාශය නබ්තුමා එදිනෙදා කතා කල භාෂාවට වඩා හාත්පසින්ම වෙනස්ය. මේ හේතුවෙන් එය නබිතුමා විසින් රචනා කල කෘතියක් යැයි කිසිවෙකුටත් කිව නොහැක. 

නබිතුමාට කුරාන් පණිවිඩය පහළ වූ සැනින් එය ලේඛන ගත කොට තිබේ. එම කාර්යය ඉටු කිරීම සඳහා සහාබා වරුන්ව සය දෙනෙක් නබි තුමා විසින් පත්කොට තිබුනේය. තවද නබිතුමා විසින් එහි නිවැරදි තාවය නිතරම පරික්ෂා කොට තිබේ. 

අල් කුරානය වෙනත් ග්‍රන්ථ මෙන් නොව එය සම්පුර්ණයෙන්ම කට පාඩම් කිරීමට හැකි වීම එහි ඇති විශේෂත්වයකි. මේ හේතුවෙන් ලෝකයේ ඇති සියලුම කුර්ආන් ග්‍රන්ථ විනාශයට පත් වුවත් නැවතත් කුරානයක් සකස් කිරීමට හැකි වන්නේය. ලොව පුරා කුරානය සම්පුර්ණයෙන් කටපාඩම් කල හෆිස්වරුන් මිලියනයකට වඩා සිටිති.

අල් කුරානය මිනිස් නිර්මාණයක් නොවන බවට නවීන භූ විද්‍යා කැනීම් වලින් සොයා ගන්නා ලද වසර හාර දහසක් පමණ පැරණි ඉරම් නගරය එක් සාක්ෂියකි. මෙම නගරය පිළිබඳව කුරානයේ සඳහන් කොට තිබුනත් එය සොයා ගනු ලැබුවේ නවීන භූ විද්‍යා කැනීම් ආශ්‍රයෙන් ය. තවද නබිතුමා ඉපදීමට බොහෝ කලකට පෙර ඊජිප්තුවේ විසු පරාවෝගේ මුර්ත දේහය ගැන කුරානයේ සඳහන් කොට තිබේ. එහෙත් ඔහු ගැන දැනුවත් වුයේ මෑත කාලයේදීය. 

රෝමයේ පරාජය ගැනත් ඉතා කෙටි කාලයක් තුල දී එය නැවත වරක් ජය ගන්නා බවත් කුරානයෙන් පුරෝකථනය කොට තිබේ. එවැනි දෙයක් සිදු වේ යැයි කිසිවෙකුත් එම යුගයේදී බලාපොරොත්තු වුයේ නැත. කෙසේ වෙතත් නබිතුමා ජිවතුන් අතර සිටියදීම මෙම සිදු වීම් දෙකම දැක ගත හැකි විය.

අබු ලහබ් ඉස්ලාම් දහම වැළඳ නොගන්නා බව කුරණයෙන් දැනුම් දී තිබුනේ ඔහුගේ මරණයට දස වසරකට පමණ පෙරය. එය එසේම සිදු විය. 

කුරානය පහළ වුයේ කොටස් වශයෙනි. මේ හේතුවෙන් එකම අවස්ථාවේදී පරිජ්ජේදයන් කිහිපයකට අදාළ වැකි පහළ විය. එසේම විවිධ විෂයන්ට අයත් කරුණු එකම කල අවකාශයක් තුලදී පහල වී තිබේ. එසේ තිබියදීත් කුරානයේ කිසිම පරස්පරතාවයක් හෝ වැරැද්දක් සිදු වී නැත. මෙතරම් දුෂ්කර ක්‍රියා පටි පටියකින් පසු සකස්වූ කුරානයේ අවසාන පිටපත ඉතා අලංකාරව අද අපට දැකිය හැකිය. කුරානය දේව පණිවිඩයක් නොවන්නට කිසි සේත්ම එවැන්නක් සිදු විය නොහැකිය.

කුරානය පහළ වන යුගයේදී බොහෝ අවිද්‍යාත්මක සංසිද්ධීන් ප්‍රචලිතව තිබුනේය. එහෙත් කිසිම වැරදි සංකල්පයක් කුරානය තුලට ඇතුලත් වී නැත. එවැනි දෙයක් කිරීමට නබිතුමා විද්‍යාව ගැන දැනගෙන සිටියේද නැත. මින් පෙන්නුම් කරන්නේ කුරානය දෙවියන් විසින් පහළ කරන ලද බවයි.

විශ්වය ප්‍රසාරණය වන බව සොයාගනු ලැබුවේ විසිවන සියවසේදීය. එහෙත් එම කරුණ හත්වන සිය වසේදී පහළ වූ කුරනය තුලට ඇතුලත් වී තිබේ. එවැනි දෙයක් සිදු විය හැක්කේ එය දේව පණිවිඩයක් නිසාය. 

අහස සහ පොළව එක්ව තිබී පසුව වෙන්වූ බව කුරානයේ සඳහන් වේ. විසි වන සියවසේදී පල වූ එවැනි අදහසක් හත්වන සිය වසේදී කුරානයට ඇතුලත් විය හැක්කේ එය දේව පණිවිඩයක් නිසාය. 

කුරානය පහළ වන සමයේදී සුර්යයයා අචල වස්තුවක් බව විශ්වාස කරනු ලැබුවේය. එහෙත් කුරානයෙන් එම වැරදි මතය පිලි නොගෙන නිවැරදි තත්වය පහදා දීමට හැකි වුයේ කුරානය දේව පණිවිඩයක් බැවින් ය. කුරානය පවසන්නේ සුර්යයා ඊට නියමිත ගමන් මාර්ගයක සැරිසරන බවයි. 

අල් කුරානය තුල මිනිස් කලලය විකසනය වන ආකාරය පිළිබඳව සෑම පියවරක් ගැනම ඉතා නිවැරදිව සඳහන් කොට ඇත. මෙම කරුණු හැදෑරීමෙන් පසු ටොරොන්ටෝ විශ්වවිද්‍යාලයේ නාරි විද්‍යාව පිලිබඳ මහාචාර්ය කිත් එල් මුවර් පවසන්නේ එවැනි කරුණු ඉදිරිපත් කිරීමක් කල හැකි වන්නේ කුරානය දේව පණිවිඩයක් නම් පමණක් බවයි. ඇයිද යත් සරල කාචයක් හෝ නොමැති එවන් යුගයක මෙවැනි විස්තරයක් ඉදිරිපත් කිරීමට වෙනත් කිසිම ක්‍රමයක් නොමැති නිසාය. 

පෘථිවියේ සතායිතව ඇති කිරීම වෙනුවෙන් කඳුවල කාර්ය භාරය ගැන සොයා ගනු ලැබුවේ ඉතා මෑත කාලයේදීය. එසේ තිබියදී හත්වන සිය වසේදී පහළ වූ අල් කුරානය තුල පෘථිවියේ ස්ථායිතාව වෙනුවෙන් කඳු වලින් කෙරෙන කාර්ය භාරය ඉතා නිවැරදිව පවසා තිබේ. එවැනි දෙයක් සිදු විය හැක්කේ කුරානය දේව පණිවිඩයක් නිසාය. 

කුරානයේ සඳහන් කිසිම දෙයක් වැරදි බවට මේ දක්වාම සොයාගෙන නැත. ඒ අනුව මතු ජීවිතය සම්බන්දයෙන් කුරානයේ සඳහන් දේවල් ඒ අකාරයෙන්ම සිදු වනු ඇති බව විශ්වාස කල හැකිය.

By Fasy Ajward.B.Sc(Physics Special)Hons.Japura,

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path