ඉස්ලාම් යනු කුමක්ද? (What is Islam?)

ඉස්ලාම් යන්නෙහි තේරුම සර්වබලධාරී අල්ලාහ්ගේ කැමැත්තට යටත් වීම වේ. අල්ලාහ් කව්රුන්ද යත් විශ්වය සහ එහි ඇති සියලුම දේවල් මවා පාලනය කරන අධිපති ය. ඉස්ලාම් දහම ආරම්භ වන්නේ ආදම්තුමාගෙන් ය. ඒ අනුව ලෝකයේ ඉපැරණිම දහම ඉස්ලාම් වේ. එම දහමින් මිනිසාට අංග සම්පුර්ණ ජිවන ක්‍රමයක් පෙන්වා දී තිබේ. 

ඉස්ලාම් දහමින් මිනිසා මිනිසා වෙනුවෙන් කල යුතු දේවල් සහ මිනිසා අල්ලාහ් වෙනුවෙන් ඉටු කල යුතු දේවල් වෙන වෙනම පෙන්වා දී තිබේ. මේ හේතුවෙන් ෂරියා නිතිය තුල නැමදීම් කටයුතු මෙන්ම එදිනෙදා ජීවිතයේදී පිළිපැදිය යුතු සෑම කරුණක්ම ඇතුලත් වේ. උදාහරණයක් ලෙස විවාහය, ව්‍යාපාර කටයුතු, මුදල් ගනුදෙනු, පරිපාලන කටයුතු, සමාජ ආශ්‍රිත කටයුතු, නීතිය යනාදී සියලුම දේවල් එහි අඩංගු වේ. 

ඉස්ලාම්හි ප්‍රධාන මුලාශ්‍රයන් වන්නේ අල් කුරානය සහ මුහම්මද් නබි තුමාගේ මග පෙන්වීම වේ. අල් කුරානය තුල ඇත්තේ අල්ලාහ්ගේ වදන් පමණි. කුර්ආන් පණිවිඩය අල්ලාහ්ගෙන් මුහම්මද් නබිතුමාට ජිබ්‍රිල් නම් දේවදුතයා හරහා පහළ කරනු ලැබුවකි. එම පණිවිඩය මුහම්මද් නබි තුමාට පහළ වූ සැනින්ම ලේඛන ගත කිරීම නිසා එය පහළ වූ අකාරයටම අද වන තුරු ආරක්ෂා වී තිබේ. 

මුහම්මද් නබි තුමාගේ සම්ප්‍රාප්තියට පෙර මිනිසාට නිවැරදි මාර්ගය පෙන්වා දීම සඳහා සිය දහසකට වඩා නබිවරුන් මෙලොවට පැමිණ තිබේ. ඔවුන්ගෙන් සමහරුන්ට දහම් පුස්තක සහ තවත් සමහරුන්ට අණ පනත්ද ලැබී තිබේ. මෙම නබිවරුන් අතරින් ආගම් පුස්තක පහළ වුයේ දාවුද්, මුසා, ඊසා, සහ මුහම්මද් යන නබිවරුන් සඳහා ය. ඉස්ලාම් පණිවිඩය අවසාන වන්නේ කුරානය හරහාය. 

ඉස්ලාම් විශ්වාසය සම්බන්ද කරුණු හයක් සහ ක්‍රියාවන් සම්බන්ද කරුණු පහක් මත ගොඩ නැගී ඇත. ඒවා ඉස්ලාම් දහමේ මුලික ප්‍රස්තුතයන් ය. ඒවා අනුගමනය කිරීම සෑම මුස්ලිම්වරයෙකුටම අනිවාර්ය වේ. ඉස්ලාමයේ විශ්වාසයන් මෙසේය.

1. අල්ලාහ් ගැන විශ්වාස කිරීම
2. දේවදුතයින් ගැන විශ්වාස කිරීම
3. අල්-කුරානයට පෙර පහළවූ ආගම් ගැන විශ්වාස කිරීම
4. නබිවරුන් ගැන විශ්වාස කිරීම
5. ලෝකය අවසාන වූ පසු ස්ථාපනය කරනු ලබන විනිශ්චය දිනය ගැන විශ්වාස කිරීම සහ
6. සෑම දෙයක්ම අල්ලාහ්ගේ කැමැත්තට යටත්ව සිදුවන බව විශ්වාස කිරීම යනාදිය වේ.

සැම මුස්ලිම්වරයෙකුම පහත දැක්වෙන කරුණු පිළිපැදිය යුතුය.  එහෙත් සකාත් බද්ද සහ හජ් වන්දනය අයත් වන්නේ ඊට සුදුසුකම් ලබන අය සඳහා පමණි.

1. අල්ලාහ් හැර වෙන දෙවිකෙනෙක් නැති බවත් මුහම්මද් නබිතුමා ඔහුගේ වක්තෘවරයා බවත් විශ්වාස කොට එය මුවින් ප්‍රකාශ කිරීම. 
2. දෛනිකව පස්වතාවක් සලාතය ඊට නියමිත වෙලාවන්හිදී ස්ථාපනය කිරීම.
3. ධනවතුන් විසින් වාර්ෂිකව ඔවුන්ගේ වස්තුව වෙනුවෙන් ගෙවිය යුතු සකාත් ගණන් බලා ඒවා ලැබීමට සුදුසුකම් ඇති අය වෙත ලබා දීම.
4. සෑම වර්ෂයකදීම රමළාන් මාසය පුරා උපවාස කිරීම. 
5. හජ් වන්දනය ඉටු කිරීම සඳහා සුදුසුකම් ලබා ඇති සියලු දෙනා විසින් එය ඉටු කිරීම.

ඉස්ලාම් ඕනෑම කෙනෙකුට ඉතා පහසුවෙන් පිළිපැදිය හැකි දහමකි. එහි ඇති විශේෂත්වය වන්නේ සමානාත්මතාවයයි. ඒ අනුව එම දහම තුල උස්පහත් බේද, වර්ණබේද, කුලබේද නැත. මේ හේතුවෙන් මුස්ලිම් දේවස්ථානය තුලදී හෝ ඉන් පිටතදී සියලු දෙනාට එක සමාන උරුමයන් ලැබේ. එහි ඇති වැදගත්කම නබි තුමාගේ අරෆා දේශනයෙන් මෙසේ ගෙන හැර දක්වා ඇත. "අරාබි ජාතිකයා අරාබි නොවන්නාට වඩා උතුම් වන්නේ නැත. එසේම අරාබි නොවන්නා අරාබි ජාතිකයාට වඩා උසස් වන්නේද නැත, සෑම කෙනෙකුම ආදම්ගේ දරුවන්ය. ඔවුන් සියලුදෙනාම මැටියෙන් මවා ඇත". "ඔබගේ ජීවිතය සහ වස්තුව එකිනෙකා අතර පුණ්‍ය දේවල් වන අතර ඒවාට අනතුරු නොකළ යුතු ය. ඒවා මෙම පුණ්‍ය සුල් හජ් මාසය සහ පුණ්‍ය අරෆා දිනයට සමානය. තවද ඔබව, ඔබගේ අධිපති දෙවියන් ඉදිරියට කැඳවනු ඇත. එම දිනයේදී ඔබගේ සෑම ක්‍රියාවක් ගැනම ඔහු ඔබගෙන් ප්‍රශ්න කිරීමට නියමිතය"

 

මුස්ලිම්වරුන්ගේ ආචාර ක්‍රමයද අනෙක් ජාතීන්ගේ ආචාර ක්‍රමවලට වඩා වෙනස් ය. එය ආගමික මුහුණුවරක් ගන්නේය. ඒ අනුව මුස්ලිම්වරුන් දෙදෙනෙකු හමු වූ විට පවසන "අස්සලාමු අලෛකුම්" යන්න කුසල් ක්‍රියාවකි. 

අල් කුරානය පවසන ආකාරයට ලෞකික ජිවිතය පරික්ෂාවකි. එම පරීක්ෂාවන්ගෙන් ජය ගත් සියලුම දෙනා ස්වර්ගයට වරම් ලබන්නේය. ස්වර්ග ජීවිතය සදාකාලික වන අතර සෑම කෙනෙකුම යෞවනයේ පසු වනු ඇත. එහි ලෙඩ දුක් ඇති වන්නේ නැත. සිතන පතන සෑම දෙයක්ම ලැබෙන්නේය. එහෙත් රැකියාවක් කිරීමට අවශ්‍ය නැත. ස්වර්ගයේ අලංකාරය මෙලොව සිටින කිසිම කෙනෙකුට සිතා බැලීමටවත් නොහැකිය. 

By Fasy Ajward.B.Sc (PhysicsSpecial) Hons.Japura,

Ex: Research officer at Ceylon Institute of Scientific and Industrial Research.


https://www.facebook.com/thetruepathofislam
http://truepath1.blogspot.com/
Twitter:- thetrue_path