ඉස්ලාමයට අනුව මරණින් මතු ජීවිතය (Life after death according to Islam)

මුස්ලිම්වරුන් මරණින් මතු ජීවිතය තරයේ විශ්වාස කරන්නේය. එය කුරානයෙන්ද නබිතුමාගේ හදිස්වලින්ද තහවුරු කොට තිබේ. නැවත නැගිටවිම සම්බන්දයෙන් අල්-කුරානය මෙසේ පවසයි: "මිනිසා කිසිත් නැතුව තිබියදී අපි ඔහුව මුලදී මැවූ බව ඔහු සිතා බැලිය යුතු නොවේද?" දරුවෙකු පිළිසිඳ ගන්නා විට දේව දුතයෙකු පැමිණ ආත්මය මව් කුසට ඇතුලත් කරන්නේය. මරණයට පත්වන විට තවත් දේවදුතයෙකු පැමිණ ආත්මය රැගෙන යන්නේය. මේ හේතුවෙන් ආත්මය දිගටම පවතින අතර මතු ලොවේදී වෙනත් ශරීරයකට ඇතුලත් කරනු ලැබේ. මිය ගිය පසු මුලින්ම මුහුණ දෙන්නේ සොහොන් ජිවිතයට ය. විනිශ්චය දිනයත් සමග සොහොන් ජීවිතය කෙලවර වේ. විනිශ්චය දිනයේදී මිය ගිය සෑම ආත්මයක්ම සොහොන් වලින් නැවත නැගිටවා එක් ස්ථානයකට රැස්කොට ප්‍රශ්න කිරීමට නියමිතය. එහි ප්‍රතිපල අනුව ස්වර්ගය හෝ නිරය තීරණය කරනු ලැබේ. 

මිනියක් භූමිදානය කල වහාම ඔහුගේ සොහොන් ජීවිතය ආරම්භ වේ. එක් හදිසයකට අනුව භූමදානය සඳහා පැමිණ සිටින අය එම ස්ථානයෙන් පිටත්වූ වහාම දේවදුතයින් දෙදෙනෙකු පැමිණ සොහොනේ තැන්පත් කල මිනිය වාඩිකරවා ප්‍රශ්න කිරීම ආරම්භ කරන්නේය. එහිදී ඔහුගේ විශ්වාසය ගැනද, ඔහුගේ පරමාධිපති දෙවියන් ගැනද, ඔහුගේ ආගම ගැනද ඔහුගේ නබිවරයා ගැනද ප්‍රශ්න කිරීමට නියමිතය. ඒවාට නිවැරදිව පිළිතුරු දෙනු ලැබුවේ නම් එම සොහොන ඇසට පෙනෙන තරමට විශාල කරනු ලැබේ. එම ප්‍රශ්න වලට පිළිතුරු ලබා දීමට අපොහොසත් වූ  තැනැත්තාගේ සොතොන ඉල ඇට කැඩෙන තරමට පටු කරනු ලැබේ. තවද එම තැනැත්තාට දේවදුතයින් දඬුවම් කරන්නේය. එම අවස්ථාවේදී ඔහු නගන විලාපයට මිනිසා හැර අනෙක් සියලුම සත්වයින් සවන් දෙන බව නබිතුමා පවසා ඇත. 

සොහොන් ජිවිතයට ආලමේ බර්සක් යැයි කියනු ලැබේ. එය එක් එක් ආත්මයකට වෙනස් ලෙස බලපාන්නේය. ඒ අනුව නබිවරුන් සහ ෂුහදාවරුන් අල්ලාහ් හමුවේ ජිවත් වන අතර ඔවුනට අල්ලාහ් ආහාර ලබා දෙන්නේය. එම ජීවිතය ලෞකික ජීවිතයට වඩා වෙනස් ය. අල්-කුරානයේ බර්සක්හි වාසය කරන ෂුහදා වරුන් ගැන මෙසේ පවසා ඇත. "අල්ලාහ්ගේ මාර්ගයෙහි ඝාතනය කරනු ලැබුවන්ව මළවුන් යැයි නොපවසන්න. ඔවුහු ජීවමානව සිටිති. එහෙත් නුඹලා එය නොවටහාගන්නේහුය" (කුරානය 2:154). තවත් කුර්ආන් වැකියක මෙසේ දැක්වේ. "අල්ලාහ්ගේ මගෙහි ඝාතනය කරනු ලබුවන්ව මළවුන් යැයි නියතව ඔබ නොසිතිය යුතුය. එසේ නොව, ඔවුහු තමන්ගේ පරමාධිපති හමුවෙහි ජීවමානව සිටිති. (ඔහු විසින්) ඔවුනට ආහාර දෙනු ලබති" (කුරානය 3:169). හදිසයක සඳහන් වන්නේ විශ්වාසවන්තයින්ගේ ආත්මය විනිශ්චය දිනය තෙක් කුරුල්ලෙකුගේ වේශයෙන් ස්වර්ගයේ සැරිසරන බවයි. 

අල්ලාහ්ගේ නියෝගය පරිදි විනිශ්චය දිනය ස්ථාපනය කල පසු සෑම ආත්මයක්ම තම තමන් සිටි තැන්වලින් නැගිට විනිශ්චය කරන ස්ථානයට එන්නේය. ඉන් පසු ප්‍රශ්න කිරීම ආරම්භ වීමට නියමිතය. අප මෙලොවදී කල සෑම දෙයක්ම සටහන් කල ලියවිල්ලක් සෑම ආත්මයක් වෙතම ලබා දෙනු ඇත. කිසිවෙකුටත් එහි සටහන් කොට ඇති දේවල් ප්‍රතික්ෂේප කල නොහැකි වන්නේ ඔවුන්ගේ මුඛයට මුද්‍රා තබා ඔවුන්ගේම අත්පා වලින් සාක්ෂි ලබා දෙන නිසාය. එහිදී ඔවුන් අල්ලාහ් කෙරෙහි තබා තිබුණු විශ්වාසය ගැනත් සලාතය ගැනත් උපවාසය ගැනත් අනෙක් කරුණු ගැනත් ප්‍රශ්න කරන්නේය. අල්ලාහ් වෙනුවට වෙනත් දේවල් කෙරෙහි විශ්වාසය තබා තිබුනේ නම් ඔවුන් විශ්වාස කල දේවල් වලින් පිහිට පැතීමට සිදු වේ. එහෙත් එම දිනයේදී කෙනෙකුගෙන් කෙනෙකුට උදව් කල නොහැකිය. මේ නිසා දෙමව්පියන් දැක දරුවන්ද දරුවන් දැක දෙමව්පියන්ද දුවන්නේය. අවසානයේදී නිරයට උඩින් දමා ඇති පාලමක් මතින් ස්වර්ගයට යෑමට නියමිතය. ඒ ඒ ආත්මයන් කර තිබුණු කුසල් වල තරම අනුව ඇතැම් අය ආලෝකයේ වේගයෙන්ද සමහරු ශබ්දයේ වේගයෙන්ද තවත් සමහරු අශ්වයෙකුගේ වෙගයෙන්ද යනාදී වශයෙන් ස්වර්ගයට පිවිසෙන්නේය. සමහරු ගාටමින් යන අතර තවත් සමහරු නිරයට වැටෙන්නේය. 

ස්වර්ගයේ මෙන්ම නිරයේ ජීවිතයට කෙළවරක් නැත. ස්වර්ගවාසින්ගේ වයස වෙනස් වන්නේද නැත. ඔවුන්ගේ මනාපය පරිදි සිතන පතන සෑම දෙයක්ම ලැබෙන්නේය. ඔවුන්ගේ දෙපා යටින් දිය දහරාවන් ගලා බසින්නේය. විශාල ගස්වල සෙවනත් එහි ඇති පලතුරුත් ඔවුන්ගේ සිතේ හැටියට කඩාගෙන අනුභව කරන්නේය. ඔවුන්ගේ සතුට වෙනුවෙන් ස්වර්ගයේ කන්‍යාවියන් එකකට වඩා විවාහ කර දෙන්නේය. මේ සියල්ලටම වඩා අල්ලාහ්ව දැකීමට ලැබීම ඉමහත් සතුටක් වනවාට කිසිම සැකයක් නැත. 

අල්ලාහ්ව ප්‍රතික්ෂේප කළවුන්ද පින් වලට වඩා වැඩියෙන් පව් කල වුන්ද නිරයට යන්නේය. ඔවුන් සදාකල් නිරයේම සිටිනු ඇත. එහෙත් ඇතැම් අයගේ පව් වලට දඬුවම් විඳීමෙන් පසු ස්වර්ගය ලබා දීමට නියමිතය. නිරා වැසියන්ට කිසිම සිසිලක් ලැබෙන්නේ නැත. ඔවුන්ට පානය කිරීම සඳහා ලෝදිය මෙන් රත්වූ දියරයන් ලබා දෙනු ඇත. ආහාරය සඳහා කටු සහිත ගෙඩි වර්ගයක් දෙනු ලැබේ. 

මතු ජීවිතය ගැන සෑම දහම් පනිවිද්යකින්ම මිනිසාව දැනුවත් කොට තිබේ. දෙවියන් පහළ කල අවසාන දහම් පණිවිඩය වන කුරානයේ සවිස්තරාත්මකව එලොව ජීවිතය ගැන විස්තර කොට ඇත. එය ජය ගැනීම සඳහා අවශ්‍ය කටයුතු ඕනෑම කෙනෙකුට ඉතා පහසුවෙන් කල හැකිය. ඒ සඳහා විශාල මුදල් වැය කල යුතු වන්නේද නැත. එසේ තිබියදී මතු ජීවිතය ජය ගැනීම සඳහා වෙහෙසෙන්නේ ඉතා සුළු පිරිසක් වීම පුදුමයකි !

By Fasy Ajward.B.Sc(PhysicsSpecial)Hons.Japura,
Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path