මිනිස් ජිවිතයේ අරමුණ කුමක්ද? (What is the purpose of human life?)

ඇතැමුන් පවසන ආකාරයට මිනිසා වානරයාගෙන් පරිනාමනය වුයේ නම් මිනිස් ජිවිතයට නිශ්චිය අරමුණක් තිබිය නොහැක. එහෙත් සෙසු ජීවින් සමග සැසඳීමේදී මිනිසාට සුවිශේෂී තැනක් උරුම වන්නේය. 

සත්ව ලෝකයේ මිනිසා වැනි ජීවියෙක් ඇති වීමට හේතුව කුමක් විය හැකිද? ඇත්ත වශයෙන්ම් මෙම පැනයට පිළිතුර දන්නේ මිනිසාගේ මැවුම්කරු පමණි.

සෙසු ජීවින් සමග සැසඳීමේදී මිනිසා අතිශයින්ම වෙනස් ය. මිනිපිට ජිවත්වන සෙසු ජීවින්ට වඩා මිනිසාට සුවිශේෂ වූ ඥානයක් ලැබී ඇත. එපමනක් නොව කොඳු නාරටිය සිරස්ව තබාගෙන ඇවිදින එකම ජීවියා මිනිසාය. නොයෙකුත් භාෂාවන් කතා කරන්නේද මිනිසා පමණි. මිනිසාට නොයෙකුත් නිර්මාණයන් කල හැකිය. එහෙත් මිනිසා තරම් නිර්මාණයන් කිරීමට වෙනත් කිසිම ජීවියෙකු සමත් වන්නේ නැත. මෙය කිසිම ආකාරයකින් අහඹු සිදුවීමක් විය නොහැක.

මිනිසා පරිනාමනයේ ප්‍රතිපලයක් නම් තව දුරටත් එය සිදු නොවන්නේ ඇයි? එපමණක් නොව අදටත් වානරයන් ඉතිරිව තිබීමට හේතුව කුමක් විය යුතුද? කෙසේ වෙතත් නවීන විද්‍යාව හමුවේ පරිනාම වාදය බිඳ වැටී ඇත. ඊට ප්‍රධානතම හේතුව එක් ජීවී කුලකයකින් තවත් ජීවී කුලකයක් ඇති වීමේදී තිබිය යුතු සංක්‍රාන්ති අවස්ථාවේ පොසිල හමු නොවීමය. මේ නිසා අවිනිශ්චිත වාදයන් පිළිගැනීමට වඩා යම් නිශ්චිත පදනමක් ඇති ආගමක් පිළිගැනීම මිනිසාගේ විමුක්ත්යට හේතුවකි.

ආරම්භයේ සිටම මිනිසා ආගමක් අදහා තිබේ. ඒ අතරම ඇතැම් උදවිය නිවැරදි ආගම වෙනුවට අන්ද විශ්වාසයන් තුලද එල්බගෙන තිබේ. 

මිනිසාට නිවැරදි මාර්ගය පෙන්වීම සඳහා මෙලොවට බොහෝ නබිවරුන් පැමිණ තිබේ. නබිවරුන් යනු විශ්වය සහ එහි ඇති සියලුම දේවල් මවා පාලනය කරන්නාවූ සර්වබලධාරී දෙවියන්ගේ නියෝගිත වරුන් ය. දෙවියන්ව ඇමතීම සඳහා එක් එක් ආගම්වල වෙනස් නම් භාවිතා කොට තිබේ. ඉස්ලාම් ආගම අනුව ඔහුට අල්ලාහ් යැයි ආමන්ත්‍රණය කරනු ලැබේ.

ඇතැමුන් සිතන විදියට මිනිසා පරිනාමනය නිසා ඇති වුයේ නම් මිනිසා කිසිවෙකුට වගකිව යුතු නැත. තවද පින්දහම් කිරීමට අවශ්‍යද නැත. ඒ අනුව අනාචාරයේ යෙදුනත් සොරකම් කලත් මිනි මැරුවත් රටේ නිතිය අනුව දඬුවම් කරනු ලැබුවා මිස ඒවාට මතු ජීවිතයේදී දඬුවම් තිබිය නොහැකිය. එවිට හිට්ලර් වැනි මිනි මැරුම් මිලියනයකට වඩා සිදු කල කෙනෙකුට ලැබෙන්නේ එක් මරණ දඬුවමක් පමණි. එය කිසිසේත්ම සාධාරණ නොවේ. මිනිසාට මරණයෙන් පසු නැවත ජිවිතයක් තිබුනේ නම් මිස එවැනි වැරදි වලට යුක්තිය ඉටු කල නොහැකිය.

ඇතැමුන් සිතන අන්දමට මිනිසා ඉබේ නිර්මාණය විය හැකි නම් යාන වාහාන, පරිගණක, ස්මාට් ෆෝන් ආදී දේවල්ද ඉබේ ඇති විය යුතුය. එහෙත් යතාර්ථය වන්නේ ඉදිකට්ටක් සෑදීමට පවා විශාල කාර්ය භාරයක් සිදු කිරීමට අවශ්‍ය වීමයි. 

මිනිසා ඕනෑම දෙයක් නිෂ්පාදනය කරන්නේ යම්කිසි අරමුණක් පෙරදැරි කරගෙනය. එසේ තිබියදී මිනිස් නිර්මාණවලට වඩා අතිශයින්ම සංකීර්ණ විශ්වය සහ එහි ඇති සියලුම දේවල් අරමුණක් නොමැතිව මවනු ලබයිද? 

ඕනෑම නිෂ්පාදනයක් සමග අත්පොතක් නිකුත් කරන්නේය. එසේම මිනිසාත් සමග දහම් පණිවිඩයක් පහළ කොට ඇත. තවද ඇතැම් සංකීර්ණ යන්ත්‍ර ක්‍රියා කරවිය යුතු අකාරය පෙන්වා දීම සඳහා පුහුණු කරුවන් පැමිණෙන්නේය. එසේම මිනිසාට යහ මග පෙන්වීම සඳහා දහම් පණිවිඩත් සමග නබිවරුන් පැමිණ තිබේ. එසේ පැමිණි අවසාන නබිවරයා මුහම්මද් නබි තුමා වන අතර අවසාන දේව පණිවිඩය අල් කුරානය වේ.

අල් කුරානයට අනුව ලෝකයේ ඇති සෑම දෙයක්ම මවා තිබෙන්නේ මිනිසා වෙනුවෙන්ය. මිනිසාව මවා තිබෙන්නේ අල්ලාහ්ට නැමදීම සඳහාය. මෙම කුර්ආන් වැකිවලින් එය දැනුම් දී තිබේ. "ඔහුම පොළොවෙහි ඇති සියලුම දේවල් නුඹලා වෙනුවෙන් මැව්වේය" (කුරානය 2:29). "මා ජින්වරුන්ව සහ මිනිසුන්ව, මාව නැමදුම් කිරීමට මිස මැව්වේ නැත" (කුරානය 51:56). 

ඉස්ලාම් දහම පවසන ආකාරයට මරණයෙන් පසු ජීවිතයට කෙළවරක් නැත. ඒ අනුව සැබෑ ජීවිතය ආරම්භ වන්නේ මරණයට පත් වීමෙන් පසුවය. මිනිසාට ලැබී ඇති ලෞකික ජීවිතය පරික්ෂාවකි. ඒ අනුව ලෞකික ජිවිතයේ ජය හෝ පරාජනය තීරණය කරනු ලබන්නේ මිනිසා මෙලොවදී ක්‍රියා කරන ආකාරය අනුව ය. මේ නිසා අරමුණ හරිහැටි නොදැන ජිවත් වීමෙන් සිදු වන්නේ විශාල හානියකි. 

අල් කුරානය මිනිස් වර්ගයා වෙනුවෙන් නිවැරදි මාර්ගය පෙන්වීම සඳහා පහල කරන ලද අවසාන දේව පණිවිඩය වේ. කුරානය මගින් ඊට පෙර පහලවූ දහම් පණිවිඩ සියල්ල නැවත තහවුරු කොට ඇත.  ඒ අනුව මිනිසා පිළිපැදිය යුතු සම්පුර්ණ ජිවන රටාව කුරානයෙන් පෙන්වා දෙන්නේය. මේ හේතුවෙන් කුරානය පෙන්වා දී ඈති පරිදි ජිවත් වීම මිනිසාගේ විමුක්තියට හේතුවකි. 

By Fasy Ajward. B.Sc(PhysicsSpecial)Hons,Japura.

Ex.Research officer at former Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/

Twitter:-thetrue_path