ශුද්ධ වූ අල් කුර්ආනය (The Norble Quran)

අල් කුරානය, මුල්ම මිනිසා වන ආදම් තුමාගේ පටන් ජේසු තුමා දක්වා පැමිණි දහම් පණිවිඩවල දිගුවකි. එය මෙලොවට පහළ කරන ලද අවසාන දහම් පුස්තකය ද වේ. කුරානයත් සමග දහම් පණිවිඩවල පැමිණීම අවසාන වන්නේය. ඒ අනුව ලෝකය අවසාන වනතෙක් මිනිසා විසින් පිළිපැදිය යුතු මාර්ගෝපදේශය වන්නේ කුරානය යි.

කුරානය මුහම්මද් නබි තුමාගේ නිර්මාණයක් නොවේ. එහි ඇත්තේ අල්ලාහ් දෙවිඳුන් විසින් ජිබ්‍රිල් නමැති දේවදුතයා හරහා මුහම්මද් නබිතුමා හට පහළ කරන ලද පණිවිඩයකි. එම පණිවිඩය පහළ වූ වහාම ලේඛක ගත කරන ලදී. එබැවින් කුරානයට අනෙක් ආගමික ග්‍රන්ථ මෙන්, එකකට වඩා අනුවාද නැත. කුරානය පහළ වුයේ අරාබි භාෂාවෙන් වන අතර අදටත් එම භාෂාව භාවිතයේ පවතින්නේය. 

අල් කුරානය වැනි කෘතියක් අල්ලාහ්ට හැර වෙන කිසිවෙකුටත් සම්පාදනය කිරීමට නොහැකි වීම විශේෂත්වයකි. ඒ බව මෙම කුර්ආන් වකියෙන්ද ස්ථිර කොට ඇත.

"අල් කුර්ආනය, අල්ලාහ් හැර වෙනත් කිසිවෙකු විසින් රචනා කළ නොහැක්කකි. නමුත්, එය මිට පෙර ඇති දෙය (මුසා නබිතුමාට සහ ජේසු තුමාට පහළ කරන ලද ආගම්) සැබෑ කරන්නක් ලෙසද, නීති රීතීන් පැහැදිලි කරන්නක් ලෙසද වේ. මෙය විශ්වයේ අධිපති දෙවිදුන්ගෙන් බවට කිසිම සැකයක් නැත" (කුරානය 10:37).

ඉහත සඳහන් කල පරිදි කුරානය පහළ වී දැනට වසර 1450ක් පමණ ගෙවී ගොස් ඇතත් ඊට සමාන කෘතියක් මෙතෙක් කිසිවෙකු විසින් සම්පාදනය කොට නැත.  

අල් කුර්ආන් පණිවිඩය, ඊට පෙර පහළ කරන ලද දහම් පණිවිඩ මෙන් එකම අවස්ථාවේදී පහළ කරන ලද්දක් නොවේ. ඒ අනුව, එය වසර 23ක් පුරා කොටස් වශයෙන් ඒ ඒ අවස්ථාවන්ට සුදුසු පරිදි පහළ විය. කුරානය කොටස් වශයෙන් පහල වීම නිසා  ප්‍රයෝගික ජීවිතයත් සමග එය ඉතා හොඳින් බද්ද වී ඇත. අල්ලාහ් හමුවේ පිළිගන්නා එකම දහම ඉස්ලාම් වේ. එබැවින් ඉස්ලාම් හැර වෙන කිසිම ආගමක් අල්ලාහ් හමුවෙහි වලංගු වන්නේ නැත. 

"කව්රුන් හෝ ඉස්ලාම් වෙනුවට වෙනත් ආගමක් පිළි ගැනීමට ප්‍රිය කරන්නේද, කිසිම අකාරයකින් අල්ලාහ්, ඔහුගෙන් එය  පිලි නොගන්නේය. එලොවෙහි ඔහු පාඩු වූවන්ගෙන් කෙනෙකු වනු ඇත" (කුරානය 3:85).

මුහම්මද් නබි තුමාගේ කාර්යය භාරය වන්නේ මිනිසාට කුර්ආන් පණිවිඩය දේශනා කිරීම පමණි. එය පිළිගැනීම හෝ පිළිනොගෙන සිටීම මිනිසාගේ ස්ව කැමැත්ත අනුව සිදු වන්නකි. 

"(ඕ මුහම්මද්!) මෙම පුස්තකය ඔබ මිනිසුන්ව ඔවුන්ගේ සමිඳුන්ගේ අවසරය ඇතිව - අන්ධකාරයේ සිට, ප්‍රසංසාවට හිමි, සර්වබලධාරී විසින් පෙන්වන මාර්ගයට - යොමු කිරීම පිණිස අපි ඔබට පහළ කරන  ලද්දකි" (කුරානය 14:1)

කුරානය මගින් මතු ජීවිතය ජය ගැනීම සඳහා අවශ්‍ය සියලුම දේවල් පෙන්වා දෙන්නේය. උදාහරණයක් ලෙස මිනිසා දෙවියන් හට කල යුතු දේවල් මෙන්ම මිනිසා මිනිසාට කල යුතු දේවල් ඇතුලත් ය. එසේම ස්වර්ගය ගැනත් නිරය ගැනත් දීර්ඝ වශයෙන් විස්තර කොට තිබේ. මේ නිසා යම් කෙනෙක් නිරයට යන්නේ නම් එය ඔහුගේම වරදින් සිදු වන්නකි. 

කුරානයේ ඇති විශේෂත්වය වන්නේ එය හත්වන සිය වසේදී පහළ කරනු ලැබුවත් සෑම යුගයකටම අයත් වන පරිදි ඉදිරිපත් කොට තිබීමය. ඒ අනුව එහි ඇති නීති රීති අදටත් ඉතා හොඳින් ක්‍රියාත්මක කල හැකිය. එහි ඇති ඇතැම් කරුණු සොයාගනු ලැබුවේ විසිවන සිය වසේදීය. එමගින් සිදු කොට ඇති බොහෝ පුරෝකතනයක් ඒ අකාරයෙන්ම සිදු වී ඇත. කුරානයෙන් හෙළිදරව් කරන ලද ඇතැම් ඉතිහාස ගත කරුණු හෙළිදරව් කර ගත හැකි වුයේ මෑත කාලයේදී කරන ලද ගවේශන වලින් වීම විශේෂත්වයකි.

 

කුරානය ගැන අධ්‍යයනය කළ ඇතැම් මුස්ලිම් නොවන අය මෙසේ පවසා තිබේ. "අල් කුර්ආනය ලෝකයේ ඇති ශ්‍රේෂ්ඨ  ආගමික ග්‍රන්ථ අතර වැදගත් ස්ථානයක් හිමි කරගෙන ඇති බව පිළිගත යුතුය. එය සාහිත්‍ය පන්තියට අයත් යුගයක් නිර්මාණය කිරීමේ ලාබාලතම කෘතිය වුවද, එමගින් බහුතර මිනිසුන් කෙරෙහි ඇති කර තිබෙන පුදුමාකාර බලපෑමෙන් කිසිසේත්ම ගැලවිය නොහැකිය. එය මිනිස් චින්තනයේ නව අවධියක් සහ නැවුම් චරිතයක් නිර්මාණය කොට තිබේ. කුරානය මගින් මුලින්ම අරාබි අර්ධද්වීපයේ විෂමජාතීය කාන්තාර ගෝත්‍ර වැසියන් ගණනාවක්ම වීර චරිතයන් බවට පරිවර්තනය කර තිබේ. පසුව යුරෝපයේ සහ නැගෙනහිර රටවල්වල දේශපාලන-ආගමික බලවේගයක් බිහි කිරීමට සමත් වී ඇත” (G. Margoliouth, Introduction to J.M. Rodwell’s, “The Koran,” New York: Everyman’s Library, 1977, p. vii.). 

කුරානය මිනිස් වර්ගයා වෙනුවෙන් පහළ කරන ලද්දක් බැවින් එය හැදෑරීම සෑම කෙනෙකුටම ප්‍රයෝජනවත් වේ. මේ වන විට එය සෑම භාෂාවකටම පරිවර්තනය කොට ඇත. එබැවින් තමන්ට කැමති භාෂාවකින් එය හැදෑරිය හැකිය. කෙසේ වෙතත් කුරානයේ පරිවර්තනයක් කිසිම අකාරයකින් කුරානයට සමාන නොවන බව තේරුම් ගත යුතුය.

By Fasy Ajward.B.Sc(Physics Special) Hons.Japura,
Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path