කුරානය පහළ වන්නේ කුමක් සඳහාද? (What was the Quran revealed for?)

කුරානය යනු මිනිසාට යග මග පෙන්වීම සඳහා අල්ලාහ් දෙවිඳුන්ගෙන් පහළ කරන ලද පණිවිඩයකි. එය ජිබ්රිල් නම් දේවදුතයා හරහා මුහම්මද් නබිතුමා හට පහල විය. එමගින් ඊට පෙර පහළ කරන ලද දේව පණිවිඩ වල ඇති කරුණු තවදුරටත් අවධාරණය කොට තිබේ. 

කුරානය තුල මිනිසා වෙනුවෙන් පහළ කරනු ලැබූ ආගම සතරක් ගැන සඳහන් වේ. ඒවා මෙසේය. මුසා නබි තුමා හට පහළ කරන ලද බයිබලයේ පැරණි ගිවිසුම (තව්රාත්), ජේසු තුමා හට පහළ කරන ලද බෛබලය (ඉන්ජිල්)  සහ දාවුද් නබි තුමා හට පහළ කරන ලද සබුර් යන ආගම් වේ. මේ සෑම ආගමකින්ම අවධාරණය කොට තිබෙන්නේ දෙවියන්ගේ ඒකීයත්වය ගැනයි. ඒ අනුව දෙවියන් වෙනුවට වෙනත් දෙයක් ආදේශ කිරීම බලවත් වරදකි.

දෙවියන් ගැන පැහැදිලි අර්ථ දැක්වීමක් ලබා දී තිබෙන්නේ කුරානයෙන් පමණි. මෙම අර්ථදැක්වීම හොඳින් දැනගෙන සිටීම ස්වර්ගය අත්කර ගැනීමට අත්‍යාවශ්‍ය කරුණකි. එසේ තිබියදී මිනිසා දෙවියන් වෙනුවට වෙනත් දේවල් සඳහා නමදිනු ලැබුවේ නම් ස්වර්ගයට වරම් ලැබෙන්නේ නැත. ඒ අනුව සාස්තෘ වරුන්ට හෝ තම අතින්ම සාදාගත් පිළිම වලට හෝ වැඳීම බලවත් වරදවල් වේ. එම වරද කරමින් සිටියදී මිය ගිය කෙනෙකුට පරලොවේදී සමාව ලැබෙන්නේ නැත. එවැනි කෙනෙකුගේ නවාතැන නිරය බව කුරානය මගින් පෙන්වා දෙන්නේය.

කුරානයෙන් මිනිසාට අංග සම්පුර්ණ ජිවන ක්‍රමයක් පෙන්වා දී තිබේ. ඒ අනුව මිනිසා විසින් දෙවියන් හට කල යුතු දේවල් සහ මිනිසා මිනිසා වෙනුවෙන් කල යුතු දේවල් වෙන වෙනම පෙන්වා දෙන්නේය. උදාහරණයක් ලෙස විවාහය සහ දික්කසාදය, ව්‍යාපාර ආචාර ධර්ම, මුදල් ගනු දෙනු, අසල්වැසි ප්‍රේමය, අහාර පාන, රාජ්‍ය පාලනය, නිතිය, දරුවන් සඳහා දෙමව්පියන්ගේ යුතුකම් මෙන්ම දෙමව්පියන් සඳහා දරුවන්ගේ යුතුකම් පෙන්වා දීමට හැකිය. එහි ප්‍රතිපලයක් ලෙස ගෝත්‍ර වශයෙන් බෙදී වෙන්වී යුද්ධ කරමින් සිටි ජන  සමුහයක් ඉතා කෙටි කාලයක් තුලදී ලෝකයේ ඉතා ශ්‍රේෂ්ඨ ජාතියක් බවට පත්  විය. එම කරුණ මුස්ලිම් නොවන කෙනෙක් මෙසේ විස්තර කොට තිබේ. "අල් කුර්ආනය ලෝකයේ ඇති ශ්‍රේෂ්ඨ  ආගමික ග්‍රන්ථ අතර වැදගත් ස්ථානයක් හිමි කරගෙන ඇති බව පිළිගත යුතුය. එය සාහිත්‍ය පන්තියට අයත් යුගයක් නිර්මාණය කිරීමේ ලාබාලතම කෘතිය වුවද, එමගින් බහුතර මිනිසුන් කෙරෙහි ඇති කර තිබෙන පුදුමාකාර බලපෑමෙන් කිසිසේත්ම ගැලවිය නොහැකිය. එය මිනිස් චින්තනයේ නව අවධියක් සහ නැවුම් චරිතයක් නිර්මාණය කොට තිබේ. කුරානය මගින් මුලින්ම අරාබි අර්ධද්වීපයේ විෂමජාතීය කාන්තාර ගෝත්‍ර වැසියන් ගණනාවක්ම වීර චරිතයන් බවට පරිවර්තනය කර තිබේ. පසුව යුරෝපයේ සහ නැගෙනහිර රටවල්වල දේශපාලන-ආගමික බලවේගයක් බිහි කිරීමට සමත් වී ඇත” (G. Margoliouth, Introduction to J.M. Rodwell’s, “The Koran,” New York: Everyman’s Library, 1977, p. vii.). 

මිනිසාට මතු ජීවිතය ගැන දැනගත හැකි වන්නේ කුරානය තුලින් ය. ඒ අනුව ස්වර්ගය ගැනත් නිරය ගැනත් හොඳින් දැනගැනීමට කුරානය ප්‍රයෝජනත් වේ. ඇත්ත වශයෙන්ම නිමක් නැති ජිවිතය ආරම්භ වන්නේ මරණයෙන් පසුව ය. ලෞකික ජිවිතයට රැවටී එය විනාශ කර ගැනීම මිනිසා ලබන විශාල පාඩුවකි. 

කුරානයෙන් මෙලොව ජීවිතයේ නිවැරදි අරමුණ පෙන්වා දී තිබේ. ඒ අනුව මතු ජීවිතය ජය ගැනීම සඳහා කුරානය අනුව ජිවත් වීම ඉතා වැදගත් ය. එය කල හැකි වන්නේ නිරවුල් මනසකින් කුරානය හැදෑරු විට පමණි.

By Fasy Ajward.

https://www.facebook.com/thetruepathofislam
http://truepath1.blogspot.com/
Twiter:- thetrue_path