ඉස්ලාමීය විවාහයක් සාම්ප්‍රදායික විවාහයකට වඩා වෙනස් වන්නේ ඇයි? (Why is an Islamic marriage different from a traditional marriage?)

ඉස්ලාම් දහම මිනිසාට අංග සම්පුර්ණ ජිවන ක්‍රමයක් පෙන්වා දී තිබේ. එබැවින් විවාහය ද ඊට ඇතුලත් වේ. මේ හේතුවෙන් මුස්ලිම්වරයෙක් විවාහ විය යුත්තේ දහමින් පෙන්වා දී ඇති නීති රීති වලට අනුකුලව ය.  මෙය සම්ප්‍රදායික විවාහයකත් ඉස්ලාමිය විවාහයක්ත් අතර ඇති ප්‍රධාන වෙනසකි. 

සම්ප්‍රදායික විවාහයකදී කාන්තා පාර්ශවය විසින් පිරිමි පාර්ශවයට දෑවැද්ද දෙනු ලැබුවත් කුරානයට අනුව එය පිරිමි පාර්ශවය විසින් කාන්තා පාර්ශවයට ලබා දීම අනිවාය වේ. "...එහෙයින්, ඔවුන්ගෙන් කව්රුන් සමග නුඹලා සැප විඳිහුද, ඒ වෙනුවෙන් ඔවුන්ගේ විවාහ දීමනාව (මහර්) අනිවාර්යයෙන් ඔවුනට ලබා දෙනු..." (කුරානය 4:24). මෙම නියෝගය නිසා විවාහ වීම සඳහා බලාපොරොත්තුවෙන් සිටින කාන්තාවන්ට විශාල අස්වැසිල්ලක් ලැබේ. විවාහ වීමෙන් පසුවද පවුලේ සියලු නඩත්තු වියදම් දැරිය යුත්තේ පිරිමි පාර්ශවය විසින් ය. එයද කුරානයෙන් ලබා දී තිබෙන නියෝගයක් වේ. එපමණක් නොව විවාහ වීමෙන් පසු පවත්වනු ලබන සාදයද මනාලයාගේ වියදමින් සිදු කල යුතු බව නබිතුමා පවසා තිබේ.

කුරානයේ ඇති නියෝගය අනුව මුස්ලිම්වරයෙකු විවාහ වීමේදී තමන් විවාහ වීමට අදහස් කරන කාන්තාවගේ අනුමැතිය ලබාගත යුතුය. "විශ්වාස කළවුනි! ස්ත්‍රින්ව බලහත්කාරයෙන් අයිති කරගැනීමට නුඹලාට අනුමැතිය නොමැත. ඔවුන් ප්‍රසිද්ධියේ යම් නින්දාසහගත ක්‍රියාවක් කළේ නම් හැර ඔවුන්ට නුඹලා දුන් දැයින් (මහර්) කොටසක් පැහැර ගැනීම සඳහා ඔවුනට හිංසා නොකරනු. ඔවුන් සමග ගෞරවයෙන් ජීවත්වනු. නුඹලා ඔවුන්ව අප්‍රිය කලද (ඉවසා ගනු) මන්ද, නුඹලා යමක් අප්‍රිය කලද, අල්ලාහ් එහි අධික යහපත තැබීමට පිළිවන" (කුරානය 4:19). 

මෙහි දක්වා ඇති ඥාතින් සමග විවාහ වීම මුස්ලිම්වරුන්ට තහනම් ය. “ඔබගේ මව්වරුන්ද, ඔබගේ දියනියන්ද, ඔබගේ සහෝදරියන්ද, ඔබගේ පියාගේ සහෝදරියන්ද, ඔබගේ මවගේ සහෝදරියන්ද, ඔබගේ සහෝදරයන්ගේ දියනියන්ද, ඔබගේ සහෝදරියන්ගේ දියනියන්ද, ඔබට කිරි දුන් කිරිමව්වරුන්ද, ඔබට කිරිදිමෙන් වූ සහෝදරියන්ද, ඔබගේ භාර්යාවන්ගේ මව්වරුන්ද ඔබට තහනම් කරනු ලැබ ඇත" (කුරානය 4:23). 

මුස්ලිම්වරුන්ට විවාහ වීමෙන් තොරව ප්‍රේම සම්බන්දතා පැවැත්වීම තහනම් වේ. මෙම නිතිය, ඉස්ලාම් ආගමේ සහ ඉස්ලාම් නොවන ආගම් අතර තිබෙන ප්‍රධාන වෙනසකි. මෙවැනි නීතියක් පැනවීමෙන් විවාහයට පෙර සිදුවන ලිංගික සම්බන්දතා  වලක්වා ගැනීමට  හැකි වේ. කෙසේ වෙතත් එවැනි නීති නැති සමාජවල තරුණ ගැහැණු ළමයි ප්‍රේම සම්බන්දතා බිඳ වැටීම හේතුවෙන් සිය දිවි හානිකර ගැනීමට පවා පෙළඹෙන්නේය. බොහෝ අවස්ථාවලදී ගබ්සා කිරීම් ද සිදු වේ. එවැනි වැරදි ඉස්ලාම් දහම අනුව මහා පාපයන් ය.

ඉස්ලාම් දහම අනුව මුස්ලිම්වරයෙකුට මුලිම් නොවනකෙනෙකු සමග විවාහ වීම තහනම් ය. මේ හේතුවෙන් මුස්ලිම් නොවන කෙනෙක් මුස්ලිම් කෙනෙකු සමග විවාහ වීමට අදහස් කරන්නේ නම් මුලින්ම ඉස්ලාම් දහම වැළඳ ගෙන සිටිය යුතුය. මෙවැනි නීතියක් පනවා තිබෙන්නේ ප්‍රශ්චාත් විවාහ ගැටළු වැළැක්වීම සඳහාය. තවද ඉස්ලාම් දහම ඒක දේව විශ්වාය මත ගොඩ නැගී ඇති බැවින් කිසිසේත්ම බහු දේව විශ්වාසයක් ඇති කෙනෙකු සමග ජිවත් වීම අසීරු කරුණකි. එවැනි විවාහවලින් පසු ලැබෙන දරුවන්ට බොහෝ අවස්ථාවලදී කුමන ආගම තෝරා ගන්නේ දැයි ප්‍රශ්නයක් පැන නගින්නේය. මේ හේතුවෙන් දරුවන් ආගමින් බැහැර වන අවස්ථාවන්ද තිබේ. කෙසේ වෙතත් මුස්ලිම්වරයෙකුගේ ප්‍රධාන අරමුණ මතු ජීවිතය ජය ගැනීම ය.

මුස්ලිම්වරයෙකුට විවාහ යෝජනාවක් සිදු කිරීමේදී ලෞකික දේවල් වලට වඩා දහමට මුල් තැනක් ලබා දිය යුතුය. ඒ අනුව මනාලයා හෝ මනාලිය සලාතය ඉටු කරන කෙනෙක්දැයි සොයා බැලීම ඉතා වැදගත් ය. සලාතය, ශරීරයට හිස මෙන් යැයි නබිතුමා පවසා ඇත.

ඉස්ලාම් දහම අනුව විවාහයට හෝ වෙනත් කටයුත්තක් සඳහා හෝ නැකත් බැලීමක් නැත. මේ නිසා ඇතැම් මාස අසුබ යැයි විශ්වාස කරමින් එම මාස වලදී විවාහ  නොවී සිටීම වරදකි. 

මුස්ලිම්වරුන්ගේ විවාහයකත් මුස්ලිම් නොවන විවාහයකත් අතර ප්‍රධාන වෙනසක් වන්නේ පිරිමි සහ කාන්තාවන් කලවම් නොවීමය. මේ හේතුවෙන් පිරිමි පාර්ශවය ගැහැණු පාර්ශවයෙන් වෙන් කොට තිරයක් දමනු ලැබේ. තවද මුස්ලිම් විවාහ උත්සවවලදී සාමාන්‍ය දවස්වල මෙන්ම මත්පැන් භාවිතය සපුරා තහනම් වේ. 

ඉස්ලාමිය විවාහයක් "ඉබාදතයක්" නොහොත් කුසල් පිරිනැමෙන දහමේ කොටසක් බැවින් ඉස්ලාම් දහමින් අනුමත කොට තිබෙන සීමාව තුල විවාහයේ කටයුතු පවත්වා ගත යුතුය. කිසිම අයුරකින් නාස්තිකාර වියදම් ඒ තුල ඇතුලත් නොවීමට වග බලා ගත යුතුය. විශාල සාදයක් පැවැත්වීම සඳහා පොලියට මුදල් ගැනීමෙන් වැලකි සිටිය යුතුය. පොලියට සම්බන්ද වන තැනැත්තා සමග අල්ලාහ් යුද්ධ ප්‍රකාශ කොට තිබේ. 

By Fasy Ajward.B.Sc (PhysicsSpecial) Hons, Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/
Twiter:- thetrue_path