ඉස්ලාම් දහම තුල අන්තවාදයක් තිබේද? (Is There Extremism in Islam?)

ඉස්ලාම් දහමෙහි ප්‍රධාන අරමුණ මිනිසාට නිවැරදි මාර්ගය පෙන්වා දීම ය. කැමති කෙනෙකුට එය පිළිපැදිය හැකිය. කැමති නැති කෙනෙකුට එම දහම පිළිපදින්නැයි බලකිරීමක් නැත. මෙම කුර්ආන් වැකියෙන් එය පැහැදිලි කොට තිබේ. "(ඉස්ලාම්) දහම තුල කිසිඳු බල කිරීමක් නැත. ඇත්ත වශයෙන්ම වැරදි මාර්ගයෙන් නිවැරදි මාර්ගය ප්‍රත්‍යක්ෂ විය. කවරෙක් 'තාගුත්' ව ප්‍රතික්ෂේප කර අල්ලාහ්ව විශ්වාස කරන්නේද ඔහු නියත වශයෙන්ම ශක්තිමත් කඹය (කුරානය) තදින් අල්වාගත් තැනැත්තා වේ" (කුරානය 2:256). 

අන්තවාදය අර්ථ දක්වා තිබෙන්නේ "අන්ත දේශපාලන හෝ ආගමික අදහස් දැරීම; උමතුව" යනුවෙනි. එහෙත් ඉස්ලාම් දහම තුල එවැනි තත්වයක් කිසිසේත්ම නැත. ඉස්ලාම් යන්නෙහි තේරුම සාමය යන්නයි. තවද මුස්ලිම්වරුන් දෙදෙනෙකු මුණ ගැසුණු විට ආචාර කරන්නේ ඔබට ශාන්තිය අත්වේවා යන අරුත ඇති "අස්සලාමු අලෙයිකුම්" යන වදන් වලින් ය. එවැනි ආගමක ඇති අන්තවාදය කුමක්ද?

ඉස්ලාම් දහම ගොඩ නැගී තිබෙන්නේ මුලික විශ්වාසයන් හයක් මතය. එනම අල්ලාහ්ගේ ඒකීයත්වය විශ්වාස කිරීම, දේවදුතයින් ගැන විශ්වාස කිරීම, කුරානයට පෙර පහළ වූ දහම් පුස්තක ගැන විශ්වාස කිරීම, දහම දෙසීම සඳහා පැමිණි නබිවරුන් ගැන විශ්වාස කිරීම, අවසාන දිනය ගැන විශ්වාස කිරීම සහ සෑම දෙයක්ම අල්ලාහ්ගේ කැමැත්ත අනුව සිදුවන බව විශ්වාස කිරීම වේ. මේ සෑම දෙයක්ම දහමේ මුලික අවශ්‍යතාවයන් වේ. කිසිවෙකුට එම විශ්වාසයන් දෙස බලා අන්තවාදය යැයි කිව නොහැකිය. 

ඉස්ලාම් දහමෙහි අනිවාර්ය කරන ලද කරුණු පහක් තිබේ. එනම් අල්ලාහ් හැර වෙන දෙවිකෙනෙකු නැති බවත් මුහම්මද් නබිතුමා ඔහුගේ දුතයා බවටත් සාක්ෂි දැරීම, දිනපතා පස් වතාවක් අල්ලාහ් වෙනුවෙන් සලාතය ඉටු කිරීම, ධනවතුන් විසින් සකාත් බද්ද ගෙවීම, රමළාන් මාසයේදී උපවාස කිරීම සහ දහමින් පනවා ඇති අවශ්‍යතා සම්පුර්ණ කරන සියලුම දෙනා හජ් වන්දනය ඉටුකිරීම වේ. මේවා දහමේ අවශ්‍යතාවයන් මිස අන්තවාදය නොවේ. 

ඉස්ලාම් දහමින් මිනිස් අයිතිවාසිකම් සඳහා අවසර ලබා දී තිබේ. ඒ අනුව ඕනෑම කෙනෙකුට තමන්ට අවශ්‍ය නම් විවාහ වීමට හෝ විවාහ නොවී සිටීමට අවසර තිබේ. එසේම තමන් කැමති ව්‍යාපාරයක් කිරීමට හෝ තමන් කැමති රැකියාවක් කිරීමට තහනමක් නැත. ඕනෑම මුස්ලිම්වරයෙකුට තමන් කැමති අධාපනයක් ලැබීමට නිදහස තිබේ. එසේ තිබියදී ඉස්ලාම් දහම තුල කුමන  ආකාරයේ අන්තවාදයට ඉඩක් වෙන් කොට තිබේද? 

 

අංග සම්පුර්ණ දහමක් හැටියට ඇඳුම් ඇඳීම සම්බන්දයෙන් ඉස්ලාම් දහාම නීති රීති පනවා තිබේ. ඒ අනුව මුස්ලිම් කාන්තාවන් පිටස්තර අයට නොපෙනෙන පරිදි තම ශරීරය වසා ගන්නේය. එය අන්තවාදයක් නොවේ. යම් කෙනෙක් එය අන්තවාදය ලෙස දකින්නේ නම් බිකිනිය සමග මහ පාරේ ගමන් කිරීමට කුමක් කිව යුතුද? 

ඉස්ලාම් දහමින් මිනිස් සිරුරට අහිතකර මාංශ වර්ග සියල්ලම තහනම් කොට තිබේ. එය අන්තවාදය ලෙස සලකන්නේ නම් සත්ව ඝාතනය සහමුලින්ම තහනම් කිරීමට කියන්නේ කුමක්  කියාද?

ඉස්ලාම් දහම ඉතා සරල ජිවන ක්‍රමයක් මිනිසා හට පෙන්වා දෙන්නේය. එය ලොකු කුඩා ඇති නැති සෑම කෙනෙකුටම ඉතා පහසුවෙන් පිළිපැදිය හැකි ය. ඇත්ත වශයෙන්ම එය ලෝකවාසී සියලු දෙනා වෙනුවෙන්ම පහළ කරන ලද දහමකි. 

By Fasy Ajward. B.Sc (Physics Special) Hons.Japura.

Ex: Research officer at Ceylon Institute of Scientific and Industrial Research.

https://www.facebook.com/thetruepathofislam

http://truepath1.blogspot.com/