ඉස්ලාම් දහම අනුව වසංගතයකදී ක්‍රියා කල යුත්තේ කෙසේද? (According to Islam, how should one act during an epidemic?)

ඉස්ලාම් දහම මිනිසාගේ සුබ දිද්ධිය සඳහා වන සෑම දෙයක්ම පෙන්වා දී තිබේ. මෙම කොවිඩ් වසංගතය හමුවේ එම මග පෙන්වීම අනුගමනය කිරීමෙන් අපගේ ආරක්ෂාව සලසා ගත හැකිය. අයිෂා රලි තුමිය නබිතුමාගෙන් අසා දැනගත් හදිසයක් මෙසේ විස්තර කරන්නීය. "වසංගතය ගැන මම අල්ලාහ්ගේ දූතයානන්ගෙන් විමසුවෙමි. එවිට ඔහු පැවසුවේ අල්ලාහ් තමන් කැමති අයට එය දඬුවමක් ලෙසත් විශ්වාසවන්තයින් හට දයාවක් ලෙසත් එය යවන බවයි". ඉන් පසු, එම රෝගය පවතින නගරයක වෙසෙන කෙනෙකුට ඉන් පිටතට යෑම හෝ ඉන් පිටත සිටින කෙනෙකුට වසංගතය පවතින ප්‍රදේශයට යෑම හෝ කොකරන ලෙස උපදෙස් දුන්නේය. ඉන් පසු ඔහු කියා සිටියේ, අල්ලාහ් කෙරෙහි බලාපොරොත්තුවෙන් සහ විශ්වාසයෙන් යුතුව කටයුතු කරන කෙනෙක් ඉවසීමෙන් සහ අල්ලාහ් ලියා ඇති දේ හැර වෙන කිසිවක් සිදු නොවන බව විශ්වාස කරන්නේ නම් ඔහු මිය ගියත් ඔහුට අල්ලාහ් වෙනුවෙන් දිවි පිදු කෙනෙකුට ලැබෙන කුලිය අයත් වන බව දැනුම් දුන්නේය (සහිහ් බුහාරි 8:616).

වසංගතයකදී හැකි තරම් ඉන් ආරක්ෂා වීම සඳහා පියවර ගත යුතුය. ඒ වෙනුවට දෛවයට ඉඩ දී නොසැලකිලිමත් ලෙස ක්‍රියා කිරීම ඉස්ලාම් දහම අහුමත කරන්නේ නැත. එක් සහාබි වරයෙක් ඔහුගේ ඔටුවා බැඳ නොතබා උගේ ආරක්ෂාව ගැන බලාපොරොත්තු තැබිය හැකිදැයි නබි තුමාගෙන් විමසුවේය. එවිට නබිතුමා, "ඔබගේ ඔටුවා බැඳ තබා අල්ලාහ් කෙරෙහි විශ්වාසය තබන්නැයි" පිළිතුරු දුන්නේය. ඒ අනුව වෛරසයක් පැතිර යන අවස්ථාවේදී එය වැළැක්වීමට ගත යුතු සෑම පියවරක්ම ගැනීමෙන් පසු අල්ලාහ් කෙරෙහි විශ්වාසය තැබිය යුතුය. ඒ අනුව වසංගතයක් පවතින විට ඉන් ආරක්ෂා වීම සඳහා නියම කොට ඇති එන්නත් කරණය ලබා ගෙන මුඛ ආවරණයද පැළඳගෙන හැකි තරම් නිවසේ රැඳී සිටීමට ක්‍රියා කල යුතුය. මෙම පියවරවල් ගැනීමෙන් පසුත් යම් කෙනෙකුට වෛරස් රෝගය වැළඳුනේ නම් එය අල්ලාහ්ගේ කැමැත්ත අනුව සිදු වූ බව විශ්වාස කල යුතුය. 

උමර් රලි තුමා ඉස්ලාමයේ දෙවන කලීෆා වරයාය. ඔහු අල්ලාහ් කෙරෙහි දැඩි විශ්වාසයක් තබා තිබුණු ඉතා ශ්‍රේෂ්ඨ නායකයෙකි. එතුමාගේ ජිවිත කාලයේදී වසංගත රෝගයක් සිරියාවේ පැතිර ගියේය. එහෙත් ඔහු ඒ බව දැන සිටියේ නැත. එබැවින් ඔහු සිරියාව බලා පිටත්ව ගියේය. එම ගමනේදී හමුදාවේ අණදෙන නිලධාරියෙකු වන අබු උබෙයිදා ඉබ්නු ජර්රා (රලි) තුමා සිරියාවේ වසංගතයක් පැතිර යන බව උමර් රලි තුමාට දැනුම් දුන්නේය. එම පුවත ඇසීමට ලැබීමෙන් උමර් රලි තුමා වහාම ඔහුගේ ගමන එම ස්ථානයේදීම නතර කොට ඔහුත් සමග ගිය අනෙක් සහාබා වරුන් අමතා මෙසේ පැවසුවේය. "මා හෙට උදෑසන ආපසු හැරී යන්නෙමි, ඔබලාත් එසේම කරනු" ඊට සවන් දුන් අබු උබෙයිදා රලි තුමා, උමර් (රලි) තුමාගෙන් "ඔබ අල්ලාහ්ගේ නියමය දැක පලා යන්නේදැයි ප්‍රශ්න කළේය. ඊට හේතුව උමර් (රලි) තුමා වැනි කෙනෙක් එවැනි පියවරක් ගැනීම ගැන ඔහුට කිසිසේත්ම බලාපොරොත්තු විය නොහැකි වීමයි. කෙසේ වෙතත් උමර් (රලි) තුමා අබු උබෙයිදා රලි තුමා අසන ලද ප්‍රශ්නයට මෙසේ පිළිතුරු දුන්නේය. "ඔව්, අබු උබෙයිදා අපි අල්ලාහ්ගේ එක් නියෝගයකින් තවත් නියෝගයක් කරා පැන යන්නෙමු" (සහිහ් අල් බුහාරි 5397). 

ඉස්ලාම් දහමින් වසංගතයකදී මෙන්ම සාමාන්‍ය අවස්ථාවලදී ක්‍රියා කල යුතු අන්දම පෙන්වා දී තිබේ. ඒවා දැනගෙන ක්‍රියා කිරීම සෑම මුස්ලිම්වරයෙකුගේම වගකීමකි. 

By Fasy Ajward.B.Sc(Sp.Phy)Hons.Japura,
Ex: Research officer at Ceylon Institute of Scientific and Industrial Research.

https://www.facebook.com/thetruepathofislam
http://truepath1.blogspot.com/
Twiter:- thetrue_path